uZefaniya 1 - Ndebele Bible (iBhayibhili Elingcwele) 1978

Usuku lokwahlulela kweNkosi selusondele

1Ilizwi leNkosi lafika kuZefaniya indodana kaKushi, kaGedaliya, kaAmariya, kaHezekiya, ensukwini zikaJosiya indodana kaAmoni inkosi yakoJuda.2 Kho 22:1—23:30; 2 Lan 34:1—35:27

2Lathi:

Ngizaqothula konke kuthi nya emhlabeni, itsho iNkosi;

3ngizaqothula abantu lenyamazana, ngiqothule inyoni zaphezulu lenhlanzi zasolwandle.

Ngizachitha ababi, ngiqede bonke abantu emhlabeni, kutsho iNkosi.

4Ngizaphakamisela isandla sami phezu kukaJuda

laphezu kwabo bonke abakhileyo eJerusalema,

ngiqede konke okuseleyo kukaBali kulindawo

lebizo labapristi bezithombe,

5ngiqede labakhuleka kulo ilanga lenyanga lezinkanyezi phezu kwezindlu,

labakhuleka kimi bangifunge, bafunge futhi loMilkomu,

6labangidelileyo abangangidingiyo, bangabuzi kimi.

7Thula phambi kweNkosi uNkulunkulu!

Ngoba usuku lokwahlulela kwayo selusondele.

INkosi isilungisile umhlatshelo,

yahlambulula labamenyiweyo bayo.

8INkosi ithi: Kuzakuthi ngosuku lomhlatshelo wami ngitshaye izikhulu

lamadodana enkosi labo bonke abagqoka izigqoko zabezizwe.

9Ngalolosuku ngizatshaya bonke abeqayo umbundu womnyango,

labagcwalisa indlu yenkosi yabo ngobubi langenkohliso.

10Ngalolosuku, itsho iNkosi, kuzazwakala ilizwi lokukhala ngaseSangweni leNhlanzi,

lokulila esigabeni sesibili somuzi lokufohloza okukhulu kuzwakala emaqaqeni.

11Khalani, lina elakhe endaweni yokuthengisela,

ngoba bonke abathengisayo kabasekho,

bonke abalinganisa isiliva baphelile.

12Kuzakuthi ngalesosikhathi ngihlole iJerusalema ngezibane,

ngitshaye bonke abantu abazithokozisayo abazithembayo,

abathi enhliziyweni zabo: INkosi kayiyikwenza ulutho.

13Impahla yabo izakuphangwa, lezindlu zabo zidilizwe.

Loba besakha izindlu, kabayikuhlala kuzo,

loba belima izivini, kabayikunatha iwayini lazo.

14Usuku olukhulu lweNkosi selusondele,

luyeza ngokuphangisa;

usuku lweNkosi lulobuhlungu,

iqhawe liyakhala kakhulu kulo.

15Lolosuku lusuku lolaka, usuku lokuhlupheka losizi,

usuku lokuchitheka lokubhidlika,

usuku lomnyama, lolwamayezi, lomnyama omkhulu,

16usuku lokutshaya uphondo lokuhlaba umkhosi wokulwa

ngasemizini ebiyelweyo lasezinqabeni eziphakemeyo.

17Ngizakwehlisela abantu usizi ukuze bahambe njengeziphofu,

ngoba bonile eNkosini;

igazi labo lizakuchithwa njengothuli;

lenyama yabo njengobulongwe.

18Isiliva sabo legolide labo kakuyikuba lamandla okubakhulula ngosuku lolaka lweNkosi.

Wonke umhlaba uzakuqedwa ngumlilo wolaka lwayo lomona wayo;

ngoba izakuqeda, yebo izabajuma ibaqede bonke abakhileyo elizweni.