1Kwathi ngemva kwesikhathi, ngesikhathi sokuvuna amabele, uSamsoni wayabona umkakhe emphathele izinyane. Wathi: Ngizangena endlini yomkami. Kodwa uyisezala kamvumelanga ukungena.
2Wathi: Ngacabanga ukuthi usumzonda kakhulu, ngasengimnika umkhaphi wakho. Umnawakhe kamuhle kulaye na? Ungazithathela yena.
3USamsoni wasesithi kubo: Khathesi kangiyikuba lacala mayelana lamaFilistiya uba ngiwenzela okubi.
4Ngakho uSamsoni wasesuka, wabamba amakhanka angamakhulu amathathu, wathatha izibane, wawafulathelisa umsila uqondana lomsila, wabophela isibane emisileni emibili.
5Waselumathisa izibane, eyekela amakhanka ukuba angene emabeleni amaFilistiya, kwatsha amabele emiyo labuthelelweyo kanye lezivini lezivande zamaoliva.
6AmaFilistiya asesithi: Ngubani owenze lokhu na? Kwathiwa: NguSamsoni, ngoba uyisezala ongumuntu waseTimina umthathele umkakhe, wamnika umkhaphi wakhe. AmaFilistiya asefika, amtshisa owesifazana loyise ngomlilo.
7USamsoni wathi: Uba kuyikho lokhu elikwenzayo, ngiyafunga ukuba ngizaphindisela kini, ngingakasuki lapha.
8Wabahlasela ngamandla wonke, wabulala abanengi. Wasuka wayahlala obhalwini lweliwa laseEtamu.
USamsoni unqoba amaFilistiya eLehi9AmaFilistiya asuka ayamisa koJuda, ahlasela iLehi.
10AbakoJuda bathi: Lisihlaselelani na? Athi: Sizebopha uSamsoni, ukuba simenze lokho asenza khona.
11Abantu bakoJuda abazinkulungwane ezintathu basuka baya obhalwini lweliwa laseEtamu, bathi kuSamsoni: Kawazi yini ukuba amaFilistiya yiwo asibusayo na? Pho, kuyini lokhu osenzele khona na? Yena wathi kibo: Ngenze njengokwenza kwawo kimi.
12Bathi kuye: Sizile ukukubopha ukuba sikunikele kumaFilistiya. USamsoni wathi kibo: Fungani kimi ukuthi lina kaliyikungihlasela.
13Bona bathi kuye: Atshi, thina sizakukubopha kuphela, sikunikele kuwo, kasiyikukubulala. Basebembopha ngamagoda amabili amatsha, bamsusa edwaleni.
14Kwathi esefikile eLehi, amaFilistiya amhlangabeza eklabalala. Umoya weNkosi wehlela ngamandla phezu kwakhe, lamagoda ayebophe ingalo zakhe aba njengesikusha esitshiswe ngomlilo, izibopho zakhe zawohloka ezandleni zakhe.
15Wasefumana umhlathi omutsha kababhemi, welula isandla sakhe wawudobha, wabulala ngawo abantu abayinkulungwane.
16Wathi:
Ngomhlathi kababhemi ngibatshayile, baba zinqumbi,
ngomhlathi kababhemi ngibulele abantu abayinkulungwane.
17Kwathi eseqedile ukukhuluma wawulahla umhlathi. Leyondawo yasibizwa ngokuthi iRamathi‐Lehi.
18Wayesomile kakhulu. Wakhala eNkosini wathi: Unikile lokhu ukukhululwa okukhulu ngesandla senceku yakho; sengizakufa yikoma, ngiwele ezandleni zabangasokanga na?
19UNkulunkulu wasevula igodi phansi eliseLehi, kwagobhoza amanzi kilo. Kwathi esenathile uSamsoni, umoya wakhe wabuya waqaqabuka. Ngalokho ibizo lalowomthombo lathiwa yiEni‐Hakore; useLehi kuze kube lamhla.
20USamsoni waba ngumahluleli koIsrayeli ensukwini zamaFilistiya iminyaka engamatshumi amabili.
Who We AreWhat We EelieveWhat We Do
2025 by iamachristian.org,Inc All rights reserved.
