1Ngoba siyazi ukuthi uba indlu yethu yasemhlabeni elidumba idilizwa, silesakhiwo esivela kuNkulunkulu esiyindlu engenziwanga ngezandla, engapheliyo esezulwini.
2Impela khathesi siyabubula, silangatha ukwambatha indlu yethu yasezulwini,
3ukuze kuthi ngokwambatha yona singafunyanwa size.
4Ngoba nxa sisekhona kulelidumba siyabubula, siyasindwa, ngoba kasifisi ukwambulwa kodwa ukwambathiswa, ukuze lokho okubhubhayo kuginywe yikuphila.
5Owasenzela khona lokho nguNkulunkulu owasipha uMoya ube yisibambiso.
6Ngakho simi isibindi ngesikhathi sonke, sisazi ukuthi nxa sisekhona emzimbeni sikhatshana leNkosi;
7ngoba sihamba ngokukholwa, kasihambi ngokubona.
8Ngithi simi isibindi, singathanda kakhulu ukwahlukana lomzimba, sibe sekhaya kanye leNkosi.
9Ngalokhoke, loba sisekhaya loba singekho, sizimisele ukuyithokozisa.
10Thina sonke simele ukuma phambi kwesihlalo sokuthonisisa sikaKristu, ukuze ilowo lalowo amukele njengalokhu akwenzileyo esemzimbeni, okuhle ingabe okubi.Ukuphila okutsha okukuKristu. Inkonzo yokubuyisana
11Ngakhoke lokhu sikwazi ukwesaba iNkosi, siyabancenga abantu; kodwa thina sibonakalisiwe kuNkulunkulu; ngithemba ukuthi sibonakalisiwe lasenhliziyweni zenu.
12Kasizivezi futhi kini, kodwa silinika ithuba lokuzincoma ngathi, ukuze libe lakho okokuphendula labo abazincomayo ngokusemehlweni kungesikho okusenhliziyweni.
13Uba sihlanya, kungenxa kaNkulunkulu; uba siqondile, kungenxa yenu.
14Ngoba uthando lukaKristu luyasiqhubezela, sibona lokhu ukuthi munye owafela bonke; ngakhoke bonke sebafa.
15Wafela bonke, ukuze abaphilayo bangabe besaziphilela, kodwa baphilele yena owabafelayo, wabuye wavuka.
16Ngakhoke thina kasisayikuhlola umuntu ngokwabantu, lanxa sake samhlola uKristu ngokwabantu, kodwa khathesi kasisamhloli.
17Uba umuntu ekuKristu, usedalwa kutsha; okudala sekudlule; khangela, sekuvele okutsha.
18Konke lokhu kuvela kuNkulunkulu owabuyisana lathi ngoKristu, wasinika inkonzo yokubuyisana,
19okuyikuthi uNkulunkulu wayekuKristu ebuyisana lomhlaba, engababaleli iziphambeko zabo, lokuthi wanika thina ilizwi lokubuyisana
20Ngakhoke siyizithunywa zikaKristu okuyikuthi uNkulunkulu uyalincenga ngathi; lathi siyalincenga esikhundleni sikaKristu sithi: Buyisanani loNkulunkulu.
21Ongasazanga isono uNkulunkulu wamenza isono ngenxa yethu, ukuze kuye senziwe sibe yikulunga kukaNkulunkulu.
Who We AreWhat We EelieveWhat We Do
2025 by iamachristian.org,Inc All rights reserved.
