Hos 8 - Ndebele Bible (iBhayibhili Elingcwele) 1978

INkosi isola abakoIsrayeli ngezithombe zabo

1INkosi ithi: Khalisa uphondo,

ngoba ukhozi luzula phezu kwendlu yeNkosi;

abantu bami sebephule isivumelwano sami,

baphambuka emlayweni wami.

2Bamemeza kimi bathi: Siyakwazi, Nkulunkulu kaIsrayeli.

3UIsrayeli ulahlile okuhle,

isitha sizaxotshana laye.

4Bazibekela amakhosi ngaphandle kwemvumo yami.

Bamisa ababusi ngingazi mina.

Ngesiliva sabo langegolide labo bazenzela izithombe ezabalethela ukuchitheka.

5Ngaleyisa ithole eladunyiswa nguwe, wena Samariya.

Ukuthukuthela kwami kuyabavuthela.

Koze kube nini uIsrayeli engahlanjululwanga na?

6Umbazi walenza, kalisuye Nkulunkulu.

Ithole laseSamariya lizaphahlazwa libe yizihlephu.

7Ngoba behlanyela umoya, bazavuna isivunguzane.

Amabele abo kawayikukhahlela, kawayikuba lanhlamvu;

uba engaba lazo, zizadliwa ngabezizwe.

8UIsrayeli useginyiwe, wanyamalala phakathi kwezizwe

usenjengesitsha esingelamsebenzi.

9Ngoba njengobabhemi oduhileyo bayile eAsiriya ukudinga usizo.

UEfrayimi uqatshile izithandwa ukuba zimsize.

10Lanxa beqatsha abasizi phakathi kwezizwe,

sengizabaqoqa;

ng’khona bezakhawula ukubeka amakhosi lababusi.

11Ngoba uEfrayimi akhile ama‐altare amanengi,

asephenduke aba ngama‐altare okona.

12Loba bengingamlobela imilayo yami ibe zinkulungwane ezilitshumi,

bebezakuyitshaya into engaziwayo.

13Lanxa benikela inyama yemihlatshelo, babuye bayidle,

mina Nkosi kangiyikuyamukela.

Ngizakukhumbula ububi babo,

ngibatshaye ngenxa yezono zabo, babuyele eGibithe.

14UIsrayeli umkhohliwe uMenzi wakhe,

wazakhela izindlu zamakhosi;

uJuda wandisile imizi ebiyelweyo;

kodwa ngizathumela umlilo phezu kwemizi yakhe,

ozaqothula inqaba zakhe.