Hubo 55 - Ndebele Bible (iBhayibhili Elingcwele) 1978

Umkhuleko womuntu okhohliswayo

1Nkulunkulu, lalela ukukhuleka kwami,

ungazifihli ekunxuseni kwami.

2Zwana, ungiphendule;

ngiyasindwa yikuhlupheka kwami.

3Ngitshaywa luvalo ngomsindo wezitha

ngenxa yokubandezela kwababi;

ngoba bangilethela izinkathazo,

bangizingela ngokuthukuthela.

4Inhliziyo yami iyathuthumela phakathi kwami,

ukwesaba ukufa kuphezu kwami.

5Ngifikelwa luvalo lokuthuthumela,

ngehlelwe yikwesaba okukhulu,

6ngize ngithi: Kungathi ngabe ngilamaphiko njengejuba!

Ngabe ngiphaphela khatshana, ngiphumule khona.

7Yebo, bengingabalekela khatshana

ngihlale enkangala.

8Bengingaphuthuma indawo yokucatsha,

ngicatshele umoya ovunguzayo lesiphepha.

9Achithe amacebo abo, Nkosi,

uphambanise ukukhuluma kwabo.

Ngibona ububi lokuxabana phakathi komuzi.

10Emini lasebusuku babhoda imithangala yawo;

ububi lenkathazo kuphakathi kwawo,

11ukuchitheka kuphakathi kwawo;

imbandezelo lenkohliso kakupheli emidangeni yawo.

12Uba bekuyisitha esingiklolodelayo,

bengizakukumela;

uba bekungongizondayo ongiphethe kubi,

bengizakumcatshela.

13Kodwa kunguwe, ntanga yami,

mnakwethu lomngane wami.

14Sasixoxa ngokumnandi sonke,

saphelekezelana endlini kaNkulunkulu.

15Ukufa kakubafikele,

bawiselwe endaweni yabafileyo besaphila,

ngoba ububi busemizini yabo lasenhliziyweni yabo.

16Mina ngikhuleka kuNkulunkulu,

iNkosi izakungisiza.

17Kusihlwa lasekuseni lasemini ngiyakhala ngibubule,

izakulizwa ilizwi lami;

18izakukhulula umphefumulo wami ngokuthula empini engiyilwayo,

ngoba banengi abamelana lami.

19UNkulunkulu uzakungizwa, abathobise,

yena okhona kusukela endulo,

ngoba bengaphenduki,

bengamesabi uNkulunkulu.

20Umnakwethu walwa labangane bakhe,

wasaphula isivumelwano sakhe.

21Ukukhuluma kwakhe kubutshelezi kulolaza,

kanti inhliziyo yakhe ithanda ukulwa;

amazwi akhe abuthakathaka kulamagcobo,

kanti anjengomkhonto obukhali.

22Wethulele phezu kweNkosi umthwalo wakho,

yona izakukusekela;

kayiyikuvuma lanini ukuba olungileyo anyikinywe.

23Kodwa wena, Nkulunkulu, uzakubawisela phansi,

uzakubawisela emgodini otshonayo;

abantu begazi lenkohliso

kabayikufinyelela lasengxenyeni yensuku zabo zokuphila.

Kodwa mina ngizakuthemba kuwe.