Hubo 90 - Ndebele Bible (iBhayibhili Elingcwele) 1978

UGWALO LWESINEUNkulunkulu ongapheliyo lokuphela komuntu

1Nkosi, wena uyisiphephelo sethu ezizukulwaneni zonke.

2Zingakaveli intaba,

ungakawenzi umhlaba lelizwe,

kusukela endulo kuze kube nini lanini wena unguNkulunkulu.

3Uyambuyisela umuntu othulini,

uthi: Buyelani, bantwana babantu.

4Ngoba iminyaka eyinkulungwane emehlweni akho

injengezolo selidlulile, lanjengomzuzu ebusuku.

5Wena uyabakhukhula abantu;

banjengephupho, banjengotshani obuhluma ekuseni;

6ekuseni buyahluma, bukhahlele,

ntambama buyasikwa, bubune.

7Ngoba siyaqedwa yikuthukuthela kwakho,

sibhujiswe lulaka lwakho.

8Ubekile iziphambeko zethu phambi kwakho,

lezono zethu ezifihlakeleyo ekukhanyeni kobuso bakho.

9Ngoba insuku zethu zonke ziyaqedwa lulaka lwakho,

leminyaka yethu iphele masinyane njengesilokozane.

10Iminyaka yokuphila kwethu ingamatshumi ayisikhombisa,

kuthi loba siqinile ibe ngamatshumi aficaminwembili;

kanti ibanga layo lingumzamo losizi,

ngoba iphangisa ukuphela, lathi sedlule masinyane.

11Ngubani owaziyo amandla okuthukuthela kwakho na?

owaziyo ukwesabeka kolaka lwakho na?

12Ngakho sifundise ukubala insuku zethu,

ukuba sizuze inhliziyo elokuhlakanipha.

13Buya, Nkosi! Koze kube nini uthukuthela na?

Hawukela inceku zakho.

14Sigcwalise ngothando lwakho olungapheliyo ekuseni,

ukuze sithabe sijabule insuku zethu zonke.

15Sithokozise kube ngangensuku owasihlupha ngazo,

langeminyaka esabona okubi kuyo.

16Izenzo zakho kazibonakale ezincekwini zakho,

lobukhosi bakho ebantwaneni bazo.

17Umusa wakho, Nkosi, Nkulunkulu wethu, kawube phezu kwethu,

uphelelise umsebenzi wonke wezandla zethu.