1Lapho zonke izinto lezi sezehlele phezu kwenu, isibusiso lesiqalekiso engizibekileyo phambi kwenu, lizikhumbule phakathi kwezizwe zonke lapho iNkosi uNkulunkulu wenu elixotshele khona,
2lizabuyela eNkosini uNkulunkulu wenu lina labantwana benu, lilalele ilizwi layo ngenhliziyo yenu yonke langomphefumulo wenu wonke, kukho konke engililaya khona lamuhla.
3INkosi uNkulunkulu wenu izalihawukela, ibuyise abathunjiweyo benu, ilibuthe futhi ebantwini lapho iNkosi uNkulunkulu wenu elihlakazele khona.
4Uba bekhona abakini abaxotshelwe emikhawulweni yomhlaba, lalapho iNkosi uNkulunkulu wenu izakulibutha, ilithathe,
5ilibuyisele elizweni okhokho benu abalithumba ukuba libe ngelenu, liphumelele, lande kakhulu kulabokhokho benu.
6INkosi uNkulunkulu wenu izakuhlambulula inhliziyo zenu lenhliziyo zenzalo yenu, ukuba liyithande iNkosi uNkulunkulu wenu ngenhliziyo yenu yonke langomphefumulo wenu wonke ukuze liphile.
7INkosi uNkulunkulu wenu izakwehlisela zonke iziqalekiso lezi phezu kwezitha zenu labafo benu ababelizingela.
8Lizabuya lilalele ilizwi leNkosi, ligcine yonke imilayo yayo engililaya yona lamuhla.
9INkosi izakuliphumelelisa kakhulu emisebenzini yonke yezandla zenu, enzalweni yezisu zenu, lenzalweni yenkomo zenu, lezithelweni zomhlaba wenu; ngoba iNkosi izakuthaba futhi ngokuliphumelelisa, njengalokhu yayithaba ngokhokho benu,
10uba lilalela ilizwi leNkosi uNkulunkulu wenu, ligcine imilayo yayo lezimiso zayo ezilotshwe kulolugwalo lomlayo, liphendukela eNkosini uNkulunkulu wenu ngenhliziyo yenu yonke langomphefumulo wenu wonke.
11Ngoba lumlayo engililaya wona lamuhla kawulukhuni kini, futhi kawukhatshana lani.
12Kawukho ezulwini ukuba lithi: Ngubani ozakusenyukela aye ezulwini, asilandele wona ukuba siwuzwe siwugcine na?
Who We AreWhat We EelieveWhat We Do
2025 by iamachristian.org,Inc All rights reserved.
