1UDariyu inkosi wasemisa umthetho ukuba kuhlolisiswe eBabiloni endlini yokugcinela impahla lapho kwakubekwe khona izincwadi.
2KwakuseAkibatana emzini omkhulu wenkosi, elizweni lamaMede, okwafunyaniswa khona incwadi okwakulotshiwe kiyo ukuthi:
3Ngomnyaka wokuqala wokubusa kukaKurosi wakhupha lumthetho mayelana lendlu kaNkulunkulu eseJerusalema wathi: Kakwakhiwe futhi lindlu lapho kuzanikelwa khona iminikelo, kulethwe leminikelo yokutshiswa; ukuphakama kwayo kube zingalo ezingamatshumi ayisithupha, lobubanzi bayo bube zingalo ezingamatshumi ayisithupha;
4umduli wayo ube lemizila emithathu yamatshe amakhulu lomzila owodwa wezigodo. Izindleko zokwakha kazihlawulwe ngemali yesikhwama senkosi.
5Lezitsha zegolide lezesiliva zendlu kaNkulunkulu uNebukadineza azithatha ethempelini eliseJerusalema waziletha eBabiloni, kazibuyiselwe ethempelini eliseJerusalema, zonke endaweni zazo, zibekwe endlini kaNkulunkulu.
6Inkosi uDariyu yasikhupha lumthetho yathi: Ngakhoke, wena Tathenayi, mbusi welizwe elingaphetsheya komfula iYufrathi, lawe Shethari‐Bozenayi, lalabo elilabo, ababusi abaselizweni elingaphetsheya kweYufrathi, lingasondeli kuleyondawo;
7uyekeleni umsebenzi walindlu kaNkulunkulu uqhubeke; liyekele umbusi wabaJuda labadala babo bazakhele futhi lindlu kaNkulunkulu endaweni yayo yokuqala.
8Futhi ngiyamisa umthetho mayelana lalokho elifanele ukubenzela khona lababadala babaJuda ekwakhiweni kwalindlu kaNkulunkulu. Indleko zabo kazihlawulwe zonke ngemfanelo ngemali evela esikhwameni senkosi eyemithelo yelizwe elingaphetsheya komfula iYufrathi, ukuze umsebenzi uqhubeke.
9Loba kuyini okuswelekayo, izinkunzi lezinqama, loba amawundlu omnikelo wokutshiselwa uNkulunkulu ophezulu, amabele letshwayi lewayini lamafutha njengokufunwa ngabapristi eJerusalema kabakunikwe konke insuku ngensuku kungaphuthi,
10ukuze banikele iminikelo ethokozisayo kuNkulunkulu ophezulu, bakhulekele inkosi lamadodana ayo.
11Futhi ngiyamisa umthetho wokuthi lowo odiliza lesisimemezelo kakuhwatshwe uthungo endlini yakhe, lugxunyelwe ajujwe ngalo; lendlu yakhe yenziwe iquba.
12UNkulunkulu obizo lakhe lizadunyiselwa kuleyondawo achithe inkosi loba abantu abaguqula lokhu, badilize lendlu kaNkulunkulu eseJerusalema. Mina Dariyu, ngiyakumisa lokhu, kakwenziwe konke.
13UTathenayi umbusi welizwe elingaphetsheya kweYufrathi loShethari‐Bozenayi lalabo ababelabo bakwenza konke inkosi uDariyu eyayibalaye khona.
14Abadala babaJuda baqhubeka lomsebenzi wokwakha bekhuthazwa yikutshumayela kukaHagayi umprofethi loZekariya indodana kaIdo. Baqeda ukwakha kwabo njengokulaywa kwabo nguNkulunkulu kaIsrayeli langomthetho kaKurosi loDariyu loAtakisekisi amakhosi asePerisiya.Hag 1:1; Zek 1:1
15Lindlu yaphela ukwakhiwa ngosuku lwesithathu enyangeni kaAdari, ngomnyaka wesithupha wokubusa kukaDariyu inkosi.
16Abantu bakoIsrayeli, abapristi lamaLevi labo bonke ababebuyile ekuthunjweni, bayahlukanisela uNkulunkulu lindlu ngokuthokoza.
17Ekwahlukaniselweni kwayo uNkulunkulu lindlu banikela inkunzi ezilikhulu, lenqama ezingamakhulu amabili, lamawundlu angamakhulu amane; banikelela uIsrayeli wonke umnikelo wesono intondolo ezilitshumi lambili ezilingana lezizwe zakoIsrayeli.
18Bamisa abapristi ngezigaba zabo, lamaLevi ngamaqembu awo, ukuphatha inkonzo kaNkulunkulu eJerusalema, njengokulotshiweyo ogwalweni lukaMose.
19Ngosuku lwetshumi lane lwenyanga yokuqala abantu abasebebuyile ekuthunjweni bagcina iPhasika.Eks 12:1–20
20Ngoba abapristi lamaLevi basebezihlambulule bonke, sebehlambulukile. Babahlabela bonke ababebuyile ekuthunjweni iwundlu lePhasika, babahlabela labanye abapristi, bazihlabela labo.
21Ladliwa ngabakoIsrayeli ababebuyile ekuthunjweni, layibo bonke ababezihlanganise labo, bezehlukanisa lamanyala abantu balelolizwe ukukhonza iNkosi, uNkulunkulu kaIsrayeli.
22Bagcina umkhosi wesinkwa esingelamvubelo insuku eziyisikhombisa ngokuthokoza; ngoba iNkosi yayibenze bathokoza, yaphendulela inhliziyo yenkosi yaseAsiriya kibo, yabasiza emsebenzini wokwakha indlu kaNkulunkulu, uNkulunkulu kaIsrayeli.
Who We AreWhat We EelieveWhat We Do
2025 by iamachristian.org,Inc All rights reserved.
