Nani 6 - Ndebele Bible (iBhayibhili Elingcwele) 1978

Umlayo omayelana lomNaziri

1INkosi yathi kuMose:

2Tshono ebantwini bakoIsrayeli uthi: Nxa owesilisa loba owesifazana efunga isifungo somNaziri, ukuba azahlukanisele iNkosi,

3uzakuzila iwayini lotshwala, anganathi umhluzi wezithelo zevini, angadli izithelo zevini ezimanzi lezomileyo.Luka 1:15

4Zonke insuku zokuzahlukanisela kwakhe kayikudla lutho oluvela evinini, lokwezithelo zalo, lenhlamvu lamakhasi.

5Zonke insuku zokugcwalisa isifungo sakhe impuco kayiyikuthinta ikhanda lakhe; uzakuba ngcwele size siphelele isikhathi sokuzahlukanisela kwakhe iNkosi, ayekele inwele zakhe ekhanda lakhe zibende.

6Zonke insuku azahlukanisele iNkosi ngazo kayikusondela esidunjini.

7Kayikuzingcolisa ngoyise langonina langomfowabo langodadewabo, uba befile, ngoba usabotshiwe yikuzahlukanisela kwakhe uNkulunkulu.

8Zonke insuku zokuzahlukanisela kwakhe ungcwele eNkosini.

9Uba umuntu ejunywa yikufa phansi kwakhe, angcolise inwele zakhe ezahlukanisele iNkosi, uzakuphuca ikhanda lakhe ngosuku lokuhlanjululwa kwakhe olwesikhombisa.

10Ngosuku lwesificaminwembili uzaletha amajuba amabili loba inkwilimba ezimbili kumpristi ngasemnyango wethente lokuhlangana;

11umpristi uzakunikela ngenye ibe ngumnikelo wesono, langenye ibe ngumnikelo wokutshiswa, amenzele indlela yokubuyisana, ngoba uzingcolisile ngesidumbu. Uzakulahlukanisela ikhanda lakhe ngalona lolosuku,

12azahlukanisele yena iNkosi ngensuku zokwahlukanisela kwakhe, alethe iwundlu elilomnyaka munye libe ngumnikelo wecala; kodwa insuku zakuqala zizakuba yize, ngoba inwele zakhe zingcolisiwe.

13Lo ngumlayo womNaziri lapho isikhathi sokuzahlukanisela kwakhe sesiphelile. Uzakulethwa emnyango wethente lokuhlangana,Seb 21:23–24

14anikele ngomnikelo wakhe eNkosini, iwundlu elilomnyaka munye elingelasici, libe ngumnikelo wokutshiswa, lemvukazi elomnyaka munye engelasici ibe ngumnikelo wesono, lenqama ibenye engelasici ibe ngumnikelo wokuthula,

15lesitsha sezinkwa ezingelamvubelo, amaqebelengwana empuphu ecolekileyo ahlanganiswe lamafutha, lezinkwa ezincinyane ezingelamvubelo ezigcotshwe ngamafutha, lomnikelo wempuphu leminikelo yokuthululwa eqondene lalezozinto.

16Umpristi uzakukubeka phambi kweNkosi, anikele ngomnikelo wakhe wesono lomnikelo wakhe wokutshiswa.

17UmNaziri uzakunikela ngenqama ibe ngumhlatshelo wokuthula eNkosini kanye lesitsha esilezinkwa ezingelamvubelo; umpristi uzakunikela umnikelo wempuphu lomnikelo wokuthululwa okuqondene lalezizinto.

18UmNaziri uzaphuca ikhanda lakhe ngasemnyango wethente lokuhlangana, athathe inwele zekhanda lakhe, azifake emlilweni ongaphansi komhlatshelo womnikelo wokuthula.

19Umpristi uzathatha umkhono wenqama, nxa isiphekiwe, leqebelengwana elingelamvubelo esitsheni, lesinkwa esincinyane esingelamvubelo, akubeke ezandleni zomNaziri esephucile ikhanda lakhe,

20umpristi akuzunguze kube ngumnikelo wokuzunguzwa phambi kweNkosi; ngoba kuyisabelo esingcwele sompristi kanye lesifuba esizunguziweyo lomlenze onikelweyo. Emva kwalokhu umNaziri anganatha iwayini.

21Lowo ngumlayo womNaziri ofungayo. Uzanikela ngomnikelo eNkosini njengesifungo sakhe asifungileyo engumNaziri, ngaphandle kwalokho angakunika; njengoba efungile, uzakwenza njengomlayo wokuzahlukaniswa kwakhe ngoba engumNaziri.

Ukubusiswa kwabantu ngabapristi

22INkosi yathi kuMose:

23Tshono kuAroni lamadodana akhe uthi: Lizakubusisa kanje abantu bakoIsrayeli. Lithi kubo:

24INkosi ilibusise, ililondoloze.

25INkosi ikhanyise ubuso bayo phezu kwenu, ibe lomusa kini.

26INkosi iphakamise amehlo ayo ilikhangele, ilehlisele ukuthula.

27Ngokunjaloke bazakubiza ibizo lami phezu kwabakoIsrayeli, ngibabusise.