Hubo 62 - Ndebele Bible (iBhayibhili Elingcwele) 1978

Thembani kuNkulunkulu

1Umphefumulo wami uyamlindela uNkulunkulu ngokuthula;

ukukhululwa kwami kuvela kuye.

2Nguye kuphela olidwala lami, lomkhululi wami,

lenqaba yami; kangiyikunyikinywa.

3Koze kube nini limsukela umuntu ukuba limchithe lina lonke,

onjengomduli otshekileyo, lothango oludilikayo na?

4Baceba kuphela amacebo okumwisa ekuphakameni kwakhe,

bathanda amanga;

bayabusisa ngemilomo yabo,

kodwa ngaphakathi bayathuka.

5Umphefumulo wami uyamlindela uNkulunkulu ngokuthula;

ithemba lami likuye.

6Nguye kuphela olidwala lami, lomkhululi wami,

lenqaba yami; kangiyikunyikinywa.

7Ukukhululwa kwami lodumo lwami kukuNkulunkulu;

idwala lami eliqinileyo lesiphephelo sami kunguNkulunkulu.

8Thembani kuye izikhathi zonke lina bantu,

lithulule inhliziyo zenu phambi kwakhe;

uNkulunkulu uyisiphephelo sethu.

9Abantukazana bangumoya nje,

lezikhulu ziyinkohliso;

lapho belinganiswa bafunyaniswa belula;

loba bebonke balula kulomoya.

10Lingakuthembi ukuqilibezela,

lingamisi ithemba ekuphangeni;

uba inotho isanda,

lingabeki inhliziyo zenu kuyo.

11UNkulunkulu ukhulumile kwaba kanye,

ngizwile kabili lokhu

ukuthi amandla angakaNkulunkulu,

12lothando olungapheliyo lungolwakho, Nkosi;

ngoba wena uyamphindisela umuntu

njengokwenza kwakhe.