Tit 3 - Ndebele Bible (iBhayibhili Elingcwele) 1978

1Bakhumbuze ukuba bazehlisele ngaphansi kwababusi leziphathamandla, balalele, balungele imisebenzi yonke emihle,

2bangahlebi muntu, bangabi yizilwi, babe mnene, bahloniphe bonke abantu.

3Ngoba lathi kade sasiyiziphukuphuku, singalaleli, sikhohliswa, sifuywe yizinkanuko lokuzithokozisa okunenginengi, sihlezi ebubini langomhawu, sizondeka ebantwini bonke, sizondana.

4Kodwa lapho sekufikile ukulunga lesihawu sikaNkulunkulu uMsilisi wethu

5wasisilisa, kungesikho ngezenzo zokulunga esazenzayo thina kodwa ngokwesihawu sakhe, ngokugeziswa kokuzalwa kutsha lokuvuselelwa ngoMoya oNgcwele.

6Ngoba wamthela kakhulu phezu kwethu ngoJesu Kristu uMsilisi wethu,

7ukuze silungisiswe ngomusa wakhe, sibe yizindlalifa zokuphila okungapheliyo ngokuthemba.

8Liqinisile lelilizwi. Ngithanda ukuba uqinise impela ngalezizinto, ukuze abakholwa kuNkulunkulu bakhuthalele ukwenza imisebenzi emihle. Lezizinto zinhle zilosizo ebantwini.

9Kodwa imibuzo yobuthutha uyixwaye, lendaba zosendo olokuzalana, lombango, lokuphikisana ngomlayo; ngoba lokho kakusizi, kuyize.

10Umuntu olesifundiso esiduhisayo, eselulekwe kanye lakabili, mdele,

11wazi ukuthi onjalo mubi, uyona, uyazilahla yena.

Isicino

12Nxa sengithume uArtema loba uTikiko kuwe, uphangise uze kimi eNikapoli, ngoba ngizimisele ukuhlala khona ebusika.Seb 20:4; Efe 6:21, 22; Kol 4:7, 8; 2 Tim 4:12

13UZena ummeli loApolo ubakhuthaze ekuhambeni kwabo, ubone ukuba kabasweli lutho.Seb 18:24; 1 Kor 16:12

14Abakithi kabafunde ukukhuthalela imisebenzi emihle, ukuze bakwazi ukusiza abaswelayo, bangabi ngabangelazithelo.

15Bonke abalami bayakubingelela. Bingelela abasithandayo ekukholweni. Umusa kawube lani lonke.