Hubo 57 - Ndebele Bible (iBhayibhili Elingcwele) 1978

Umkhuleko wokucela ukukhululwa

1Ngihawukela, Nkulunkulu, ngihawukela,

ngoba umphefumulo wami uphephela kuwe;

ngifuna ukuphephela emthunzini wamaphiko akho,

zize zidlule inhlupheko.

2Ngiyakhala kuNkulunkulu oPhezukonke,

kuNkulunkulu ophelelisa icebo lakhe ngami.

3UNkulunkulu uzakuthumela uthando lwakhe olungapheliyo lobuqotho bakhe.

Uzakuthuma esezulwini, angisize;

uzakubayangisa labo abangifihlizayo.

4Ngihlala phakathi kwezilwane eziphanga abantu;

amazinyo azo ayimikhonto lemitshoko,

lenlimi zazo ziyimihedla ebukhali.

5Phakama, Nkulunkulu, ngaphezu kwamazulu;

ubukhosi bakho bube phezu komhlaba wonke.

6Abantu bangilungisele umthiya;

ngehlelwe yikwesaba;

bangimbele umgodi endleleni,

kodwa bawele bona kuwo.

7Inhliziyo yami iqinisiwe, Nkulunkulu,

inhliziyo yami iqinisiwe.

Ngizakuhlabelela ngihube.

8Vuka, mphefumulo wami!

Vukani, mhubhe lechacho!

Ngizakuvusa ukusa.

9Ngizakukubonga, Nkosi, phakathi kwabantu,

ngikudumise phakathi kwezizwe.

10Ngoba uthando lwakho olungapheliyo lukhulu,

lufinyelela ezulwini,

lobuqotho bakho buthinta emayezini.

11Phakama, Nkulunkulu, ngaphezu kwamazulu;

ubukhosi bakho bube phezu komhlaba wonke.