Mat 28 - Ndebele Bible (iBhayibhili Elingcwele) 1978

Ukuvuka lokuzibonakalisa kukaJesu(Mark 16:1–18; Luka 24:1–12; Joha 20:1–10)

1Kwathi ekupheleni kweSabatha, ekudabukeni kokusa ngosuku lokuqala lweviki, kwafika uMariya Magadalena lomunye uMariya ukuzabona iliba.

2Khangela, kwaba khona ukuzamazama komhlaba okukhulu, ngoba isithunywa seNkosi sehla sivela ezulwini, sagiqa ilitshe, sahlala phezu kwalo.

3Ukubonakala kwaso kwakunjengombane, lesambatho saso sasimhlophe njengongqoqwane.

4Abalindi bathuthumela ngokusesaba, baba njengabafileyo.

5Kodwa isithunywa sathi kwabesifazana: Lingesabi lina; ngoba ngiyazi ukuthi lidinga uJesu obebethelwe;

6kakho lapha, ngoba uvukile njengokutsho kwakhe; wozani libone indawo lapho abelele khona.

7Hambani masinyane, litshele abafundi bakhe ukuthi uvukile kwabafileyo; uzakulandulela ukuya eGalili, lizakumbona khona. Khangelani, sengilitshelile.

8Basuka elibeni ngokuphangisa belokwesaba lokuthokoza okukhulu, bagijima baya ukubikela abafundi bakhe.

9Khangela, uJesu wabahlangabeza, wathi: Okuhle! Basondela babamba inyawo zakhe, bamkhonza.

10UJesu wasesithi kibo: Lingesabi; hambani, libikele abafowethu ukuba basuke baye eGalili; bazakungibona khona.

11Kwathi besahamba, abanye kubalindi baya emzini, babikela abapristi abakhulu konke okwenzekileyo.

12Sebebuthene labadala, benza icebo, banika abebutho imali enengi,

13bathi: Kalibokuthi abafundi bakhe beza ebusuku, bameba silele thina.

14Uba lokhu kuzwakala kumbusi, sizakumncenga thina ukuze lina lingangeni enkathazweni.

15Basebethatha imali, benza njengokufundiswa kwabo. Lelilizwi landa phakathi kwabaJuda kuze kube lamuhla.

Ukulayeza kokucina kukaJesu

16Abafundi abalitshumi lanye baya eGalili entabeni uJesu ayebalayele yona;Mat 26:32; Mark 14:28

17sebembonile bamkhonza, kodwa abanye bathandabuza.

18UJesu wasondela, wakhuluma labo esithi: Aphiwe mina amandla wonke ezulwini lasemhlabeni;

19ngakho hambani lenze izizwe zonke zibe ngabafundi, libabhaphathize ebizweni likaYise, leleNdodana, lelikaMoya oNgcwele,Seb 1:8

20libafundise ukugcina konke engililaye ngakho; khangelani, mina ngilani insuku zonke kuze kube sekupheleni kwesikhathi.