2 Kho 5 - Ndebele Bible (iBhayibhili Elingcwele) 1978

UElisha usilisa uNamani

1UNamani induna yempi yaseSiriya wayengumuntu omkhulu enkosini yaseSiriya, elodumo, ngoba ngaye iNkosi uNkulunkulu yayinikile iSiriya ukunqoba. Kodwa wayelobulephero.Luka 4:27

2AmaSiriya ekuhlaseleni kwawo athumba elizweni lakoIsrayeli intombazana eyaba yinceku yomkaNamani.

3Yona yathi enkosikazini yayo: Uba inkosi yami ibingabonana lomprofethi ohlala eSamariya, ubezakuyelapha ubulephero bayo.

4UNamani wasesiyakubikela inkosi yakhe konke lokho okutshiwo yintombazana evela elizweni lakoIsrayeli.

5Inkosi yaseSiriya yasisithi: Kulungile, ungahamba, ngizathumela incwadi enkosini yakoIsrayeli. Wasehambake ephethe amathalenta esiliva alitshumi lamashekeli egolide azinkulungwane eziyisithupha lezigqoko ezintsha ezilitshumi.

6Wayinika incwadi inkosi yakoIsrayeli eyayilotshwe ukuthi: Lincwadi ikwazisa ukuba ngithumele kuwe inceku yami uNamani ukuba umelaphe ubulephero bakhe.

7Kwathi inkosi yakoIsrayeli isiyibalile leyoncwadi yadabula izigqoko zayo isithi: NginguNkulunkulu yini mina ukuba ngibulale loba ngisilise ukuba lumuntu athumele ilizwi kimi ukuba ngelaphe lumuntu ubulephero bakhe na? Ake libone ukuthi udinga kanjani ithuba lokuxabana lami.

8Kodwa kwathi uElisha umuntu kaNkulunkulu esizwa ukuthi inkosi yakoIsrayeli idabule izigqoko zayo, wathumela ilizwi enkosini esithi: Uzidabuleleni izigqoko zakho na? Keze kimi ukuba azi ukuthi kukhona umprofethi koIsrayeli.

9Wasesiya uNamani lamabhiza akhe lenqola zakhe, wema emnyango wendlu kaElisha.

10UElisha wathumela isithunywa kuye wathi: Hamba uyegeza eJordani kuze kube kasikhombisa, inyama yakho izahluma, lawe uhlambuluke.

11Kodwa uNamani wathukuthela, wasuka wahamba esithi: Bengisithi uzaphuma impela eze kimi, eme amemeze ibizo leNkosi uNkulunkulu wakhe, ahambise isandla sakhe phezu kwezilonda, angisilise ubulephero.

12Imifula yaseDamaseko iAbana leFaripari kayingcono yini kulawo wonke amanzi akoIsrayeli na? Bengingageze kiyo ngihlambuluke na? Wasephenduka ehamba ngokuthukuthela okukhulu.

13Kodwa inceku zakhe zasondela kuye zathi: Baba, aluba umprofethi ubekulayile ukwenza ulutho oluthile olukhulu, ubungayikukwenza na? Pho, kwehlula ngaphi uba esithi: Geza uhlambuluke?

14Wasehambake, wabhukutsha eJordani kwaze kwaba kasikhombisa njengelizwi lomuntu kaNkulunkulu, wahlambuluka lenyama yakhe yahluma, yafanana leyomntwana omncinyane.

15Wasebuyela kumuntu kaNkulunkulu labo bonke abantu bakhe, wafika wema phambi kwakhe, wathi: Sengisazi ukuthi kakukho uNkulunkulu emhlabeni wonke, kuphela koIsrayeli; akwamukele isipho encekwini yakho.

16Kodwa yena wathi: Ngifunga iNkosi uNkulunkulu engiyikhonzayo, kangiyikuthatha lutho. Wamncenga ukuba athathe isipho, kodwa wala.

17UNamani wasesithi: Uba kungenjalo, akungivumele ukuba ngithathe umhlabathi olingana lemithwalo emibili yembongolo. Ngoba angisayikunikela iminikelo yokutshiswa lemihlatshelo komunye unkulunkulu kuphela eNkosini uNkulunkulu.

18Kulokhu kodwa iNkosi kayingithethelele; nxa inkosi yaseSiriya ingena ethempelini likaRimoni ukukhonza ibambelele engalweni yami, lami ngikhonze ethempeleni likaRimoni lapho ikhonza khona, kulokhu iNkosi ingithethelele.

19UElisha wasemvalelisa wathi: Hamba kuhle. Kodwa kwathi uNamani esehambe ummango omfitshane,

20uGehazi inceku kaElisha umuntu kaNkulunkulu wathi: Inkosi yami imyekele uNamani waseSiriya wahamba ingasamukelanga isipho sakhe. Ngifunga iNkosi uNkulunkulu, ngizamgijimela, ngizuze okuthile kuye.

21UGehazi wasemlandela uNamani. Kwathi uNamani embona egijima emlandela, wehla enqoleni yakhe ukuba amhlangabeze, wathi: Kulungile konke na?

22Yena wathi: Yebo, kulungile. Inkosi yami ingithumile kuwe ukuba ngikubikele ukuthi sekufikile kiyo amajaha amabili abaprofethi evela ezintabeni zakoEfrayimi; icela ukuba uwanike ithalenta lesiliva elilodwa lezigqoko ezimbili ezintsha.

23UNamani wathi: Ngiyakucela, thatha amathalenta amabili. Wamncengancenga, wamfakela amathalenta amabili emigodleni emibili, wamnika lengubo ezintsha ezimbili, wakuthwalisa inceku zakhe ezimbili, zahamba phambi kukaGehazi.

24Kwathi uGehazi esefikile oqaqeni, wakuthatha kuzo, wakungenisa endlini; waziyekela inceku zahamba.

25Wasengena esima phambi kwenkosi yakhe; uElisha wathi kuye: Ubuye ngaphi, Gehazi? Yena wathi: Inceku yakho ibingayanga ndawo.

26Kodwa yena wathi kuye: Umoya wami ubungelawe yini lapho lowomuntu ephenduka enqoleni yakhe ukukuhlangabeza na? Kakusilo iqiniso ukuba uyithethe imali na? Ungathenga ngayo amasimu lezihlahla zamaoliva lezivini lezimvu lezinkabi lezinceku lezincekukazi.

27Kodwa ubulephero bukaNamani buzanamathela kuwe lasenzalweni yakho kuze kube nininini. UGehazi waphuma eselobulephero esemhlophe njengongqoqwane.