Hez 26 - Ndebele Bible (iBhayibhili Elingcwele) 1978

Ilizwi leNkosi ngeTire

1Kwathi ngomnyaka wetshumi lanye, osukwini lokuqala lwenyanga yokuqala, ilizwi leNkosi lafika kimi lathi:

2Ndoda, iTire litshilo ngeJerusalema ukuthi:

Iya! isango lezizwe selidilikile, langivulekela,

sengizakunotha lokhu selichithekile.

3Ngalokhoke iNkosi uNkulunkulu ithi:

Ngimelene lawe, wena Tire,

ngizakulethela izizwe ezinengi

njengolwandle luletha amavinqo alo.

4Zizadiliza imiduli yaseTire,

zibhidlizele phansi inqaba zalo.

Ngizakhukhula umhlabathi walo,

ngilenze libe lidwala elingelalutho.

5Lizakuba yindawo yokuchayela amambule phakathi kolwandle,

ngoba ngikhulumile, kutsho iNkosi uNkulunkulu.

Lizakuba yimpango yezizwe,

6lamadodakazi alo phakathi kwelizwe azabulawa ngomkhonto.

Ng’khonake bazakwazi ukuba ngiyiNkosi.

7INkosi uNkulunkulu ithi: Ngizaletha eTire uNebukadineza inkosi yaseBabiloni, ivela enyakatho, eyinkosi yamakhosi, elamabhiza lenqola zokulwa, labagadi bamabhiza, lexuku elikhulu lamabutho.

8Yena uzabulala amadodakazi akho phakathi kwelizwe ngempi,

akumisele umduli wokuvimbezela,

akwakhele idundulu,

akuphakamisele izihlangu ezinengi.

9Uzaqondisa izigodo zakhe zokudiliza emidulini yakho,

adilizele phansi inqaba zakho ngamahloka akhe.

10Ngenxa yobunengi bamabhiza akhe uthuli lwawo luzakukusibekela,

lemiduli yakho izanyikinywa ngumsindo wabagadi bamabhiza lowezinqola zokulwa,

nxa engena emasangweni akho njengomuntu ofohlela emzini.

11Uzanyathela indlela zakho ngamasondo amabhiza akhe,

abulale abantu bakho ngomkhonto,

lensika zakho eziqinileyo ziwele phansi.

12Bazaphanga inotho yakho,

bathathe impahla yakho ethengiswayo,

badilizele phansi imiduli yakho,

babhidlize izindlu zakho ezinhle,

baphosele emanzini amatshe akho,

lezigodo zakho lomhlabathi wakho.

13Ngizaqeda ukuhlatshelwa kwengoma zakho,

lokukhala kwamachacho akho kakusayikuzwakala futhi.

14Ngizakukwenza ube lidwala elingelalutho,

indawo yokuchaya amambule,

ungaphindi wakhiwe futhi;

ngoba mina Nkosi ngikhulumile,

kutsho iNkosi uNkulunkulu.

15INkosi uNkulunkulu ithi kulo iTire: Kawayikuthuthumela yini amazwe angasolwandle ngomdumo wokuwa kwakho, lapho abagwaziweyo bebubula labafayo besifa phakathi kwakho na?

16Ng’khonake zonke izikhulu zangasolwandle zizakwehla ezihlalweni zazo zobukhosi, zikhumule izingubo zazo, zikhuphe izambatho zazo ezicecisiweyo; zigcwale ukuthuthumela, zihlale phansi zithuthumele isikhathi sonke, zimangale zonke.