1Kwathi lapho bebikelwa oSanibalati loTobiya loGeshema umArabiya lazo zonke izitha zethu ukuthi sengiwakhile umduli lokuthi kakulasikhala kuwo, lanxa ngalesosikhathi ngangingakafaki izivalo emasangweni,
2oSanibalati loGeshema bathumela ilizwi kimi besithi: Woza sihlangane komunye wemizi esemagcekeni aseOno. Kodwa babeqonde ukungilimaza.
3Ngathumela izithunywa kubo ngathi: Ngenza umsebenzi omkhulu, ngingeke ngize. Ngizamiselani umsebenzi ukuba ngize kini na?
4Bathuma ilizwi kimi kwaze kwaba kane ngaleyondlela, lami ngabaphendula ngokunjalo.
5Ngokunjalo futhi uSanibalati ngokwesihlanu wathumela kimi inceku yakhe iphethe incwadi evulekileyo,
6elotshwe ukuthi:
Kuzwakele ezizweni, loGeshema uyakuvuma, ukuthi wena labaJuda lifuna ukuhlamuka; yikhonje lisakha umduli; kuthiwa wena ufuna ukuba yinkosi yabo.
7Futhi umisile abaprofethi ukuba bamemezele ngawe eJerusalema, bathi: Kukhona inkosi koJuda. Inkosi izakukuzwa lokhu. Wozake wena, sikhulumisane.
8Ngasengithumela ilizwi kuye ngisithi: Kazikho lezizinto ozitshoyo, uyazicabangela nje.
9Ngoba bonke babefuna ukusethusa, bethemba ukuthi sizayekela umsebenzi, ungabe usenziwa. Lokho kwangikhuthaza, ngaphikelela.
10Kwathi sengingenile endlini kaShemaya indodana kaDelaya kaMehetabeli owayezivalele endlini yakhe, yena wathi: Asihlangane ethempelini, sivale iminyango yalo, ngoba bayeza ukukubulala, bayeza ebusuku.
11Kodwa mina ngathi: Kambe umuntu onjengami angabaleka na? Nguwuphi umuntu onjengami ongangena ethempelini abuye aphile na? Kangiyikuyangena.
12Ngasengibona ukuba uNkulunkulu wayengamthumanga, kodwa wakhuluma lokho ngami ngoba oTobiya loSanibalati babemthengile.
13Babemthengele ukungethusa ukuba ngivume ngenze isono, besebenginika ibizo elibi, bangigcone.
14Ngakhuleka ngathi: Nkulunkulu wami, bakhumbule oTobiya loSanibalati ngalezizinto abazenzileyo, kanye lomprofethikazi uNowadiya labaprofethi bonke ababefuna ukungethusa.
15Kwaphelake ukwakhiwa komduli ngosuku lwamatshumi amabili lanhlanu lwenyanga kaEluli ngemva kwensuku ezingamatshumi amahlanu lambili.
16Kwathi lapho zonke izitha zethu zisizwa ngakho, lazo zonke izizwe ezisizingelezeleyo zikubona, zathi kungumsebenzi omangalisayo; zakubona ukuba lumsebenzi wenziwe ngamandla kaNkulunkulu wethu.
17Ngaso sonke lesosikhathi izikhulu zakoJuda zazilokhu zithumela incwadi ezinengi kuTobiya, laye eziphendula.
18Ngoba abanengi koJuda babehlomulelana laye ngoba wayengumkhwenyana kaShekaniya indodana kaAra, lendodana yakhe uJehohanani wayethethe indodakazi kaMeshulamu indodana kaBerekiya.
19Babehlala bembabaza phambi kwami, bemtshela lezinto engangizitsho. UTobiya laye wayengilobela incwadi zokungethusa.
Who We AreWhat We EelieveWhat We Do
2025 by iamachristian.org,Inc All rights reserved.
