Nani 16 - Ndebele Bible (iBhayibhili Elingcwele) 1978

Umvukela kaKora loDathani loAbiramu

1UKora kaIzihari kaKohathi kaLevi, loDathani loAbiramu amadodana kaEliyabi, loOni indodana kaPelethi, amadodana kaRubeni,Juda 11

2bamvukela uMose belabanye bakoIsrayeli abangamakhulu amabili lamatshumi amahlanu, abangabakhokheli bebandla abantu abakhethiweyo, amadoda alodumo.

3Babahlanganyela oMose loAroni, bathi kubo: Sesidiniwe ngani! Lonke ibandla lingcwele, labantu bonke bangcwele, leNkosi ikubo. Pho, liziphakamiselani phezu kwebandla leNkosi na?

4Kwathi uMose esekuzwile, wathi mbo ngobuso phansi.

5Wathi kuKora leqembu lakhe: Ekuseni iNkosi izatshengisa ukuthi ngubani ongowayo lokuthi ngubani ongcwele, imvumele ukuba asondele kuyo; lowo ezakumkhetha nguye ongasondela kuyo.

6Yenzani lokhu; thathani imiganu yokutshisela impepha, wena Kora leqembu lakho lonke,

7lifake kiyo umlilo, kusasa libeke kiyo impepha phambi kweNkosi. Lowomuntu iNkosi ezakumkhetha nguye ongcwele. Sesidiniwe ngani, madodana kaLevi!

8UMose wathi kuKora: Zwanini, lina madodana kaLevi;

9kuyinto encinyane kini yini ukuthi uNkulunkulu kaIsrayeli ulahlukanisile lebandla lakoIsrayeli ukuze alisondeze kuye ukuba lenze inkonzo yeTabernakeli leNkosi, lokuba lime phambi kwebandla ukulikhonza na?

10Ukusondezile kuye, wena labafowenu bonke, amadodana kaLevi; selifisa lobupristi na?

11Ngalokho wena leqembu lakho lonke seliyihlanganyele iNkosi. Ngoba uAroni uyini ukuthi limsole na?

12UMose wathumela ilizwi ukubiza uDathani loAbiramu, amadodana kaEliyabi. Kodwa bathi: Kasiyikuza;

13kuyinto encinyane yini ukuthi wasikhupha elizweni eligcwele uchago lenyosi ukusibulala enkangala, kanti usuzenza ube yisikhulu phezu kwethu na?

14Futhi kawusingenisanga elizweni eligcwele uchago lenyosi, kawusinikanga ilifa lamasimu lezivini. Ungakhohlisa abantu abanjengathi na? Atshi, kasiyikuza.

15UMose wathukuthela kakhulu, wathi eNkosini: Ungananzi umnikelo wabo. Kangithathanga loyedwa wabobabhemi babo; futhi kangilimazanga muntu kubo.

16UMose wasesithi kuKora: Kusasa woza wena leqembu lakho lonke loAroni phambi kweNkosi;

17omunye lomunye wenu athathe umganu wakhe wokutshisela impepha, afake kuwo impepha, awulethe phambi kweNkosi, kube lemiganu engamakhulu amabili lamatshumi amahlanu; lawe njalo ulethe umganu wakho, loAroni alethe owakhe.

18Bonke basebethatha, kwaba yilowo lalowo umganu wakhe wokutshisela impepha, bafaka kuyo umlilo, babeka kiyo impepha, bema ngasemnyango wethente lokuhlangana kanye loMose loAroni.

19UKora wasebuthanisa lonke ibandla ukumelana labo ngasemnyango wethente lokuhlangana. Inkazimulo yeNkosi yabonakala kulo lonke ibandla.

20INkosi yathi kuMose loAroni:

21Zahlukaniseni lalelibandla ukuba ngibachithe khathesinje.

22Bathi mbo ngobuso phansi bathi: Nkulunkulu, Nkulunkulu wemimoya yakho konke okuphilayo, uzathukuthelela ibandla lonke ngenxa yokona komuntu munye na?

23INkosi yathi kuMose:

24Tshono ebandleni uthi: Phumani ngasemzini kaKora loDathani loAbiramu.

25UMose wasukuma, waya kuDathani loAbiramu, labalisa bakoIsrayeli bamlandela.

