Hubo 68 - Ndebele Bible (iBhayibhili Elingcwele) 1978

Ukunqoba kukaNkulunkulu kaIsrayeli

1UNkulunkulu kavuke, zihlakazeke izitha zakhe,

abamzondayo babaleke phambi kwakhe.

2Baphephethe njengentuthu;

njengokuncibilika kwengcino phambi komlilo,

ababi kabachithwe phambi komlilo,

ababi kabachithwe phambi kukaNkulunkulu.

3Kodwa abalungileyo kabajabule, bathabe phambi kukaNkulunkulu,

bathokoze lokuthokoza.

4Hlabelelani kuNkulunkulu, hlabelani lidumise ibizo lakhe,

lihlabele ingoma kuye ohlezi phezu kwamayezi;

ibizo lakhe nguNkosi, thokozani phambi kwakhe.

5UYise wezintandane lomvikeli wabafelwakazi

nguNkulunkulu endlini yakhe engcwele.

6UNkulunkulu unika abahluphekayo indawo yokuhlala,

ukhuphela izibotshwa ekukhululekeni,

kodwa abalenkani ubayekela elizweni elomileyo.

7Nkulunkulu, ekuholeni kwakho abantu bakho,

ekudabuleni kwakho enkangala,

8umhlaba wazamazama, amazulu avuza amanzi,

phambi kukaNkulunkulu weSinayi, phambi kukaNkulunkulu,

uNkulunkulu kaIsrayeli.

9Walinisa izulu elikhulu, Nkulunkulu,

walivuselela ilizwe lakho selichitheka;

10abantu bakho bazuza indawo yokuhlala kulo;

ngobuhle bakho, Nkulunkulu, wabalungisela abaswelayo.

11INkosi iyakhupha ilizwi;

ixuku elikhulu labesifazana liyabika izindaba,

12lithi: Amakhosi ezimpi ayabaleka, ayabaleka.

Bona abesifazana abasekhaya bayabelana impango.

13— Lanxa lilala phakathi kwezibaya zezimvu,

amaphiko ejuba asitshekelwe yisiliva,

lezimpaphe zalo zisitshekelwe ligolide —

14Lapho uSomandla echitha amakhosi kulo,

ungqoqwane wawela eZalimoni.

15Ntaba enkulu, ntaba yaseBashani,

ntaba elezingqonga, ntaba yaseBashani;

16wena ntaba elengqonga ezinengi,

uyikhangelelani ngomona intaba uNkulunkulu athanda ukuhlala kuyo na?

Yebo, iNkosi izakuhlala kuyo kuze kube nininini.

17Ngezinqola zokulwa eziyizinkulungwane ezingamatshumi amabili,

izinkulungwane ngezinkulungwane,

iNkosi yehla endaweni engcwele ivela eSinayi.

18Wena wakhwela phezulu entabeni, ulandelwa ngabathunjiweyo;

wamukela iziphiwo ebantwini, yebo, lakwabalenkani;

iNkosi uNkulunkulu izahlala khona.

19Kayibongwe iNkosi

esithwalela imithwalo yethu insuku ngensuku;

uNkulunkulu ungumkhululi wethu.

20UNkulunkulu wethu unguNkulunkulu wokukhulula;

uNkulunkulu iNkosi ungasisiza ekufeni.

21Kodwa uNkulunkulu uzakuphohloza amakhanda ezitha zakhe,

ukhakhayi olulenwele lwalowo ohamba ezonweni zakhe.

22INkosi yathi: Ngizakubabuyisa eBashani,

ngibabuyise enzikini yolwandle,

23ukuba inyawo zakho uzigezise egazini labo,

inlimi zezinja zakho zibe lesabelo sazo ezitheni.

24Ziyabonakala izindwendwe zakho, Nkulunkulu;

izindwendwe zikaNkulunkulu wami leNkosi yami zingena endaweni engcwele.

25Ngaphambili kuhamba abahlabelayo,

ngemuva kulandela abatshayi bamachacho,

phakathi kwabo kuhamba izintombi zitshaya izigubhu.

26Bongani uNkulunkulu ebandleni elikhulu,

bongani iNkosi,

lina eliyinzalo kaIsrayeli.

27Nango uBenjamini ongomncinyane wabo ebahola,

lezikhulu zikaJuda zibuthene,

lezikhulu zikaZebuluni, lezikhulu zikaNafitali.

28Veza amandla akho, Nkulunkulu;

bonakalisa amandla akho, Nkulunkulu, osenzele wona

29usethempelini lakho eliseJerusalema

lapho amakhosi akulethela khona izipho.

30Sikhuze isilo esihlala emihlangeni,

ukhuze umhlambi wezinkunzi kanye lamankonyane azo, ngitsho izizwe,

zithobeke zikulethele isiliva;

ubachithe abantu abathanda ukulwa.

31Izikhulu zizakuza zivela eGibithe;

iEtiyopiya lizakuphakamisela izandla zalo kuNkulunkulu ngokuphangisa.

32Lina mibuso yomhlaba hlabelelani kuNkulunkulu,

lihlabelele ukubonga eNkosini,

33kuyo ekhwele phezu kwamazulu ayekhona kusukela endulo;

khangelani, iyazwakalisa ilizwi layo, ilizwi layo elilamandla.

34Nikani udumo kuNkulunkulu,

obukhosi bakhe buphezu kukaIsrayeli,

lamandla akhe asemayezini.

35UNkulunkulu uyesabeka endaweni yakhe engcwele;

UNkulunkulu kaIsrayeli,

nguye onika abantu bakhe amandla.

Kabongwe uNkulunkulu.