uEzra 3 - Ndebele Bible (iBhayibhili Elingcwele) 1978

Ukwakhiwa kwealtare lokunikelwa kweminikelo

1Lapho isifikile inyanga yesikhombisa, labakoIsrayeli sebehlezi emizini yabo, abantu babuthana eJerusalema njengomuntu munye.

2Kwasuka uJeshuwa indodana kaJozadaki kanye labanye abapristi, loZerubabeli indodana kaSalatiyeli lezihlobo zakhe, bakha ialtare likaNkulunkulu kaIsrayeli ukuba banikele iminikelo yokutshiswa phezu kwalo, njengokulotshiweyo emlayweni kaMose umuntu kaNkulunkulu.Eks 27:1

3Balimisa ialtare endaweni yalo, lanxa babesesaba abantu balelolizwe, banikela eNkosini iminikelo yokutshiswa phezu kwalo ekuseni lantambama.Nani 28:1–8

4Bagcina umkhosi wamadumba njengokulotshiweyo, banikela iminikelo yokutshiswa insuku zonke njengokumiswa kwayo kwensuku ngensuku;Nani 29:12–38

5langaphezu kwaleyo banikela iminikelo yokutshiswa yensuku zonke, leminikelo yasekuthwaseni kwenyanga, layemikhosi yonke emisiweyo yeNkosi, leminikelo yabo bonke abanikela ngesihle eNkosini.Nani 28:11—29:39

6Ngosuku lokuqala lwenyanga yesikhombisa baqalisa ukunikela iminikelo yokutshiswa eNkosini, lanxa izisekelo zethempeli leNkosi zazingakabekwa.

7Banika ababazi bamatshe lababazi bezigodo imali, banika abaseSidoni labaseTire ukudla lokunathwayo lamafutha ukuba balande imikusu eLebanoni bayilethe olwandle eJopha, ngemvumo kaKurosi inkosi yasePerisiya.

Ukwakhiwa kwethempeli kuyaqaliswa

8Ngomnyaka wesibili wokufika kwabo endlini kaNkulunkulu eJerusalema, ngenyanga yesibili, uZerubabeli indodana kaSalatiyeli loJeshuwa indodana kaJozadaki bawuqalisa umsebenzi, besizwa yibo bonke abakoIsrayeli langabapristi lamaLevi, bonke ababebuyile eJerusalema bevela ekuthunjweni. Bakhetha amaLevi aleminyaka engamatshumi amabili kusiya phezulu ukuphatha umsebenzi wethempeli.

9UJeshuwa lamadodana akhe, lezihlobo zakhe loKadimiyeli loBinuwi loHodaviya, bonke baphatha izisebenzi zokwakha indlu kaNkulunkulu.

10Lapho abakhi sebebekile isisekelo sethempeli leNkosi, abapristi beqgoke izambatho zabo bephethe impondo zokukhaliswa basondela kanye lamaLevi, amadodana kaAsafi, elezigubhu ukuba badumise iNkosi, ngendlela eyamiswa nguDavida inkosi yakoIsrayeli.1 Lan 25:1

11Baphendulana ngokuhlabela bedumisa bebonga iNkosi besithi:

Ngoba iNkosi ilungile,

lothando lwayo olungapheliyo lumi kuze kube nininini kuIsrayeli.

Bonke abantu bamemeza kakhulu ekuyidumiseni kwabo iNkosi, ngoba isisekelo sethempeli sasesibekiwe.1 Lan 16:34; 2 Lan 5:13; 7:3; Hubo 100:5; 106:1; 107:1; 118:1; 136:1; Jer 33:11

12Kodwa abanengi babapristi lamaLevi lezinhloko zezindlu, abadala ababeyibonile indlu yokuqala, bakhala kakhulu lapho bebona isisekelo salindlu sesibekiwe; kodwa abanye bamemeza kakhulu ngokuthokoza.

13Abantu babengelakwehlukanisa umsindo wokuthokoza lomsindo wokukhala kwabantu, ngoba baklabalala kakhulu, lomsindo wezwakala khatshana.