26Wathi ebandleni: Ake lisuke emathenteni alababantu ababi, lingathinti lutho olwabo, funa lani liphetshulwe ngenxa yezono zabo.

27Basebephuma emizini yaboKora loDathani loAbiramu; uDathani loAbiramu baphuma, bema ngaseminyango yamathente abo kanye labomkabo lamadodana abo labantwana babo.

28UMose wathi: Ngalokhu lizakwazi ukuthi iNkosi ingithumile ukwenza yonke limisebenzi, lokuthi lokhu kakusikho okwentando yami.

29Uba lababantu besifa ngokufa okwehlela phezu kwabantu bonke, kakusiyo iNkosi engithumileyo.

30Kodwa uba iNkosi isenza into entsha, ukuba umhlaba uvuleke, ubaginye kanye lakho konke okwabo, behlele endaweni yabafileyo bephila, lizakwazi ukuthi lababantu bayidelele iNkosi.

31Kwathi eseqedile wonke lamazwi, umhlaba waqhekezeka ngaphansi kwabo,

32wavuleka, wabaginya lemizi yabo, labo bonke abantu bakoKora, lempahla yabo yonke.

33Bona behlela endaweni yabafileyo bephila lakho konke okwabo; umhlaba wabagqibela, banyamalala ebandleni.

34Bonke abakoIsrayeli ababebazingelezele babaleka ekukhaleni kwabo, ngoba bathi: Umhlaba kawungasiginyi lathi.

35Kwavela eNkosini umlilo, waqothula labobantu abangamakhulu amabili lamatshumi amahlanu ababenikele ngempepha.

36INkosi yasisithi kuMose:

37Mtshele uEleyazare, indodana kaAroni umpristi, ukuba akhuphe imiganu yokutshisela impepha emlilweni; wena uwuhlikize umlilo uwuchithele khatshana.

38Ngoba ingcwele imiganu yokutshisela impepha yalababantu ababulawa ngokona kwabo, kayikhandwe ibe yizicecedu zokusibekela ialtare; bayinikela phambi kweNkosi, ngakho ingcwele. Ngalokhu izakuba yisibonakaliso ebantwini bakoIsrayeli.

39UEleyazare umpristi wasethatha imiganu yethusi yokutshisela impepha abayinikeleyo labobantu abatshisiweyo, yakhandwa yaba yizicecedu zokusibekela ialtare,

40kube yisikhumbuzo ebantwini bakoIsrayeli sokuthi lowo ongesuye umpristi, ongesuye owenzalo kaAroni, angasondeli ukutshisa impepha phambi kweNkosi, funa afe njengoKora lexuku lakhe, njengokutsho kweNkosi kuEleyazare ngoMose.

41Kusisa lonke ibandla labakoIsrayeli labasola oMose loAroni, lathi: Libabulele abantu beNkosi.

42Kwathi ibandla selibahlanganyela oMose loAroni, bakhangela ngasethenteni lokuhlangana, babona iyezi lilisibekele, lenkazimulo yeNkosi ibonakala.

43UMose loAroni bafika ngaphambi kwethente lokuhlangana.

44INkosi yathi kuMose:

45Suka ebandleni leli ukuba ngibachithe khathesinje. Bathi mbo ngobuso phansi.

46UMose wathi kuAroni: Thatha umganu wakho wokutshisela impepha, ufake kuwo umlilo wasealtare, ubeke kuwo impepha, ukuse ngokuphangisa ebandleni, ubenzele indlela yokubuyisana; ngoba ulaka seluphumile eNkosini, umkhuhlane usuqalisile.

47UAroni wasekuthatha njengokutsho kukaMose, wagijimela ebandleni; kodwa umkhuhlane wawusuqalisile phakathi kwabantu. Wafaka impepha, wabenzela abantu indlela yokubuyisana.

48Wema phakathi kwabafileyo labaphilileyo; umkhuhlane waphela.

49Labo abafa ngomkhuhlane babezinkulungwane ezilitshumi lane, lamakhulu ayisikhombisa, ngaphandle kwalabo abafa ngendaba kaKora.

50UAroni wabuyela kuMose ngasemnyango wethente lokuhlangana, umkhuhlane usuphelile.