uAmosi 3 - Ndebele Bible (iBhayibhili Elingcwele) 1978

Umsebenzi womprofethi

1Zwanini lelilizwi iNkosi elikhulume ngani, lina bakoIsrayeli, ngaso sonke isizwe eyasikhupha elizweni laseGibithe, ithi:

2Yini kuphela engilikhethileyo, ngalilondoloza ezizweni zonke zomhlaba;

ngakhoke ngizalitshaya ngenxa yabo bonke ububi benu.

3Ababili bangahamba bonke kanyekanye uba bengavumelananga na?

4Isilwane singabhonga ehlathini singabambanga lutho na?

sibhonge obhalwini lwaso singelalutho na?

5Inyoni ingabanjwa lapho ingathiywanga khona na?

lomjibila ungathanya uba ungabambanga lutho na?

6Uphondo lungakhala emzini abantu bengethuki na?

Umuzi ungehlelwa ngokubi iNkosi ingakuvumelanga na?

7Impela iNkosi uNkulunkulu kayenzi lutho

ingazambulelanga inceku zayo abaprofethi imfihlakalo yayo.

8Isilwane sesibhongile, ngubani ongayikwesaba na?

INkosi uNkulunkulu isikhulumile, ngubani ongayekela ukutshumayela na?

Ukwahlulelwa kweSamariya

9Memezelani ezinqabeni zaseAsiriya

lezinqabeni zaselizweni laseGibithe, lithi:

Buthanani phezu kwezintaba zaseSamariya,

libone iziphithiphithi ezinkulu eziphakathi kwalo

lokucindezelwa okukilo.

10Ngoba kabakwazi ukwenza okulungileyo, kutsho iNkosi,

bagcwalisa inqaba zabo ngomvuzo wokugebenga lokuphanga.

11Ngakho iNkosi uNkulunkulu ithi:

Izitha zizazingelezela ilizwe lakini,

zichithe amandla enu, ziphangwe inqaba zenu.

12INkosi ithi:

Njengalokho umalusi ekhupha emlonyeni wesilwane

imilenze emibili loba isiqa sendlebe,

ngokunjaloke abakoIsrayeli abahlala eSamariya bazakhutshwa,

abalala emibhedeni elezingubo ezinhle.

13Zwanini lifakaze ngendlu kaJakobe,

kutsho iNkosi uNkulunkulu wamabandla; ithi:

14Mhla ngitshaya uIsrayeli ngenxa yeziphambeko zakhe

ngizatshaya ama‐altare aseBetheli,

kwaphuke impondo zealtare ziwele phansi.

15Ngizatshaya indlu yasebusika lendlu yasehlobo,

izindlu zempondo zendlovu zizadilika,

lezindlu ezinengi ziwohloke; kutsho iNkosi.