Hez 37 - Ndebele Bible (iBhayibhili Elingcwele) 1978

Isihotsha samathambo omileyo

1Isandla seNkosi sasiphezu kwami, sangikhupha ngomoya weNkosi, sangibeka phansi esihotsheni, sasigcwele amathambo.

2Yangizulisa phakathi kwawo, ayemanengi kakhulu esihotsheni, ayomile kakhulu.

3Yathi kimi: Ndoda, kambe amathambo la angaphila na? Ngaphendula ngathi: Nkosi Nkulunkulu, nguwe owaziyo.

4Yasisithi kimi futhi: Tshumayela kulamathambo, uthi kiwo: Lina mathambo omileyo, zwanini ilizwi leNkosi.

5INkosi uNkulunkulu ithi kulamathambo omileyo: Ngizangenisa umoya kini, liphile.

6Ngizabeka imisipha phezu kwenu, ngihlumise inyama phezu kwenu, ngilifake isigogo, ngilifake umoya, liphile. Lizakwazi ukuba ngiyiNkosi.

7Ngasengitshumayela njengokulaywa kwami. Kwathi ngisatshumayela, kwaba khona umsindo lokukhehlezela. Amathambo abuthana ndawonye, ithambo laba sethanjeni lalo.

8Ngakhangela ngabona imisipha kiwo, lenyama yahluma phezu kwawo, lesigogo sawembesa. Kodwa kwakungelamoya kiwo.

9Yasisithi kimi: Tshumayela emoyeni, tshumayela ndoda, uthi emoyeni: INkosi uNkulunkulu ithi: Woza moya, uvele endaweni zonke, uphefumulele kulaba ababuleweyo ukuba baphile.

10Ngasengitshumayela njengokungilaya kwayo; umoya wangena kiwo, aphila, ema ngenyawo zawo, aba lixuku elikhulu kakhulu.Isam 11:11

11Yasisithi kimi: Ndoda, amathambo la anguIsrayeli wonke. Khangela, bathi: Amathambo ethu omile, lethemba lethu lilahlekile, sesiphelile.

12Ngakhoke tshumayela uthi kibo: INkosi uNkulunkulu ithi: Ngizavula amaliba enu, ngilivuse emalibeni enu, lina bantu bami, ngilibuyise elizweni lakoIsrayeli.

13Lizakwazi ukuba ngiyiNkosi nxa ngivula amaliba enu, ngilivusa emalibeni enu, bantu bami.

14Ngizafaka umoya wami kini, liphile; ngizalibeka kwelenu ilizwe; ng’khona lizakwazi ukuba mina Nkosi ngikhulumile, lokuba ngikwenzile, kutsho iNkosi.

Ilizwi leNkosi ngokuhlanganiswa kwabakoIsrayeli labakoJuda

15Ilizwi leNkosi lafika kimi lathi:

16Ndoda, thatha intonga, ulobe kiyo uthi: NgekaJuda loIsrayeli ahlangene laye. Uthathe enye intonga, ulobe kiyo uthi: NgekaJosefa, intonga kaEfrayimi, laye wonke uIsrayeli ahlangene laye.

17Uzixhume zibe yintonganye esandleni sakho.

18Lapho abantu bakini besithi kuwe: Ungasitshela yini ukuba zitshoni lezi na?

19uthi kibo: INkosi uNkulunkulu ithi: Sengizakuthatha intonga kaJosefa, esesandleni sikaEfrayimi, lezizwe zonke zakoIsrayeli ezihlangene laye, ngiyixhume entongeni kaJuda, zibe yintonganye esandleni sami.

20Ziphathe intonga obhala kizo ukuba abantu bazibone,

21uthi kibo: INkosi uNkulunkulu ithi: Ngizathatha abantu bakoIsrayeli ezizweni abaya kizo, ngibabuyise bevela endaweni zonke, ngibalethe elizweni labo;

22ngizabenza babe yisizwe sinye elizweni phezu kwezintaba zakoIsrayeli, babuswe yinkosinye, bangabe besaba yizizwe ezimbili lemibuso emibili eyehlukeneyo.

23Kabasayikuzingcolisa futhi ngezithombe zabo langezinto zabo ezenyanyekayo, langeziphambeko zabo. Kodwa ngizabakhupha kukho konke ukuhlamuka abona ngakho, ngibahlambulule babe ngabantu bami, mina ngibe nguNkulunkulu wabo.

24Inceku yami uDavida uzakuba yinkosi yabo, babe lomalusi munye. Bazalandela imithetho yami, bananzelele ukugcina izimiso zami.Hez 34:24

25Bazahlala elizweni elalihlala okhokho benu engalinika inceku yami uJakobe; bona kanye labantwana babo labantwana babantwana babo bahlale khona kokuphela. UDavida inceku yami uzakuba yisikhulu sabo kokuphela.

26Ngizakwenza labo isivumelwano sokuthula, sibe yisivumelwano esingelakuphela. Ngizababusisa ngibandise, ngakhe indlu yami engcwele phakathi kwabo kokuphela.

27Indawo yami yokuhlala izakuba kibo, ngibe nguNkulunkulu wabo, babe ngabantu bami.2 Kor 6:16; Isam 21:3

28Ng’khona izizwe zizakwazi ukuthi mina Nkosi ngenza uIsrayeli abe ngcwele nxa indlu yami engcwele isiphakathi kwabo kokuphela.