Nani 10 - Ndebele Bible (iBhayibhili Elingcwele) 1978

Impondo zesiliva

1INkosi yathi kuMose:

2Yenza impondo ezimbili zesiliva, uzikhande, uzisebenzise ekubizeni ibandla lasekusukeni kwabantu.

3Ekukhaleni kwempondo zombili, lonke ibandla lizahlangana lawe ngasemnyango wethente lokuhlangana.

4Kodwa uba kukhaliswa uphondo olulodwa, izikhulu zodwa ezizinhloko zezizwe zakoIsrayeli zizakuhlangana lawe.

5Lapho lihlaba umkhosi, izihonqo ezingasempumalanga zizakusuka.

6Lalapho liphinda ukuhlaba umkhosi ngokwesibili, izihonqo ezingaseningizimu zizakusuka. Ukuze zisuke, kakuhlatshwe umkhosi.

7Kodwake lapho lifuna ukubuthanisa ibandla lizakukhalisa impondo, kodwa lingahlabi umkhosi.

8Amadodana kaAroni, abapristi, yiwo azakukhalisa izimpondo. Lokhu kuzakuba kini isimiso esingelakuphela ezizukulwaneni zenu.

9Kuzakuthi lapho liphuma impi elizweni lakini ukuyakulwa lezitha ezilicindezelayo, lihlabe umkhosi ngezimpondo, ukuba iNkosi uNkulunkulu wenu ilikhumbule, likhululwe ezitheni zenu.

10Langezinsuku zokuthokoza kwenu, lasemikhosini yenu emisiweyo, lasekuthwaseni kwenyanga, lizakhalisa izimpondo ekunikeleni iminikelo yenu yokutshiswa lemihlatshelweni yeminikelo yenu yokuthula, ukuze zilisize ukukhumbula uNkulunkulu wenu. Mina ngiyiNkosi uNkulunkulu wenu.

Ukusuka kwabakoIsrayeli eSinayi

11Ngomnyaka wesibili, ngosuku lwamatshumi amabili lwenyanga yesibili, iyezi lasuka phezu kweTabernakeli lobufakazi.

12Abantu bakoIsrayeli basuka enkangala yaseSinayi ngezigaba ngezigaba; iyezi lema enkangala yaseParani.

13Baqalisake ukusuka belaywa yiNkosi ngoMose.

14Kuqala kwasuka uphawu lwezihonqo zabakoJuda lezigaba zabo; uNashoni indodana kaAminadaba wayengumkhokheli webandla labo.

15Umkhokheli webandla lesizwe sabakoIsakari wayenguNethaneli indodana kaZuwari.

16Umkhokheli webandla lesizwe sabakoZebuluni wayenguEliyabi indodana kaHeloni.

17Kwathi lapho iTabernakeli lidilizwa, amadodana kaGerishoni lamadodana kaMerari asuka, alithwala iTabernakeli.

18Lwaselusuka uphawu lwezihonqo zabakoRubeni lezigaba zabo; umkhokheli webandla labo wayenguElizuri indodana kaShedewuri.

19Umkhokheli webandla lesizwe sabakoSimeyoni wayenguShelumiyeli indodana kaZurishadayi.

20Umkhokheli webandla lesizwe sabakoGadi wayenguEliyasafi indodana kaDehuweli.

21Kwasekusuka amaKohathi ethwala izinto ezingcwele; iTabernakeli lamiswa, wona engakafiki.

22Lwaselusuka uphawu lwezihonqo zabakoEfrayimi lezigaba zabo; umkhokheli webandla labo wayenguElishama indodana kaAmihudi.

23Umkhokheli webandla lesizwe sabakoManase wayenguGamaliyeli indodana kaPedazuri.

24Umkhokheli webandla lesizwe sabakoBenjamini wayenguAbidani indodana kaGideyoni.

25Lwaselusuka uphawu lwezihonqo zabakoDani lezigaba zabo; babengabokucina ezihonqweni zonke; umkhokheli webandla labo wayenguAhiyezeri indodana kaAmishadayi.

26Umkhokheli webandla lesizwe sabakoAsheri wayenguPagiyeli indodana kaOkirani.

27Umkhokheli webandla lesizwe sabakoNafitali wayenguAhira indodana kaEnani.

28Ekusukeni kwabo abantu bakoIsrayeli bahamba, belandelana ngezigaba zabo.

29UMose wathi kuHobabi indodana kaRehuweli waseMidiyani, umlamu wakhe: Sesisuka siya endaweni iNkosi ekhulume ngayo ukuthi: Ngizakulipha yona. Woza, sihambe; sizakukwenzela okuhle, ngoba iNkosi ithembise ukwenza okuhle kuIsrayeli.

30Wathi kuye: Kangiyikuhamba lani, kodwa ngizahamba ngiye elizweni lakithi lasezihlotsheni zami.

31UMose wathi: Ake ungasitshiyi, ngoba uyazi lapho singamisa khona enkangala, uzakuba ngamehlo ethu.

32Uba uhamba lathi, okuhle iNkosi ezakusenzela khona, lathi sizakukwenzela khona.

33Basukake entabeni yeNkosi, bahamba uhambo lwensuku ezintathu; umtshokotsho wesivumelwano seNkosi wawungaphambi kwabo okohambo losuku olulodwa ukuze ubadingele indawo yokuphumula.

34Iyezi leNkosi laliphezu kwabo emini, ekusukeni kwabo ezihonqweni.

35Kwakuye kuthi ekusukeni komtshokotsho, uMose athi:

Vuka, Nkosi, zichitheke izitha zakho,

lalabo abakuzondayo babaleke phambi kwakho.

36Ekumisweni kwawo wayesithi:

Buyela, Nkosi, ezigidini ezinengi zakoIsrayeli.