Jer 15 - Ndebele Bible (iBhayibhili Elingcwele) 1978

Ukuthukuthela kweNkosi ngoJuda

1INkosi yasisithi kimi: Loba bekumi phambi kwami oMose loSamuweli, inhliziyo yami yayingeke iphendukele kulababantu. Basuse phambi kwami, bahambe!

3Ngizabamisela inhlobo ezine zababulali, kutsho iNkosi, ngitsho umkhonto wokubulala, izinja zokubabamba, inyoni zaphezulu, lenyamazana zeganga zokubadla lokubabhubhisa.

4Ngizakubenza ukuba babe yinto eyesabekayo kuyo yonke imibuso yomhlaba, ngenxa yalokho okwenziwa eJerusalema nguManase indodana kaHezekiya, inkosi yakoJuda.

5Ngubani ozakukuhawukela, wena Jerusalema, lozakukukhalela na?

Ngubani ozaphambukela eceleni ukubuza ngempilo yakho na?

6Wena ungilahlile, kutsho iNkosi, wabuyela emuva;

ngalokhoke ngikuphakamisele isandla sami, ngakuchitha;

sengikhathele ukubekezela.

7Ngibelile ngesitsha sokwela emizini yelizwe;

ngabamuka abantwana, ngababhubhisa abantu bami;

ngoba kabaphendukanga endleleni zabo.

8Ngandisile abafelwakazi baba banengi ukwedlula itshebetshebe lolwandle,

ngehlisela phezu kwabonina bamajaha umbulali emini;

ngenza usizi lokwesaba kwehlela phezu kwabo bengananzeleli.

9Owazala abayisikhombisa usekhathele, waqaleka;

watshonelwa lilanga kusesemini;

waba lenhloni, wayangeka.

Abaseleyo ngizabanikela ezitheni zabo ukuze babulawe, kutsho iNkosi.

Ukusola kukaJeremiya

10Maye mina, maye ngomama! ngoba wangizala ngaba ngumuntu wokuphikisana lokuxabana kulo lonke ilizwe. Kangebolekisanga ngalutho, futhi kangebolekanga lutho, kodwa bonke bayangithuka.

11Nkosi, zonke iziqalekiso zakho kazigcwaliseke uba ngingakukhonzanga ngokupheleleyo, ngingazincengelanga kuwe izitha zami ngesikhathi sokuhlupheka kwazo lesosizi lwazo.

12Umuntu angayephula insimbi, insimbi evela enyakatho kanye lethusi na?

13Ngizanikela imfuyo yakho lenotho yakho ibe yimpango engabizi mali, ngenxa yezono zakho zonke ezigcwele kulo lonke ilizwe lakini.

14Ngizakukwenza ukuba usebenzele zonke izitha zakho elizweni ongalaziyo, ngoba ekuthukutheleni kwami kuphembeke umlilo ozavutha kuze kube nininini.

15Uyazi, wena Nkosi;

ngikhumbula, ungihambele, ungiphindiselele kwabangihluphayo.

Ngoba ulokubekezela, ungangisusi;

yazi ukuthi ngenxa yakho ngithwele ukuthukwa.

16Ekufikeni kwamazwi akho ngawadla.

Ngathokoza ngamazwi akho, futhi athokozisa inhliziyo yami;

ngoba ngabizwa ngebizo lakho, Nkosi, uNkulunkulu wamabandla.

17Kangihlalanga emihlanganweni yabazithokozisayo,

futhi kangijabulanga;

ngahlala ngedwa nje, ngoba isandla sakho sasiphezu kwami,

ngoba ungigcwalise ngokuthukuthela.

18Kungani ubuhlungu bami bungapheli,

lamanxeba ami engapholi, elapheke na?

Uzakuba njengesifula esikhohlisayo kimi,

lanjengamanzi angathembekanga na?

19Ngakhoke kutsho iNkosi, uba ubuya, ngizakukwamukela ungisebenzele.

Uba ukhuluma okuhle, ungakhulumi okubi,

uzakuba njengomlomo wami.

Bazakuza kuwe, kodwa wena kawuyikuya kubo.

20Ngizakukwenza ukuba ube ngumduli wethusi oqinileyo kulababantu;

bazakulwa lawe, kodwa kabayikukwahlula,

ngoba ngilawe ukukusiza lokukukhulula, kutsho iNkosi.

21Ngizakukukhulula esandleni sababi,

ngikophule ezandleni zabalesihluku.