Heb 1 - Ndebele Bible (iBhayibhili Elingcwele) 1978

UKristu mkhulu kulezithunywa zonke

1UNkulunkulu wakhuluma endulo kubokhokho ngabaprofethi ngamathuba amanengi langezindlela ezinengi.

2Kodwa kulezinsuku zokucina ukhulume kithi ngeNdodana ayimise ibe yindlalifa yezinto zonke, yona adala ngayo futhi umhlaba.

3Yona iyikubenyezela kwenkazimulo kaNkulunkulu, ifuze yena uqobo, iphethe izinto zonke ngelizwi layo lamandla. Lapho isiyenzile ukuhlanjululwa kwezono, yahlala phansi ngakwesokunene soMkhulu phezulu,

4yaba nkulu kulezithunywa, njengalokhu ibizo eliyilifa layo lilikhulu kulelazo.

5Ngoba yisiphi isithunywa uNkulunkulu ake atsho kuso na ukuthi:

Wena uyiNdodana yami,

lamuhla ngikuzele?

Lokuthi:

Ngizakuba nguyise kiyo,

yona ibe yindodana kimi?

6Futhi mhla eletha olizibulo emhlabeni uthi:

Lezithunywa zonke zikaNkulunkulu kazimkhonze.

7Ngezithunywa uthi:

Owenza izithunywa zakhe zibe yimimoya,

lezinceku zakhe zibe ngamalangabi omlilo.

8Kodwa ngeNdodana uthi:

Isihlalo sakho sobukhosi, Nkulunkulu, simi kuze kube nininini,

intonga yokulunga iyintonga yombuso wakho.

9Uthandile ukulunga, wazonda ububi;

ngakhoke uNkulunkulu, uNkulunkulu wakho ukwenze waba mkhulu

kulabanakwenu ngokukugcoba ngamagcoba entokozo.

10Lokuthi:

Wena Nkosi, wabeka isisekelo somhlaba ekuqaleni,

amazulu angumsebenzi wezandla zakho.

11Kuzakubhubha lokho, kodwa wena umi njalonjalo;

kuzakuguga konke njengengubo;

12njengesambatho uzakukugoqa; kuzakuphendulwa njengengubo.

Kodwa wena nguwe njalo, iminyaka yakho kayizukuphela.

13Kukusiphi isithunywa ake atsho kuso na ukuthi:

Hlala ngakwesokunene sami,

ngize ngenze izitha zakho zibe yisigcabha senyawo zakho?

14Kazisibo yini zonke omoya abasebenzayo abathunyelwe ukukhonza ngenxa yalabo abazakudla ilifa lokusiliswa na?