Eks 12 - Ndebele Bible (iBhayibhili Elingcwele) 1978

Ukumiswa komkhosi wePhasika

1INkosi yakhuluma kuMose loAroni elizweni laseGibithe,Levi 23:5; Nani 9:1–5; 28:16; Dute 16:1, 2

2yathi: Kini linyanga kayibe ngeyokuqala ezinyangeni, ibe yinyanga yokuqala emnyakeni.

3Khulumani kulo lonke ibandla lakoIsrayeli lithi: Ngosuku lwetshumi lwalinyanga bonke abantu kabathathe iwundlu loba izinyane ngokwemizi yabo kube iwundlu loba izinyane ngomuzi.

4Uba abomuzi bebalutshwana bengalaneli iwundlu, loba izinyane, uzalithatha lomakhelwane oseduze ngokulingene labantu lanjengobunengi bokudla okuzasweleka komunye lomunye umuntu.

5Kalingabi lasici, libe ngeliduna elilomnyaka munye; lithatheni ezimvini loba ezimbuzini.

6Liligcine kuze kufike usuku lwetshumi lane lwenyanga leyo, lapho lonke ibandla lakoIsrayeli lizakuhlaba amawundlu lamazinyane kusihlwa.

7Bazakuthatha igazi, balininde ensikeni zombili zomnyango lasemgubazini womnyango ezindlini abazakuwadlela kuzo.

8Ngalobobusuku bazakudla inyama eyosiwe ngomlilo kanye lesinkwa esingelamvubelo lemibhida ebabayo.

9Lingalidli liluhlaza ingabe liphekwe ngamanzi, kodwa losiwe ngomlilo, ikhanda lalo kanye lemilenze yalo lemibilini yalo.

10Lingatshiyi lutho lwalo kuze kube sekuseni, kodwa okusalayo kakutshiswe ngomlilo.

11Libokudla, inkalo zenu zibotshiwe, izicathulo zisenyaweni zenu lezindondolo zenu zisezandleni zenu; lidle ngokuphangisa; kuliPhasika leNkosi.

12Ngoba ngalobobusuku ngizadabula phakathi kwelizwe laseGibithe, ngibulale wonke amazibulo aselizweni lelo, awabantu lawezinkomo, ngahlulele bonke onkulunkulu baseGibithe. NgiyiNkosi.

13Igazi lizakuba luphawu ezindlini lapho likhona; nxa ngibona igazi ngizakulidlula, kungehleli kini inhlupheko yokulibulala mhla ngichitha ilizwe laseGibithe.

14Usuku lolu luzakuba yisikhumbuzo kini; lugcineni lube ngumkhosi weNkosi ngokomthetho kuzo zonke izizukulwana zenu kuze kube nininini.Eks 23:15; 34:18; Levi 23:6–8; Nani 28:17–25; Dute 16:3–8

15Lizakudla isinkwa esingelamvubelo insuku eziyisikhombisa. Ngosuku lokuqala khuphani imvubelo ezindlini zenu; ngoba odla isinkwa esivutshelweyo kusukela osukwini lokuqala kuze kufike usuku lwesikhombisa uzakukhutshwa phakathi kwabakoIsrayeli.

16Ngosuku lokuqala kuzakuba khona inkonzo enkulu, kube khona langosuku lwesikhombisa inkonzo enkulu; lingasebenzisi lutho ngalezonsuku, kuphela ukulungisa ukudla kwabantu.

17Ngakhoke kalibogcina umkhosi wesinkwa esingelamvubelo; ngoba ngalolosuku ngikhuphile izimpi zenu eGibithe. Kalibogcina lolosuku ngokomthetho kuzo zonke izizukulwana zenu kuze kube nini lanini.

18Kusukela osukwini lwetshumi lane lwenyanga yokuqala kusihlwa lizakudla isinkwa esingelamvubelo, kuze kufike usuku lwamatshumi amabili lanye lwenyanga kusihlwa.

19Kakungafunyaniswa ezindlini zenu imvubelo insuku eziyisikhombisa; ngoba odla okuvutshelweyo uzakukhutshwa ebandleni lakoIsrayeli, loba engowemzini loba engowokuzalwa elizweni.

20Lingadli okuvutshelweyo; emizini yenu yonke lidle isinkwa esingelamvubelo.

21UMose wasebiza bonke abalisa bakoIsrayeli, wathi kubo: Hambani lizidingele amawundlu ngemizi yenu, lihlabe iPhasika,

22lithathe ihisope, liyicwilise egazini elisemganwini, lininde umgubazi lensika zombili zomnyango ngegazi elisemganwini; kakungaphumi muntu endlini yakhe kuze kube sekuseni.

