uAmosi 1 - Ndebele Bible (iBhayibhili Elingcwele) 1978

Ukwahlulelwa kwezizwe ezakhelene loIsrayeli

1La ngamazwi kaAmosi owayengomunye wabelusi baseTekowa, awaboniswa ngoIsrayeli ensukwini zikaUziya inkosi yakoJuda, lasensukwini zikaJerobowamu indodana kaJowashi inkosi yakoIsrayeli iminyaka emibili ngaphambi kokuzamazama komhlaba.

2Wathi:

INkosi iyaduma iseZiyone,

izwakalise ilizwi layo iseJerusalema;

amadlelo abelusi atshe,

lezingqonga zeKarmeli zibune.

3INkosi ithi:

Ngenxa yeziphambeko ezinengi zabaseDamaseko kangiyikubayekela,

ngoba babhula iGileyadi ngembulo zensimbi.

4Ngakho ngizathumela umlilo endlini kaHazayeli

ozakuqeda izinqaba zikaBenihadadi.

5Ngizakwaphula imigoqo yamasango aseDamaseko,

ngibaqede abakhileyo esihotsheni saseAveni,

kanye laye obusayo eBeti‐Edeni,

labantu baseSiriya bazathunjelwa eKiri; kutsho iNkosi.

6INkosi ithi:

Ngenxa yeziphambeko ezinengi zabaseGaza kangiyikubayekela,

ngoba bathumba isizwe sonke ukuba basinikele kuEdoma.

7Ngakho ngizathumela umlilo phezu kwemithangala yaseGaza

ozakutshisa izinqaba zalo.

8Ngizakuqeda abakhileyo eAshidodi,

kanye laye obusayo eAshikeloni,

ngiphendukele eEkroni;

labaseleyo bamaFilistiya bazabhubha; kutsho iNkosi uNkulunkulu.

9INkosi ithi:

Ngenxa yeziphambeko ezinengi zabaseTire kangiyikubayekela,

ngoba banikela isizwe sonke kuEdoma,

kabaze bakhumbula isivumelwano sobuzalwane.

10Ngakho ngizathumela umlilo phezu kwemithangala yaseTire

ozakuqeda izinqaba zalo.

11INkosi ithi:

Ngenxa yeziphambeko ezinengi zamaEdoma kangiyikuwayekela,

ngoba axotshana labafowabo ngomkhonto,

aswela isihawu,

lolaka lwawo lwavutha njalonjalo,

ahlala ethukuthela kokuphela.

12Ngakho ngizathumela umlilo phezu kweTemani

ozakuqeda izinqaba zaseBozira.

13INkosi ithi:

Ngenxa yeziphambeko ezinengi zamaAmoni kangiyikuwayekela,

ngoba aqhaqha abesifazana abakhulelwayo eGileyadi,

ukuba andise ilizwe labo.

14Ngakho ngizaphemba umlilo emithangaleni yaseRaba

ozakuqeda izinqaba zalo ngokumemeza osukwini lokulwa,

langesiphepha osukwini lwesivunguzane;

15lenkosi yabo izathunjwa,

yona kanye lezikhulu zayo; kutsho iNkosi.