Eks 34 - Ndebele Bible (iBhayibhili Elingcwele) 1978

Amanye amatshe amabili

1INkosi yathi kuMose: Baza amanye amatshe amabili anjengawakuqala; ngibhale kuwo amazwi ayesematsheni akuqala owawaphahlazayo.

2Ekuseni ubusulungile, ukhwele entabeni yaseSinayi, uze phambi kwami engqongeni yentaba.

3Kungakhweli muntu kanye lawe, kungabonakali muntu kuyo yonke intaba; ungayekeli izimvu lezinkomo zalukele phambi kwaleyontaba.

4UMose wasebaza amatshe amabili anjengawakuqala; wavuka ekuseni, wakhwela entabeni yaseSinayi, njengokutsho kweNkosi, ephethe amatshe amabili.

5INkosi yehla ngeyezi, yema laye khona, yamemeza ibizo layo.

6INkosi yedlula phambi kwakhe, yamemeza yathi: YiNkosi! YiNkosi! nguNkulunkulu olesihawu olomusa, ophuza ukuthukuthela, ogcwele uthando olungapheliyo lobuqotho,Eks 20:5, 6; Nani 14:18; Dute 5:9, 10; 7:9, 10

7ohawukela abayizigidi, othethelela ububi leziphambeko lezono, kodwa ongayikubayekela abalecala, kodwa owehlisela ububi baboyise phezu kwabantwana laphezu kwabantwana babantwana abesizukulwana sesithathu lesesine.

8UMose waphangisa, wakhothamela phansi, wadumisa.

9Wathi: Uba ngifumene umusa emehlweni akho, Nkosi, ake uhambe phakathi kwethu, lanxa lababantu bengabanhliziyo zilukhuni, usithethelele ububi bethu lokona kwethu, usithathe sibe yilifa lakho.

10Yasisithi: Khangela, sengisenza isivumelwano; phambi kwabantu bonke bakini ngizakwenza izimangaliso ezingazanga zenziwe emhlabeni wonke lakusiphi isizwe; bonke abantu ophakathi kwabo bazakubona umsebenzi weNkosi, ngoba kuyinto eyesabekayo engizakuyenza.

11Qaphelisa lokho engikulaya khona lamhla; ngizakuxotsha phambi kwakho amaAmori lamaKanani lamaHethi lamaPerizi lamaHivi lamaJebusi.

12Kodwaqaphela ukuba ungenzi isivumelwano labahlala elizweni oya kulo, funa sibe yisifu kuwe.

13Lizadiliza ama‐altare abo, libulale insika zabo zokukhonzela, ligamule insika zabo ezimiselwe unkulunkulukazi uAshera; Dute 16:21

14ngoba kawuzukukhonza omunye unkulunkulu; iNkosi inguNkulunkulu olomona, ibizo layo linguMona.

15Ngakho ungenzi isivumelwano labahlala elizweni, ukuze ukuthi nxa bephinga labonkulunkulu babo, behlabele onkulunkulu babo, lomunye akumeme, ungadli laye umhlatshelo;

16ungawathatheli amadodana akho amadodakazi abo; ngoba lapho amadodakazi abo ephinga labonkulunkulu babo, azakwenza amadodana akho ukuba aphinge kanye lawo.

17Ungazenzeli onkulunkulu ababunjiweyo.Eks 20:4; Levi 19:4; Dute 5:8; 27:15

18Ugcine umkhosi wesinkwa esingelamvubelo; njengokukulaya kwami udle isinkwa esingelamvubelo insuku eziyisikhombisa ngesikhathi esimisiweyo senyanga kaAbibi, ngoba ngenyanga kaAbibi waphuma eGibithe.Eks 12:14–20; Levi 23:6–8; Nani 28:16–25

19Konke okuvula isizalo kungokwami, lawo wonke amazibulo amaduna enkomo lawezimvu.Eks 13:2

20Izibulo likababhemi ulihlenge ngezinyane; uba ungalihlengi ulephule intamo. Wonke amazibulo amadodana akho uzawahlenga; kungezi muntu phambi kwami engaphethe lutho.Eks 13:13

21Sebenza insuku eziyisithupha, kodwa uphumule ngosuku lwesikhombisa, langesikhathi sokulima lesokuvuna.Eks 20:9, 10; 23:12; 31:15; 35:2; Levi 23:3; Dute 5:13, 14

22Uzakugcina umkhosi wamaviki owokuvunwa kwamabele akho akuqala, lomkhosi wokuvuna kwasekupheleni komnyaka.Levi 23:15–21; 23:39–43; Nani 28:26–31

23Kathathu ngomnyaka bonke abesilisa bazakuza phambi kweNkosi uNkulunkulu, uNkulunkulu kaIsrayeli.

24Ngoba ngizaxotsha izizwe phambi kwakho, ngandise imikhawulo yelizwe lakho; kakuyikuba lamuntu ofisa ilizwe lakho lapho wenyuka ukuyabonakala phambi kweNkosi uNkulunkulu wakho kathathu ngomnyaka.

25Unganikeli igazi lomhlatshelo wami kanye lesinkwa esilemvubelo; futhi kakungasali kuze kuse umhlatshelo womkhosi wePhasika.Eks 12:10

26Ikhethelo lezithelo zakuqala zamasimu akho ulilethe endlini yeNkosi uNkulunkulu wakho. Ungapheki izinyane ngochago lukanina.Dute 26:2; 24:21

27INkosi yathi kuMose: Loba lamazwi, ngoba ngawo ngenzile isivumelwano lawe loIsrayeli.

28Wayekhona leNkosi insuku ezingamatshumi amane lobusuku obungamatshumi amane engadli enganathi. Wawaloba ematsheni amazwi esivumelwano, imithetho elitshumi.

UMose wehla entabeni

29Kwathi uMose esehla entabeni yaseSinayi ephethe amatshe amabili obufakazi, wayengazi ukuthi isikhumba sobuso bakhe siyakhazimula ngenxa yokuthi wayekade ekhuluma loNkulunkulu.2 Kor 3:7–16

30UAroni labantu bakoIsrayeli bebona ukuthi isikhumba sobuso bakhe sasikhazimula, besaba ukusondela kuye.

31Ngakho uMose wababiza; uAroni lazo zonke induna zabantu beza kuye; uMose wasekhuluma labo.

32Emva kwalokho basondela bonke abakoIsrayeli; wabanika ngemilayo konke iNkosi eyayikutshilo kuye entabeni yaseSinayi.

33UMose eseqedile ukukhuluma labo, wambomboza ubuso bakhe ngeveli.

34Kodwa lapho uMose engena phambi kweNkosi ukuba akhulume layo, wayelisusa iveli aze aphume; ekuphumeni kwakhe wayebatshela abakoIsrayeli lokho akulayiweyo,

35labakoIsrayeli babebona ukuthi isikhumba sobuso bakhe siyakhazimula; abesephinda embomboza ubuso bakhe ngeveli aze angene futhi ukuyakhuluma layo.