Eks 27 - Ndebele Bible (iBhayibhili Elingcwele) 1978

Ialtare eleminikelo yokutshiswa

1Uzakwenza ialtare ngesihlahla somvagazi, ubude balo bube zingalo ezinhlanu, ububanzi balo bube zingalo ezinhlanu, lilingane inxa zonke, ukudepha kwalo kube zingalo ezintathu.Eks 38:1–7

2Uzakwenza impondo zalo engonsini zalo zozine, ukuba lona lempondo zalo kube yintonye kanye lalo; ulibhade ngethusi.

3Wenze izimbiza zokususa umlotha walo, lamafotsholo alo, lemiganu yalo yokuchela, lamafolokwe alo, lezitsha zalo zokuthwala umlilo, uzenze zonke izinto zalo ngethusi.

4Ulenzele isihlengo sethusi esinjengembule, wenze phezu kwalo amasongo amane ethusi ngasengonsini zalo;

5usibeke ngaphansi komphetho wealtare ukuba imbule lilenge lifinyelele phakathi kwealtare.

6Ulenzele ialtare imijabo yesihlahla somvagazi, uyibhade ngethusi;

7imijabo ifakwe emasongweni ukuba ibe sezinhlangothini zombili zealtare nxa lithwalwa.

8Ulenze ngamapulanka, lifane lomkolo, libe njengalokho watshengiswa entabeni.

Iguma leTabernakeli

9Uzakwenza iguma leTabernakeli, libe sohlangothini olungaseningizimu lamakhetheni elembu elihle lentambo ephothiweyo, ubude bawo bube zingalo ezilikhulu ohlangothini lunye;Eks 38:9–20

10insika zawo ezingamatshumi amabili lenyawo zazo ezingamatshumi amabili zibe ngezethusi, kodwa ingwegwe zezinsika lezibopho zazo zibe ngezesiliva.

11Ohlangothini olungasenyakatho kakube lamakhetheni, ubude bawo bube zingalo ezilikhulu, lensika zawo ezingamatshumi amabili lenyawo zazo ezingamatshumi amabili zibe ngezethusi, kodwa ingwegwe zezinsika lezibopho zazo zibe ngezesiliva.

12Ohlangothini olungasentshonalanga, ebubanzini beguma, kakube khona amakhetheni, ububanzi bawo bube zingalo ezingamatshumi amahlanu, kube khona lensika ezilitshumi lenyawo ezilitshumi.

13Ububanzi beguma lohlangothi olungasempumalanga bube zingalo ezingamatshumi amahlanu.

14Amakhetheni olunye uhlangothi lomnyango abe yizingalo ezilitshumi lanhlanu, kanye lensika ezintathu lenyawo ezintathu;

15lakolunye uhlangothi amakhetheni abe yizingalo ezilitshumi lanhlanu, kanye lensika ezintathu lenyawo ezintathu.

16Umnyango weguma uzakuba leveli, ubude balo bube zingalo ezingamatshumi amabili, lenziwe ngelembu elihle lentambo ephothiweyo eluhlaza leyibubende lebomvu, kube ngumsebenzi womthungi; lizakuba lensika ezine kanye lenyawo ezine.

17Zonke insika zeguma kazibe lezibopho zesiliva, ingwegwe zazo zibe ngezesiliva lenyawo zazo zibe ngezethusi.

18Ubude beguma bube zingalo ezilikhulu, ububanzi bube zingalo ezingamatshumi amahlanu, ukudepha kube zingalo ezinhlanu, libe lamaveli elembu elihle lentambo ephothiweyo lenyawo zethusi.

19Zonke izinto zomsebenzi weTabernakeli lezikhonkwane zalo zonke kanye lazo zonke izikhonkwane zeguma zizakuba ngezethusi.

20Uzakubalaya abakoIsrayeli ukuba bakulethele amafutha amahle amaoliva elungiselwe ukukhanyisa, ukuze izibane zivuthe insuku zonke.Levi 24:1–4

21Ethenteni lokuhlangana ngaphandle kweveli eliphambi kobufakazi, uAroni lamadodana akhe bazakuzilondoloza phambi kweNkosi, kusukela kusihlwa kuze kube sekuseni; kuzakuba yisimiso esingapheliyo esizagcinwa ngabakoIsrayeli ezizukulwaneni zonke.