Levi 22 - Ndebele Bible (iBhayibhili Elingcwele) 1978

Ubungcwele beminikelo

1INkosi yathi kuMose:

2Mtshele uAroni lamadodana akhe ukuba bananzelele ngezinto ezingcwele zabakoIsrayeli abazinikela kimi, ukuze bangahlambazi ibizo lami elingcwele; ngiyiNkosi.

3Tshono kibo uthi: Uba umuntu owenzalo yenu ezizukulwaneni zenu esondela esengcolile ezintweni ezingcwele, abantu bakoIsrayeli abazinikela eNkosini, lowo uzakukhutshwa phambi kwami. NgiyiNkosi.

4Umuntu owenzalo kaAroni olobulephero, loba okuphuma kuye okungcolileyo, kayikudla izinto ezingcwele aze ahlambuluke. Othinta ulutho olungcoliswe yisidumbu, lalowo okuphuma kuye ubudoda,

5lalowo othinta into ehuquzelayo engamngcolisa, loba othinta omunye umuntu ongamngcolisa ngoba elokungcola,

6yebo, wonke umuntu othinta okunjalo uzakuba ngongcolileyo kuze kuhlwe, angadli izinto ezingcwele uba engagezi umzimba wakhe ngamanzi.

7Nxa selitshonile ilanga uzakuhlambuluka; emva kwalokho angadla izinto ezingcwele, ngoba lezi ziyikudla kwakhe.

8Lokho okuzifeleyo lalokho okubanjwe yizilo kangakudli ukuba angazingcolisi ngakho. NgiyiNkosi.

9Ngakhoke kabagcine imilayezelo yami, bangabi lasono ngayo; uba beyihlambaza, bazakufa. NgiyiNkosi ebenzayo ukuba babe ngcwele.

10Umuntu ongesumpristi kayikudla into engcwele. Umuntu ohlala lompristi loyisisebenzi esiqatshiweyo bangadli into engcwele.

11Kodwa uba umpristi ethenga isigqili ngemali, sona singayidla, labazelwe emzini wakhe bangadla ukudla kwakhe.

12Uba indodakazi yompristi ethethwe ngongesumpristi, kayingadli izinto ezingcwele ezinikelweyo.

13Kodwa uba indodakazi yompristi ingumfelwakazi loba ingolahliweyo ingelabantwana, ibisibuyela emzini kayise njengasebutsheni bayo, ingadla ukudla kukayise; kanti ongesumpristi angakudli.

14Uba umuntu esidla into engcwele engazi, uzakwengezelela kuyo okwesihlanu kwayo, amnike umpristi into engcwele.

15Abapristi kabayikungcolisa izinto ezingcwele zabantu bakoIsrayeli abazinikela eNkosini,

16bangabethwesi ububi lecala, lapho besidla izinto zabo ezingcwele; ngoba ngiyiNkosi ebenzayo babe ngcwele.

17INkosi yathi kuMose:

18Tshono kuAroni, lamadodana akhe, labantu bonke bakoIsrayeli, uthi: Lapho umuntu owendlu kaIsrayeli, loba owabezizweni abakoIsrayeli, enikela umnikelo wakhe owokugcwalisa isithembiso, loba owesihle, onikelwa eNkosini ube ngumnikelo wokutshiswa,

19ukuze lamukeleke lina nikelani ngenduna engelasici, inkunzi loba imvu loba imbuzi.

20Linganikeli ngolutho olulesici, ngoba kaliyikwamukeleka ngalo.Dute 17:1

21Nxa umuntu enikela eNkosini umhlatshelo weminikelo yokuthula owokugcwalisa isithembiso loba owesihle, inkomo loba imvu enikelwayo ifanele ibe ngelungileyo ukuze yamukeleke, ingabi lasici.

22Izifuyo eziyiziphofu, lezilimeleyo, leziyizilima, lezilamanxeba, lezilamathumba, leziloqweqwe, linganikeli ngazo eNkosini, futhi linganikeli ngazo zibe ngumnikelo owenzelwe iNkosi ngomlilo ealtareni.

23Inkunzi loba imvu elezitho ezingalinganiyo linganikela ngayo ibe ngumnikelo wesihle; kodwa kayiyikwamukeleka uba ingumnikelo wokugcwalisa isithembiso.

24Linganikeli eNkosini ngezifuyo ezitheniweyo ngokugxotshwa loba ngokuxholoswa loba ngokuqunywa; futhi lingazihlabi elizweni lakini.

25Linganikeli ngezifuyo ezinjalo ezivela kowezizweni zibe yikudla kukaNkulunkulu wenu. Zilesici, ngakho kaliyikwamukeleka ngazo.

26INkosi yathi kuMose:

27Nxa kuzalwa inkunzi loba imvu loba imbuzi, izakuhlala kunina insuku eziyisikhombisa. Kusukela osukwini lwesificaminwembili izakwamukeleka ibe ngumnikelo owenzelwe iNkosi ngomlilo.

28Kodwa inkomokazi loba imvukazi lingayihlabi kanye lomntwana wayo ngasuku lunye.

29Nxa lihlabela iNkosi umhlatshelo wokubonga, kwenzeni ukuba lamukeleke.

30Uzakudliwa ngalolosuku, lingatshiyi lutho kuze kube sekuseni. NgiyiNkosi.

31Ngakhoke gcinani imilayo yami, liyenze. NgiyiNkosi.

32Lingahlambazi ibizo lami elingcwele, kodwa ngizakuba ngcwele phakathi kwabantu bakoIsrayeli. NgiyiNkosi elenzayo libe ngcwele,

33eyalikhupha elizweni laseGibithe ukuba ngibe nguNkulunkulu wenu. NgiyiNkosi.