Jobe 22 - Ndebele Bible (iBhayibhili Elingcwele) 1978

Inkulumo yesithathu kaElifazi: uthi ububi bukaJobe bukhulu

1Wasephendula uElifazi waseTemani esithi:

2Umuntu angaba losizo kuNkulunkulu na?

Angithi lohlakaniphileyo uyazisiza yena uqobo na?

3Kungamthokozisa yini uSomandla uba ulungile na?

Kuyinzuzo kuye yini uba usenza indlela zakho ziphelele na?

4Kuyikumesaba kwakho akusola kuwe,

akuthonisise wena ngenxa yalokho na?

5Ububi bakho kabubukhulu na?

Lezono zakho kazilakuphela.

6Ngoba uthethe isibambiso ngeze kubafowenu,

wahlubula abayanga izigqoko, bahambaze.

7Kawumnathisanga amanzi odiniweyo,

lolambileyo umncitshile ukudla.

8Phoke, umhlaba ungowabalamandla bodwa yini,

indawo yabakhethiweyo abayingcosana na?

9Ubaxotshile abafelwakazi bengelalutho,

watshaya izintandane ezingelakuzivikela.

10Ngakhoke imijibila ikuhanqile,

lovalo luyakhwehlela.

11Ukukhanya kwakho kufiphele ukuze ungaboni,

lesikhukhula samanzi sikusibekele.

12Impela uNkulunkulu uyahlala engqongeni yezulu,

uzikhangelela phansi zonke inkanyezi

lanxa ziphezulu kangaka.

13Kantike uthi: UNkulunkulu wazini na?

Angathonisisa yini engale komnyama omkhulu na?

14Amayezi amnyama amsibekele ukuze angaboni,

uhamba engqongeni yezulu.

15Uzabambelela kizo indlela ezindala

ezahanjwa ngabantu ababi na?

16Bahluthunwa isikhathi singakafiki,

lezisekelo zabo zakhukhulwa.

17Bathi kuNkulunkulu: Suka kithi; uSomandla angasenzani na?

18Kanti wayegcwalise izindlu zabo ngokuhle,

lanxa amacebo abo lawakhe ayehlukene kakhulu.

19Abalungileyo bayakubona lokho bathokoze,

labangelasici babahleka ulunya,

20besithi: Izitha zethu zichithiwe,

lezikutshiyileyo umlilo ukuqedile.

21Buyisana loNkulunkulu ube lokuthula,

ngalokho uzazuza okuhle.

22Yamukela ukufundisa kwakhe,

ulondoloze amazwi akho enhliziyweni yakho.

23Uba ubuyela kuSomandla, uzithobe,

ususa okubi khatshana lethente lakho,

24igolide lakho ulitshaye uthuli nje,

legolide laseOfiri libe njengamatshe omfula nje,

25uSomandla uqobo lwakhe uzakuba ligolide lakho lesiliva sakho.

26Ng’khonake uzazithokozisa ngoSomandla,

uphakamisele ubuso bakho kuNkulunkulu;

27uzakhuleka kuye, akuzwe,

ugcwalise izithembiso zakho.

28Uzaquma indaba, uyenzelwe,

lokukhanya kukhanye endleleni zakho.

29Ngoba uNkulunkulu uyabehlisa abazigqajayo,

kodwa uyabasiza abazithobileyo.

30Uzamkhulula umuntu ongelasici;

wena uzakhululwa ngobumhlophe bezandla zakho.