Hubo 49 - Ndebele Bible (iBhayibhili Elingcwele) 1978

Ubuthutha balabo abathemba inotho

1Zwanini lokhu lonke lina bantu.

Lalelani lonke lina elakhileyo emhlabeni,

2abantukazana lezikhulu, abanothileyo labayanga.

3Umlomo wami uzakukhuluma ukuhlakanipha,

inhliziyo yami izacabanga ngokuqedisisa.

4Ngizakubeka indlebe yami kuso isaga,

ngizakuveza imfumba yami ngechacho.

5Ngizakwesabelani ezikhathini ezimbi,

lapho ububi babangizingelayo bungihanqa,

6abantu abathemba inotho yabo,

bezincoma ngobunengi benotho yabo na?

7Impela umuntu angeke azihlenge,

angeke amnike uNkulunkulu inhlawulo yokuphila kwakhe,

8— ngoba ukuhlengwa kokuphila kwakhe

kuyabiza intengo enkulu, engeke yakhutshwa muntu —

9ukuba aphile angafi.

10Uzakubona ukuthi labahlakaniphileyo bayafa,

lokuthi isithutha kanye lesiphukuphuku ziyakufa,

inotho yabo bayitshiyele abanye.

11Amaliba abo ayimizi yabo kuze kube nininini,

izindawo zabo zokuhlala kokuphela,

lanxa babesithi amazwe ngawabo.

12Umuntu kalakuhlala kokuphela lanxa elodumo,

uyafana lezinyamazana ezibhubhayo.

13Injalo indlela yabo abazithembayo,

ukuphela kwalabo abazithokozisa ngokukhuluma kwabo,

14bamiselwe indawo yabafileyo njengezimvu,

ukufa kuzabelusa;

abaqotho bazababusa kusasa,

imizimba yabo iphelele endaweni yabafileyo

ezakuba likhaya labo.

15Kodwa uNkulunkulu uzakuhlenga umphefumulo wami emandleni endawo yabafileyo,

ngoba uzakungamukela.

16Ungamhawukeli nxa umuntu enotha,

nxa inotho yendlu yakhe isanda;

17ngoba ekufeni kwakhe kayikusuka lalutho,

inotho yakhe kayiyikuhamba laye.

18Lapho esaphila uthi uyabusa,

labantu bayamdumisa nxa ephumelela.

19Kanti uzakuya kuboyisemkhulu

abangasayikubona ukukhanya kuze kube nininini.

20Umuntu kalakuhlala kokuphela lanxa elodumo,

uzakufa njengezinyamazana ezibhubhayo.