Jer 10 - Ndebele Bible (iBhayibhili Elingcwele) 1978

Izithombe zingonkulunkulu bamanga; yiNkosi kuphela enguNkulunkulu

1Zwanini ilizwi iNkosi elikhuluma kini, lina ndlu kaIsrayeli.

2INkosi ithi: Lingayifundi indlela yabezizwe,

lingatshaywa luvalo ngezibonakaliso zaphezulu,

ngoba bona abezizweni bayazesaba;

3izithombe zabezizwe ziyize.

Ngoba kuganyulwa isihlahla ehlathini,

sibazwe ngehloka lombazi;

4abantu basicecisa ngesiliva langegolide,

basibethela ngesando lezipikili ukuze singasuki.

5Izithombe zabo zinjengezinto zokwethusa emasimini,

kazikhulumi, futhi ziyathwalwa, ngoba kazihambi;

lingazesabi, ngoba kazilamandla okwenza okubi,

lokuhle kazilakukwenza.

6Kakho onjengawe, Nkosi, ngoba umkhulu,

lebizo lakho likhulu kakhulu.

7Ngubani ongaze wakwesaba, wena Nkosi yezizwe?

ngoba ufanele ukwesatshwa.

Phakathi kwabahlakaniphileyo bonke bezizwe,

lakuyo yonke imibuso yabo, kakho onjengawe.

8Bonke bayizithutha leziphukuphuku;

izithombe zesigodo zingabafundisa ulutho na?

9Isiliva esikhandiweyo sivela eTarshishi,

legolide livela eOfiri.

Ukwenza izithombe kungumsebenzi wesisebenzi lowezandla zomkhandi,

zigqokiswe okuluhlaza lokuyibubende;

konke kungumsebenzi wezingcitshi.

10Kanti iNkosi inguNkulunkulu weqiniso,

inguNkulunkulu ophilayo leNkosi engelakuphela.

Ekuthukutheleni kwayo umhlaba uyazamazama,

lezizwe kazilakukumela ukufutheka kwayo.

11Tshono kubo uthi: Onkulunkulu abangenzanga iphezulu lomhlaba bazabhubha emhlabeni langaphansi kwezulu.

12UNkulunkulu wawenza umhlaba ngamandla akhe,

walimisa ilizwe ngokuhlakanipha kwakhe,

langokuqedisisa kwakhe walendlala iphezulu.

13Lapho ekhupha ilizwi lakhe, amanzi ayahlokoma phezulu;

uyakhupha inkungu emikhawulweni yomhlaba,

enze imibane iphazime lapho lisina,

akhuphe umoya eziphaleni zakhe.

14Bonke abantu bayizithutha, kabalakwazi;

wonke umkhandi uyangiswa yizithombe zakhe,

ngoba izithombe zakhe ziyinkohliso, kazilamphefumulo.

15Ziyize nje, zingumsebenzi wenkohliso;

ngesikhathi sokutshaywa kwazo ziyabhubha.

16UNkulunkulu kaJakobe kanjengazo,

ngoba nguye owadala zonke izinto,

isizwe sakoIsrayeli yiso asikhethayo;

ubizwa ngokuthi yiNkosi yamabandla.

Ukuchitheka kwelakoJuda

17Qoqa impahla yakho, wena ovinjezelweyo.

18Ngoba iNkosi ithi:

Khangela, ngiyabaphosela ngaphandle abakhileyo elizweni ngalesisikhathi;

ngizabacindezela baphele nya.

19Maye mina ngenxa yokulimala kwami!

Inxeba lami libi.

Kodwa ngathi mina: Lokhu kuyinhlupheko yami engifanele ukuyithwala.

20Ithente lami lidilikile,

lezintambo zalo zonke ziqamukile;

abantwana bami basukile kimi, kabasekho;

kakho ongangimisela ithente lami futhi,

longalengisa amaveli alo.

21Abelusi babantu bayiziphukuphuku, kababuzanga eNkosini;

ngakho kabaphumelelanga, lemihlambi yabo ihlakazekile.

22Kulamahungahunga okuthi kukhona ukuzamazama okukhulu

okusuka elizweni lasenyakatho,

okuzakwenza yonke imizi yakoJuda ibe yinkangala lendawo yamakhanka.

23Ngiyazi, Nkosi, ukuthi ukuphila komuntu kakukho emandleni akhe,

umuntu kalamandla ukuqondisa ukuhamba kwakhe.

24Siqondisa, wena Nkosi, kodwa kube ngokufaneleyo,

kungabi ngolaka lwakho, funa usenze sibe yinto engesilutho.

25Yehlisela ulaka lwakho phezu kwezizwe ezingakwaziyo,

laphezu kwabantu abangakhuleki ebizweni lakho;

ngoba bamdlile uJakobe, bamdlile bamqeda,

bawuchitha umuzi wakhe.