Umtshumayeli 8 - Ndebele Bible (iBhayibhili Elingcwele) 1978

1Ngubani onjengomuntu ohlakaniphileyo na? Ngubani owazi ukuchasisa ulutho na? Ukuhlakanipha komuntu kuyakhanyisa ubuso bakhe, lobuso bakhe obesabekayo buphendulwe.

2Lalela umlayo wenkosi; ungaphangisi ukwenza isifungo kuNkulunkulu.

3Suka phambi kwenkosi, ungaphuzi nxa indaba ingayithokozisi, ngoba yona yenza ekuthandayo.

4Ngoba ilizwi layo lilamandla; ngubani ongathi kuyo: Wenzani na?

5Yena olalela umlayo kayikwehlelwa yingozi, lengqondo yomuntu ohlakaniphileyo iyasazi isikhathi lendlela yokwenza.

6Ngoba yonke into ilesikhathi sayo lendlela yokuyenza, lanxa inkathazo zomuntu zinzima kuye.

7Ngoba kakwazi okuzakwenzeka, futhi ngubani ongamtshela ukuthi kuzakwenzeka kanjani?

8Kakulamuntu olamandla phezu komoya, loba phezu kosuku lokufa. Kakho osalayo ukuya empini, lobubi kabuyekeli labo abasemandleni abo.

9Konke lokhu ngakubona lapho ngihlolisisa ngengqondo yami konke okwenziwa ngaphansi kwelanga; ngabona abantu bephethene ngokulukhuni bezwisana ubuhlungu.

10Ngasengibona abantu ababi bengcwatshwa, labantu abavela emangcwabeni bebabuka emzini lapha babesenza khona okubi. Lokho lakho kulize.

11Ngoba isigwebo ngesenzo esibi singenziwa masinyane, abantu balesibindi sokwenza okubi.

12Lanxa isoni sisenza okubi izikhathi ezilikhulu siphile isikhathi eside, kodwa ngiyazi ukuthi kuzabalungela labo abamesabayo uNkulunkulu, ngoba bayamesaba.

13Kodwa ababi kakuyikubalungela; futhi kabayikuhlala insuku ezinengi; umuntu ongamesabiyo uNkulunkulu unjengesithunzi.

14Kukhona okulize okwenzekayo emhlabeni ukuthi bakhona abalungileyo abazuza okwezenzo zabantu ababi, bakhona lababi abazuza okwezenzo zabantu abalungileyo. Ngathi lokho lakho kulize.

15Ngakho ngibabaza ukuzithokozisa; ngoba umuntu kalalutho oluhle ngaphansi kwelanga kuphela ukudla lokunatha, azithokozise, ngoba lokhu kuzakuba laye ekutshikatshikeni kwakhe ensukwini zokuphila kwakhe uNkulunkulu amnike zona ngaphansi kwelanga.

16Lapho ngidinga ngengqondo yami ukuba ngizuze ukuhlakanipha lokubona umsebenzi owenziwa emhlabeni, umuntu angalali ubuthongo emini lebusuku,

17ngabona ukuba uNkulunkulu ukumisile ukuba umuntu angakuboni okwenzekayo ngaphansi kwelanga; lanxa umuntu ezama ngokungakanani, kayikukubona; ohlakaniphileyo angathi uyazi, kodwa kayikulazi iqiniso lakho.