Zek 14 - Ndebele Bible (iBhayibhili Elingcwele) 1978

Usuku lokwahlulela kweNkosi

1Luyeza usuku lokwahlulela kweNkosi, lapho impango ethethwe kuwe izakwahlukaniswa phakathi kwakho.

2INkosi izabuthanisa zonke izizwe ukuba zilwe leJerusalema, umuzi uzathathwa lezindlu ziphangwe, kudlwengulwe abesifazana; kuthunjwe ingxenye yomuzi, kodwa abantu abaseleyo emzini kabayikubulawa.

3INkosi izaphuma, ilwe lalezozizwe njengasekulweni kwayo ngosuku lokulwa.

4Ngalolosuku inyawo zayo zizakuma entabeni ethiwa yiOliveti emaqondana leJerusalema ngasempumalanga; intaba iOliveti izadabuka phakathi kuvele isigodi esikhulu kusukela empumalanga kusiya entshonalanga, ingxenye yentaba izatshedela enyakatho, lengxenye itshedele eningizimu.

5Isihotsha esiphakathi kwezintaba sizavaleka, ngoba isihotsha esitsha phakathi kwezintaba sizafinyelela eceleni kwaso. Lizabaleka njengalokho labalekela ukunyikinyeka komhlaba ensukwini zikaUziya inkosi yakoJuda. INkosi uNkulunkulu wami ibisifika ilabo bonke abangcwele bayo.

6Ngalolosuku kakuyikuba khona umqando longqoqwane.

7Kuzakuba yimini kokuphela eyaziwa yiNkosi, kungabi lamini labusuku, ngoba kuzakuthi kusihlwa kube khona ukukhanya.

8Ngalolosuku amanzi agobhozayo azaphuma eJerusalema, ingxenye yawo igelezele olwandle lwasempumalanga, lengxenye yawo igelezele olwandle lwasentshonalanga, igeleza ehlobo lasebusika.

9INkosi izakuba yinkosi yomhlaba wonke; ngalolosuku iNkosi izakubanye lebizo layo libe linye.

10Lonke ilizwe lizaphenduka igceke kusukela eGeba kuze kube seRimoni ngaseningizimu kweJerusalema. Kodwa iJerusalema lizasala liphakeme endaweni yalo, ligcwele abantu kusukela eSangweni lakoBenjamini kuze kube sendaweni yesango lakuqala, isango laseGonsini, kusukela eMphotshongweni kaHananeli kuze kube sezikhamelweni zewayini zenkosi.

11Kuzahlalwa kilo, kungabe kusaba khona isiqalekiso; iJerusalema lizahlala lilondolozekile.Isam 22:3

12Nansi isifo iNkosi ezakusehlisela bonke abantu abahlasela iJerusalema; inyama yabo izabola besemi ngenyawo zabo, lamehlo abo abolele emikhoxweni yawo, lenlimi zabo zibolele emilonyeni yabo.

13Ngalolosuku iNkosi izakubehlisela ukwesaba okukhulu, kuthi lowo lalowo abambe isandla sikamakhelwane wakhe ukuba asizwe nguye, kodwa isandla sikamakhelwane siphakamele ukumtshaya.

14LoJuda uzakulwa leJerusalema, kubuthwe inotho yazo zonke izizwe ezizingelezeleyo, igolide, lesiliva, lezambatho ezinengi kakhulu.

15Isifo esinjengalesi sizafikela amabhiza lembongolo, lamakamela, labobabhemi, lezifuyo zonke ezikhona kulezozihonqo.

16Kuzakuthi bonke abaseleyo kuzo zonke izizwe ezazihlasele iJerusalema bahambe iminyaka ngeminyaka ukuyakhonza uNkulunkulu iNkosi yamabandla, lokugcina umkhosi wamadumba.Levi 23:39–43

17Ubaezinye zezizwe zomhlaba zingayi eJerusalema ukukhonza uNkulunkulu iNkosi yamabandla, kungani izulu kuzo.

18Uba isizwe saseGibithe singayi eJerusalema ukukhonza, sizakwehlelwa yisifo leso iNkosi ezakusehlisela izizwe ezingayi emzini ukugcina umkhosi wamadumba.

19Likutshaywa ngokunje iGibithe lazo zonke izizwe ezingayi ukugcina umkhosi wamadumba.

20Ngalolosuku kuzabe sekulotshiwe ensimbini zamabhiza ukuthi: Zahlukaniselwe iNkosi. Lezimbiza zasethempelini zizakuba njengemiganu yokuchela engaphambi kwealtare.

21Zonke imbiza eJerusalema lakoJuda zizakwahlukaniselwa iNkosi yamabandla, ukuba bonke abanikela umhlatshelo bazithathe, bapheke ngazo inyama yomhlatshelo. Kakusayikuba khona umthengi endlini yeNkosi yamabandla ngalolosuku.