2 Sam 19 - Ndebele Bible (iBhayibhili Elingcwele) 1978

1Kwabikwa kuJowabi kwathiwa: Inkosi uDavida iyakhala, ililela uAbisalomu.

2Ukunqoba ngalolosuku kwaphenduka isililo ebantwini bonke, ngoba bezwa kuthiwa: Inkosi idabukile ngendodana yayo.

3Abantu bangena ngokunyenya emzini ngalolosuku njengabantu ababaleke empini bengena ngokunyenya belenhloni.

4Inkosi yagubuzela ubuso bayo, yakhala ngelizwi elikhulu yathi: Hawu, ndodana yami Abisalomu, hawu Abisalomu, ndodana yami, ndodana yami!

5UJowabi wangena endlini yenkosi wathi: Lamuhla uziyangisile zonke izinceku zakho ezikusilise ekufeni wena lamadodana akho lamadodakazi akho labomkakho labanye abafazi bakho.

6Uyabathanda abakuzondayo, uzonde abakuthandayo. Ngoba ukuveze obala lamuhla ukuthi induna zempi lenceku kazisilutho kuwe; ngoba ngiyabona lamuhla ukuthi uba uAbisalomu ubesaphila, thina sonke besifile lamuhla, ube uzathokoza.

7Ngakhoke sukuma, uphume uyekhuluma kuhle lenceku zakho; ngoba ngifunga iNkosi uNkulunkulu ngithi uba ungaphumi, kakulamuntu ozahlala lawe ngalobubusuku. Lokhu kuzakuba kubi kuwe kulakho konke okubi okukwehlele kusukela ebutsheni bakho kuze kube lamuhla.

8Yasisuka inkosi, yahlala esangweni. Batshelwa abantu kwathiwa: Inkosi ihlezi esangweni; basebesiza abantu bonke phambi kwayo.

UDavida ubuyela eJerusalema

Bonke abakoIsrayeli babebaleke baya emakhaya abo.

9Kuzo zonke izizwe zakoIsrayeli abantu babephikisana besithi: Inkosi uDavida yasikhulula ezitheni zethu, yasophula ezandleni zamaFilistiya; kodwa khathesi isibalekile elizweni ibalekela uAbisalomu.

10Kodwa uAbisalomu esamgcoba ukuba abe yinkosi yethu usefele empini. Phoke, lithuleleni lingatsho lutho ngokubuyisa inkosi na?

11Konke abakoIsrayeli ababekutsho kwafinyelela endlebeni zenkosi. Inkosi uDavida yathuma ilizwi kuZadoki lakuAbiyatha abapristi, isithi: Khulumani labadala bakoJuda lithi: Kungani ukuba libe ngabokucina ukubuyisela inkosi emzini wayo na?

12Lina liyizihlobo zami, lingabegazi lami; phoke, kungani ukuba libe ngabokucina ukubuyisa inkosi na?

13Lithi kuAmasa: Angithi ungowegazi lami na? UNkulunkulu kangihlanekele engezelele futhi, uba ungayikuba yinduna yempi yami esikhundleni sikaJowabi kusukela lamuhla.

14Wazehlula inhliziyo zabantu bonke bakoJuda, basebethuma ilizwi enkosini besithi: Buya wena lazo zonke inceku zakho.

15Inkosi yasibuya eJordani; abantu bakoJuda beza eGiligali ukuba bayihlangabeze, bayichaphise umfula.

16UShimeyi indodana kaGera wakoBenjamini, waseBahurimi, waphangisa weza labantu bakoJuda ukuyihlangabeza inkosi uDavida.2 Sam 16:5–13

17Weza labantu abayinkulungwane bakoBenjamini; loZiba inceku yendlu kaSawuli, lamadodana akhe alitshumi lanhlanu, lenceku zakhe ezingamatshumi amabili, wayekhona. Bazimuka baya eJordani ngaphambi kwenkosi,

18bachapha ezibukweni ukuwelisa abendlu yenkosi lokwenza okufunwa yiyo. UShimeyi indodana kaGera waziwisela phansi phambi kwenkosi isizachapha iJordani.

19Wathi kuyo: Inkosi yami ingangibambeli umlandu, futhi ungakhumbuli okubi okwenziwa yinceku yakho mhla inkosi yami isuka eJerusalema; inkosi ingakubeki enhliziyweni.

20Ngoba inceku yakho iyazi ukuba yonile; ngakho ngifikile lamuhla, ngingowokuqala kuyo yonke indlu kaJosefa ukuzahlangabeza inkosi yami.

21Kwasekuphendula uAbishayi indodana kaZeruya wathi: UShimeyi kayikubulawa yini ngalokhu, ngoba wathuka ogcotshiweyo weNkosi na?