23Ngoba iNkosi izadabula ilizwe ukuba ibulale amaGibithe; nxa ibona igazi emgubazini lasensikeni zombili zomnyango, izakudlula lowomnyango ingavumeli umbulali ukuba angene ezindlini zenu ukulibulala.Heb 11:28

24Lizakugcina lokhu kube ngumthetho kini lakuwo amadodana enu kokuphela.

25Kuzakuthi lapho lifika elizweni iNkosi ezakulinika lona njengesithembiso sayo, ligcine linkonzo.

26Kuzakuthi lapho abantwana benu besithi: Iyini linkonzo na?

27lithi: Ingumhlatshelo wePhasika leNkosi; ngoba yedlula izindlu zabakoIsrayeli eGibithe mhla ibulala amaGibithe, yazitshiya izindlu zethu. Abantu bakhothama, badumisa.

28AbakoIsrayeli basuka, bayakwenza njalo, njengalokhu iNkosi ibalayile oMose loAroni.

Ukubulawa kwamazibulo amaGibithe

29Kwathi phakathi kobusuku iNkosi yabulala wonke amazibulo eGibithe, kusukela kulo izibulo likaFaro owayehlezi esihlalweni sobukhosi kuze kube kulo izibulo lesibotshwa esasisentolongweni, lamazibulo wonke enkomo.Eks 4:22–31

30UFaro wasevuka ebusuku, yena lenceku zakhe zonke lamaGibithe wonke. Kwaba khona ukukhala okukhulu eGibithe, ngoba kwakungekho ndlu lapho kungafanga muntu khona.

31Ebusuku wababiza oMose loAroni, wathi: Vukani, lisuke ebantwini bami lina labakoIsrayeli, lihambe liyekhonza iNkosi njengokutsho kwenu.

32Thathani izimvu zenu lezinkomo zenu njengokutsho kwenu, lihambe; futhi lingibusise lami.

33AmaGibithe ayebakhuthaza abantu ukuba baphume elizweni ngokuphangisa, ngoba athi: Thina sonke sifile.

34Abantu bathatha inhlama yabo ingakavutshelwa, betshata imiganu yabo yokuxovela izinkwa igoqelwe engutsheni zabo.

35Abantu bakoIsrayeli benza njengelizwi likaMose; bacela kumaGibithe izinto zesiliva lezinto zegolide lezigqoko.Eks 3:21, 22

36INkosi yabenzela umusa kumaGibithe, abanika lokho abakucelayo. Ngalokho bawaphundla amaGibithe.

AbakoIsrayeli basuka eGibithe

37AbakoIsrayeli basuka eRamesesi besiya eSukothi. Amadoda azinkulungwane ezingamakhulu ayisithupha ngaphandle kwabantwana labesifazana bahamba ngenyawo.

38Kwakhuphuka labo ixuku lenhlobonhlobo zabantu, kanye lezimvu lezinkomo, izifuyo ezinengi.

39Bapheka izinkwa ezingelamvubelo ngenhlama ababephume layo eGibithe ingavutshelwanga, ngoba baxotshwa ngokuphangisa eGibithe, bengaselasikhathi sokuzilungisela umphako.

40AbakoIsrayeli babehlale eGibithe iminyaka engamakhulu amane lamatshumi amathathu.Gen 15:13; Gal 3:17

41Emva kweminyaka engamakhulu amane lamatshumi amathathu, ngalona lolosuku zonke izimpi zeNkosi zaphuma eGibithe.

42Kwaba yibusuku iNkosi eyalinda ngabo ukuba ibakhuphe eGibithe; yilobubusuku obuzakugcinelwa iNkosi yibo bonke abakoIsrayeli zonke izizukulwana zabo.

Imithetho yePhasika

43INkosi yathi kuboMose loAroni: Nanku umthetho wePhasika. Owezizwe kangalidli;

44kodwa zonke izigqili ezithengwa ngumuntu ngemali kazilidle nxa zisokiwe.

45Owezizwe loqatshiweyo bangalidli.

46Lizakudlelwa endlini ibenye; ungayikhupheli phandle kwendlu inyama yalo, ungaphuli thambo lalo.Nani 9:12; Joha 19:36

47Lonke ibandla lakoIsrayeli kaligcine umkhosi.

48Uba kukhona owemzini ohlala lani othanda ukugcina iPhasika leNkosi, kabasokwe bonke abesilisa bakibo, ukuze asondele aligcine, abe njengowokuzalwa elizweni; kodwa ongasokwanga angalidli.

49Umlayo kawube munye kowokuzalwa elizweni lakowemzini ohlala phakathi kwenu.

50Benza njalo bonke abakoIsrayeli, njengalokhu iNkosi yayibalayile uMose loAroni.

51Ngalona lolosuku iNkosi yabakhupha abakoIsrayeli elizweni laseGibithe ngezimpi zabo.