Eks 40 - Ndebele Bible (iBhayibhili Elingcwele) 1978

Ukumiswa kweTabernakeli lokwahlukaniselwa kwalo

1INkosi yakhuluma kuMose

2yathi: Ngosuku lokuqala lwenyanga yokuqala uzakulimisa iTabernakeli lethente lokuhlangana,

3ufake kulo umtshokotsho wobufakazi, usithe umtshokotsho ngeveli.

4Ungenise itafula, uhlele izinto eziphezu kwayo; ungenise uluthi lwesibane, ufake izibane zalo.

5Ubeke ialtare legolide lempepha phambi komtshokotsho wobufakazi, ulengise iveli lomnyango weTabernakeli.

6Ubeke ialtare lomnikelo wokutshiswa phambi komnyango weTabernakeli lethente lokuhlangana,

7ubeke umkolo phakathi kwethente lokuhlangana lealtare, uthele kuwo amanzi.

8Umise iguma inxa zonke, ulengise iveli lomnyango weguma.

9Uthathe amagcobo okugcoba, ugcobe iTabernakeli lakho konke okukulo, ulahlukanisele kanye lempahla yalo yonke, libe ngcwele.

10Ugcobe ialtare lomnikelo wokutshiswa lezinto zalo zonke, ulahlukanisele ialtare libe ngcwele kakhulu.

11Ugcobe umkolo lenyawo zawo, uwahlukanisele.

12Ng’khona uzakuletha uAroni lamadodana akhe emnyango wethente lokuhlangana, ubagezise ngamanzi.

13Wambathise uAroni izambatho ezingcwele, umgcobe, umahlukanisele ukuba abe ngumpristi wokuphatha umsebenzi wami.

14Ulethe amadodana akhe, uwambathise amabhatshi,

15uwagcobe njengalokhu ugcobile uyise, ukuba abe ngabapristi bokuphatha umsebenzi wami; ukugcotshwa kwabo kuzakuba kubo ubupristi obungapheliyo kuzo zonke izizukulwana zabo.

16UMose wakwenza konke njengokutsho kweNkosi.

17Kwathi ngosuku lokuqala lwenyanga yokuqala ngomnyaka wesibili iTabernakeli lamiswa.

18UMose walimisa iTabernakeli; wabeka phansi inyawo zalo, wamisa amapulanka alo, wafaka imithando yalo, wamisa lensika zalo.

19Wendlala ithente phezu kweTabernakeli, wabeka isifulelo sethente phezu kwalo, njengokutsho kweNkosi kuMose.

20Wathatha ubufakazi, wabufaka emtshokotshweni, wafaka imijabo emtshokotshweni lesihlalo somusa phezu komtshokotsho.

21Wangenisa umtshokotsho eTabernakelini, wamisa iveli elilikhetheni ukuba asithe umtshokotsho wobufakazi, njengokutsho kweNkosi kuye.

22Wafaka itafula ethenteni lokuhlangana, ohlangothini lweTabernakeli olungasenyakatho phandle kweveli,

23walungisa isinkwa phezu kwayo phambi kweNkosi, njengokutsho kweNkosi kuye.

24Wangenisa uluthi lwesibane ethenteni lokuhlangana, maqondana letafula ohlangothini olungaseningizimu.

25Wabeka izibane phambi kweNkosi, njengokutsho kweNkosi kuye.

26Wafaka ialtare legolide ethenteni lokuhlangana phambi kweveli,

27watshisa kulo impepha yamakha amahle, njengokutsho kweNkosi kuye.

28Walengisa iveli lomnyango weTabernakeli.

29Wabeka ialtare lomnikelo wokutshiswa ngasemnyango weTabernakeli lethente lokuhlangana, wanikela kulo umnikelo wokutshiswa lomnikelo wempuphu, njengokutsho kweNkosi kuye.

30Wabeka umkolo phakathi kwethente lokuhlangana lealtare, wathela kuwo amanzi okugeza.

31UMose loAroni lamadodana akhe bagezela kuwo izandla lenyawo zabo;

32nxa bengena ethenteni lokuhlangana lanxa besondela ealtareni babegeza, njengokutsho kweNkosi kuye.

33Walungisa iguma lazingelezela iTabernakeli lealtare, walengisa iveli lomnyango weguma. UMose wasewuqeda umsebenzi.

Iyezi laliphezu kweTabernakeli

34Iyezi laselisibekela ithente lokuhlangana, inkazimulo yeNkosi yagcwalisa iTabernakeli. 1 Kho 8:10, 11; Isa 6:4; Hez 43:4, 5; Isam 15:8

35UMose wayengalakungena ethenteni lokuhlangana, ngoba iyezi lahlala phezu kwalo lenkazimulo yeNkosi yagcwalisa iTabernakeli.

36Ekuhambeni kwabo konke kwakuthi lapho iyezi lisuka phezu kweTabernakeli, abakoIsrayeli baqhubekela phambili,

37kodwa lapho iyezi lingasukanga, babengahambi kuze kufike usuku lokusuka kwalo.

38Ngoba ekuhambeni kwabo konke indlu yonke yakoIsrayeli yalibona iyezi leNkosi liphezu kweTabernakeli emini, lomlilo ukulo ebusuku.