22UDavida wathi: Ngilani lani, lina madodana kaZeruya, ukuba limelane lami lamuhla na? Kuzabulawa umuntu lamuhla koIsrayeli na? Ngiyazi sibili ukuba lamuhla ngiyinkosi koIsrayeli.

23Wasesithi kuShimeyi: Kawuyikubulawa. Wafunga kuye.

24UMefiboshethi indodana kaSawuli weza ukuhlangabeza inkosi. Wayengagezanga inyawo zakhe, engagelanga lendevu zakhe, engagezisanga lezigqoko zakhe, kusukela mhla inkosi isuka eJerusalema kwaze kwaba mhla ibuya isilile.2 Sam 9:1–13; 16:1–4

25Kwathi esefikile evela eJerusalema ukuhlangabeza inkosi, inkosi yathi kuye: Kungani ungahambanga lami, Mefiboshethi na?

26Yena wathi: Nkosi yami, inceku yami yangikhohlisa; ngoba ngathi kuyo: Ngibophelela ubabhemi ukuba ngigade, ngihambe lenkosi, ngoba ngiyaqhula.

27Ingihlebile kuwe, nkosi yami; kodwa, nkosi yami, unjengesithunywa sikaNkulunkulu; ngakho yenza okubona kufanele.

28Ngoba bonke abendlu kababa babenjengabantu abaqunyelwe ukufa phambi kwenkosi yami; kodwa wangibeka mina engiyinceku yakho phakathi kwalabo abadla etafuleni yakho. Phoke, ngiselalungelo bani ukuba ngibuye ngikhale enkosini yami na?

29Inkosi yasisithi kuye: Usakhulumelani ngendaba zakho na? Ngithe: Wena loZiba lizakwahlukaniselana ilizwe.

30UMefiboshethi wasesithi enkosini: Kalithathe lonke, lokhu inkosi yami isibuyile ekhaya isilile.

31UBarizilayi waseGileyadi wayefikile laye evela eRogelimi; wahamba lenkosi waze wafika eJordani, wayichaphisa waseyivalelisa.2 Sam 17:27–29

32UBarizilayi wayesengumuntu omdala kakhulu, eseleminyaka engamatshumi aficaminwembili; wayipha ukudla inkosi ekuhlaleni kwayo eMahanayimi, ngoba wayenothile kakhulu.

33Inkosi yathi kuBarizilayi: Chapha kanye lami wena, ngizakukubonela kanye lami eJerusalema.

34Kodwa uBarizilayi wathi enkosini: Ngiseleminyaka emingaki yokuphila ukuba ngiye eJerusalema lenkosi na?

35Lamuhla ngileminyaka engamatshimi aficaminwembili; ngingabe ngisahlukanisa phakathi kokubi lokuhle na? Inceku yakho ingabe isezwa ekudlayo lekunathayo na? Ngingabe ngisawezwa amazwi amadoda lawabesifazana abahlabelayo na? Inceku yakho isizakuba ngumthwalo enkosini yami ngani na?

36Inceku yakho izake ichaphe nje iJordani lenkosi; inkosi izanginikelani umvuzo ongaka na?

37Ngiyakuncenga, yekela inceku yakho ibuyele, ukuze ngifele emzini wami eduze lengcwaba likababa lelikamama. Kodwa nansi indodana yami uKhimihamu, kayichaphe lenkosi yami, uyenzele lokho okubona kufanele.

38Inkosi yathi: UKhimihamu angachapha lami; ngizamenzela lokho okubona kufanele, lakho konke okufunayo kimi ngizakukwenzela khona.

39Bonke abantu basebechapha iJordani, lenkosi layo yachapha; inkosi yamanga uBarizilayi, yambusisa, yena wabuyela emzini wakhe.

40Inkosi yasisiya eGiligali, loKhimihamu wahamba layo; bonke abantu bakoJuda lengxenye yabantu bakoIsrayeli bayiphelekezela.

41Basebesiza bonke abantu bakoIsrayeli enkosini bathi kuyo: Abafowethu abakoJuda bakuntshontsheleni, bachaphisa inkosi lendlu yayo iJordani kanye labo bonke abantu bakaDavida na?

42Bonke abantu bakoJuda baphendula abantu bakoIsrayeli, bathi: Ngoba inkosi iyisihlobo sethu impela. Lithukuthelelani ngalokhu na? Sike sadlani olungolwenkosi na? Futhi isinike isipho bani na?

43Abantu bakoIsrayeli baphendula abantu bakoJuda, bathi: Thina ukuyinanzelela kwethu inkosi kukhulu kulokwenu ngokuphindwe katshumi, futhi lakuDavida sibadala kulani. Phoke, lisidelelelani na? Kakusithi esingabokuqala abakhuluma ngokubuyiswa kwenkosi yethu na? Kodwa amazwi abantu bakoJuda ayelukhuni kulamazwi abantu bakoIsrayeli.