Mark 5 - Ndebele Bible (iBhayibhili Elingcwele) 1978

Ukukhutshwa kwabomoya ababi(Mat 8:28–34; Luka 8:26–39)

1Bafika ngaphetsheya kolwandle elizweni lamaGerasene.

2Esephumile emkolweni, wamhlangabeza masinyane umuntu ovela emalibeni elomoya omubi;

3wayehlala emalibeni. Kwakungasekho muntu owayengambopha langeketane;

4ngoba wayebotshiwe kanengi ngezibopho langamaketane, kodwa wawaqamula amaketane, lezibopho waziquma, kwakungasekho loyedwa owayengamthambisa.

5Ngezikhathi zonke ebusuku lemini wayesemalibeni lezintabeni, ekhala, ezisika ngamatshe.

6Kwathi ebona uJesu ekhatshana, wagijima, wamkhonza;

7wamemeza ngelizwi elikhulu esithi: Ngilani lawe Jesu, Ndodana kaNkulunkulu oPhezukonke? Ngikufungisa uNkulunkulu, ungangihluphi.

8Ngoba uJesu wathi kuye: Phuma kuye, wena moya omubi.

9Wasembuza wathi: Ungubani ibizo lakho? Wamphendula wathi: Ibizo lami nginguLegiyoni, ngoba sibanengi.

10Wamncenga kakhulu ukuba angabakhuphi kulelolizwe.

11Kwakukhona lapho ewatheni lentaba umhlambi omkhulu wengulube usidla.

12Omoya bamncenga bathi: Sithumele engulubeni singene kuzo.

13UJesu wabavumela. Omoya ababi baphuma, bangena ezingulubeni; umhlambi waphaphathekela eliweni, waphoseka olwandle, waminzwa, zazingaba zinkulungwane ezimbili.

14Abazalusayo babaleka, babika indaba emzini lasemaphandleni; beza ukubona okwenzekileyo.

15Bafika kuJesu, bambona obengenwe ngomoya ababi ehlezi embethe, esilile, yena owayelomoya ababi abanengi; besaba.

16Labo ababekubonile babatshela ukuba kwenzeke kanjani kowayengenwe ngomoya ababi, langengulube.

17Basebeqala ukumncenga ukuba asuke elizweni lakubo.

18Wathi engena emkolweni, umuntu owayengenwe ngomoya ababi wamncenga ukuba abe laye.

19Kamvumelanga, kodwa wathi kuye: Hamba uye ekhaya kwabakini, ubatshele ukuba iNkosi ikwenzele okungakanani, ilesihawu kuwe.

20Wasuka, wahamba, waqala ukutshumayela eDikapolisi ukuba uJesu umenzele okungakanani; bamangala bonke.

Indodakazi kaJayirosi ivuswa ekufeni. Owesifazana owayelomopho uyasiliswa(Mat 9:18–26; Luka 8:40–56)

21UJesu esebuye wawelela ngaphetsheya ngomkolo, kwabuthana kuye ixuku elikhulu; wayesolwandle.

22Kwafika omunye wabaphathi besinagoge, uJayirosi ibizo lakhe; embona wawa phansi ngasenyaweni zakhe,

23wamncenga kakhulu esithi: Indodakazi yami isiphela; akuze, ubeke izandla zakho phezu kwayo ukuze isiliswe, iphile.

24Wahamba laye. Ixuku elikhulu lamlandela, lamcindezela.

25Owesifazana owayelomopho iminyaka elitshumi lambili,

26ehluphekile kakhulu enyangeni ezinengi, echithile konke ayelakho engasizakalanga, kodwa kwalokho kumqinisa,

27esezwile ngoJesu, weza exukwini ngemva kwakhe, wathinta ingubo yakhe,

28ngoba wathi: Aluba ngithinta ingubo zakhe nje, ngizakusiliswa.

29Woma masinyane umthombo wegazi lakhe, wezwa emzimbeni wakhe ukuba usilile esifweni sakhe.

30UJesu wanela ukuzwa phakathi kwakhe ukuba amandla aphumile kuye, waphendukela exukwini, wathi: Ngubani othinte ingubo zami?

31Abafundi bakhe bamphendula bathi kuye: Uyabona ixuku likucindezela, kodwa uthi: Ngithintwe ngubani?

32Wathalaza ukuba ambone owenze lokhu.

33Owesifazana esesaba ethuthumela, ekwazi okwenzekileyo kuye, weza wawa phambi kwakhe, wamtshela iqiniso lonke.

34Wathi kuye: Dade, ukukholwa kwakho kukusilisile; hamba kuhle, usiliswe esifweni sakho.

35Wathi esakhuluma, kwafika abomphathi wesinagoge, bathi: Indodakazi yakho isifile; usamkhathazelani uMfundisi na?

36UJesu engakunanzi okutshiwoyo, wathi kumphathi wesinagoge: Ungesabi, kholwa kuphela.

37Kavumelanga muntu ukuba amlandele, kuphela uPetro, loJakobe, loJohane umfowabo kaJakobe.

38Bafikake endlini yomphathi wesinagoge, wabona isiphithiphithi labakhalayo labalilayo kakhulu.

39Esengenile, wathi kubo: Liphithizelelani, likhala na? Umntwana kafanga, kodwa ulele.

40Bamhleka ulunya; kodwa yena esebakhuphile bonke, wathatha uyise womntwana lonina lalabo ababelaye, wangena lapho kulele khona umntwana.

41Wabamba isandla somntwana, wathi kuye: “Thalitha, kumi”; okuyikuthi ngokuphendulelwa: Ntombazana, ngithi kuwe, vuka!

42Yasivuka intombazana masinyane, yahamba; yayileminyaka elitshumi lambili. Bamangala ngokumangala okukhulu.

43Wabalayisisa ukuba lokhu kungaziwa muntu; njalo wathi kayinikwe ukudla.