Isa 16 - Ndebele Bible (iBhayibhili Elingcwele) 1978

Ukuhlupheka kweMowabi

1AbaseMowabi bayathumela amawundlu kumbusi welizwe,

bewasusa eSela enkangala, aye entabeni yaseZiyone.

2Njengenyoni ezizulazulayo labantwana benyoni abachithekileyo,

banjalo abantu baseMowabi emazibukweni aseArinoni.

3Bathi: Selulekeni, lisiqumele;

lenze isithunzi senu sisivikele emini,

lifihle abaxotshiweyo, lingabanikeli ababalekayo;

4vumelani abaxotshiweyo baseMowabi bahlale phakathi kwenu,

libe yisiphephelo kibo kumchithi.

Lapho engasekho umcindezeli, lokuchitheka sekuphelile,

lonyathezela phansi engasekho elizweni,

5kuzakumiswa isihlalo sobukhosi ngothando olungapheliyo,

kuhlale kiso ngobuqotho ethenteni likaDavida umahluleli

ofuna ukwahlulela lokufaneleyo, lophangisa ukwenza ukulunga.

6AbakoJuda bathi: Sizwile ngokuziphakamisa kukaMowabi ukuthi uzigqaja kangakanani,

sizwile langokuzikhukhumeza kwakhe lokuziqhenya kwakhe,

langokungahloniphi kwakhe,

ukuzincoma kwakhe kuyize.

7Ngakhoke abaseMowabi kabamkhalele uMowabi,

bonke balile kanyekanye,

bakhalele izinkwa ezilezithelo zevini zaseKiri‐Haresethi,

bakhale badabuke kakhulu.

8Ngoba amasimu aseHeshiboni abunile,

kanye lamavini aseSibima;

iwayini elivela kulawomavini lalidakisa amakhosi ezizwe,

ingatsha zawo zazifika eJazeri,

zafinyelela lasenkangala,

futhi zagcwala indawo yonke zaze zawela ulwandle.

9Ngakhoke ngiyakhalela amavini aseSibima,

njengalokhu ngikhalela iJazeri;

ngikuthela ngezinyembezi zami, wena Heshiboni lawe Eleyale;

ngoba phakathi kwezithelo zenu lesivuno senu usuphelile umsindo wabavunayo.

10Ukuthokoza kanye lokujabula kuphelile emasimini,

lasezivinini kakuzwakali ukuhlatshelwa kwengoma,

kakukho lokumemeza kwabathokozayo,

kabakho labanyathela iwayini ezikhamelweni,

lokumemeza kwabavunayo kuphelile.

11Ngakhoke ngiyakhala njengechacho ngoMowabi,

lenhliziyo yami ikhalela iKiri‐Haresethi.

12Kuzakuthi lapho uMowabi esesondela, lapho esezidinisa endaweni ephakemeyo yokukhonzela, lalapho esiza endlini yakhe engcwele ukukhuleka, kayikuphumelela.

13Yilo lelilizwi iNkosi elikhulume ngoMowabi ezikhathini ezidlulileyo.

14Kodwa khathesi iNkosi ithi: Phakathi kweminyaka emithathu elingana leminyaka yoqatshiweyo, udumo lukaMowabi luzadelelwa, lanxa elabantu abanengi; abazasala kibo bazakuba balutshwana kakhulu, bangabi lamandla.