Hubo 19 - Ndebele Bible (iBhayibhili Elingcwele) 1978

Imisebenzi kaNkulunkulu lomlayo wakhe

1Amazulu ayakhuluma ngobukhulu bukaNkulunkulu,

lomkhathi utshumayela umsebenzi wezandla zakhe.

2Olunye usuku lutshela olunye,

lobunye ubusuku buyatshumayeza obunye ukwazi.

3Kakukho ukukhuluma, kawakho amazwi,

lelizwi lawo kalizwakali;

4kanti ilizwi lawo liphumele emhlabeni wonke,

lamazwi awo aphumele emikhawulweni yomhlaba.

Ulimisele ilanga indawo kuwo,

5elinjengomyeni ephuma endlini yakhe,

njengendoda elamandla lihamba indlela yalo ngokuthokoza.

6Liphuma emikhawulweni yamazulu,

lihambe lize lifike ekupheleni kwawo;

kakukho okungacatshela ukutshisa kwalo.

7Umlayo weNkosi uphelele,

uvuselela umphefumulo;

imilayo yeNkosi iqinisile,

ihlakaniphisa oyisithutha;

8izimiso zeNkosi zilungile,

zithokozisa inhliziyo;

imithetho yeNkosi ihlambulukile,

ivula amehlo.

9Ukuyesaba iNkosi kuhlambulukile,

kumi kuze kube nininini;

izahlulelo zeNkosi ziliqiniso,

zilungile impela.

10Zinxwanelekile kakhulu kulegolide,

yebo igolide elihle;

zimnandi kulenyosi loluju lwezinhlanga.

11Lenceku yakho iyelulekwa ngazo;

ozigcinayo uzakuzuza umvuzo omkhulu.

12Kodwa ngubani owazi iziphosiso zakhe na?

Ngithethelela, Nkosi, kwezisithekileyo.

13Ilondoloze inceku yakho lasezonweni zangabomu;

kazingabusi phezu kwami.

Ng’khona ngizakuba ngopheleleyo,

ngingabi lacala eziphambekweni ezinkulu.

14Amazwi omlomo wami lemicabango yenhliziyo yami kakwamukeleke kuwe, Nkosi,

dwala lami lomhlengi wami.