Isa 1 - Ndebele Bible (iBhayibhili Elingcwele) 1978

UNkulunkulu ukhuza isizwe sakoJuda esonayo

1Lo ngumbono kaIsaya indodana kaAmozi awubona ngoJuda langeJerusalema ensukwini zaboUziya loJothamu loAhazi loHezekiya amakhosi akoJuda.

2Zwanini, mazulu; ulalele lawe mhlaba,

ngoba iNkosi isikhulumile, yathi:

Ngondlile ngakhulisa abantwana, kodwa bangivukela.

3Inkabi iyamazi umniniyo,

lobabhemi uyawazi umkolo womnikazi wakhe;

kodwa uIsrayeli, abantu bami, kabazi, kabaqedisisi.

4Hawu, sizwe esonayo, bantu abasindwa yibubi,

nzalo yababi, bantwana abonakeleyo!

Liyitshiyile iNkosi, limdelile oNgcwele kaIsrayeli, lihlamukile.

5Lizakutshaywa kuze kube nini ngenxa yokuqhubeka kwenu lihlamuka na?

Lonke ikhanda lakho, Israyeli, ligcwele amanxeba,

lenhliziyo yakho yonke ibuthakathaka.

6Kusukela ophangweni lonyawo lwakho kuze kufike ekhanda kakulandawo epheleleyo;

ulemivimvinya lezilonda nje lamanxeba ophayo;

kakukhanywanga ubomvu, kakubotshwanga, kakuthanjiswanga ngamagcobo.

7Ilizwe lakini lichithekile, lemizi yenu itshiswe ngomlilo;

umhlaba wenu udliwa ngabezizwe phambi kwenu,

lichithekile, lichithwa ngabafo.

8IZiyone isele injengedumba esivinini,

injengengalane ensimini yamakhomane lanjengomuzi ovinjezelweyo.

9Uba iNkosi yamabandla ibingasitshiyelanga ingcosana yabantu,

besizakuba njengeSodoma, sifane leGomora.

10Zwanini ilizwi leNkosi, lina babusi baseSodoma,

lilalele imfundiso kaNkulunkulu wethu, lina bantu baseGomora.

11INkosi ithi: Iyini kimi imihlatshelo yenu eminengi na?

Nganelisiwe yiminikelo yezinqama langamahwahwa okunonisiweyo;

legazi lezinkunzi lelamawundlu lelezimpongo kalingithokozisi.

12Lapho lisiza phambi kwami

ngubani olibizele ukunyathela amaguma ethempeli lami na?

13Lingabe lisaletha iminikelo eyize;

impepha yayo iyisinengiso kimi;

ukuhlangana kwenu ekuthwaseni kwenyanga, langeSabatha, lezinkonzweni ezinkulu zenu, kangikuthandi;

kangikuvumi lokuhlangana kwenu emikhosini.

14Ngiyayizonda imihlangano yenu yekuthwaseni kwenyanga leyemikhosi yenu emisiweyo;

isingumthwalo kimi, futhi sengikhathele yikuyithwala.

15Lapho liselulela izandla zenu kimi, ngizalifihlela amehlo ami;

lanxa lisenza imikhuleko eminengi, kangiyikuyilalela;

izandla zenu zigcwele igazi.

16Gezani lihlambuluke, lisuse izenzo zenu ezimbi phambi kwami,

liyekele ukwenza okubi,

17lifunde ukwenza okuhle, lidinge okufaneleyo,

lisize abacindezelweyo,

livikele izintandane, limele umfelwakazi.

18Wozanike, siqondisane, itsho iNkosi;

loba izono zenu zibomvu gebhu,

zizakuba mhlophe njengongqoqwane;

loba zibomvu njengegazi, zizakuba mhlophe njengoboya bezimvu.

19Uba livuma lilalela, lizakudla okuhle kwelizwe;

20kodwa uba lisala lihlamuka, lizadliwa ngomkhonto;

ngoba iNkosi isikhulumile.

Ukwahlulelwa lokukhululwa kweZiyone

21Yeka umuzi othembekileyo usuphenduke waba liwule,

wona owawugcwele okufaneleyo!

Ukulunga kwakuhlezi phakathi kwawo,

kodwa khathesi sekuhlala ababulali.

22Isiliva sakho, Jerusalema, sesiphenduke saba ngamanyele,

lewayini lakho laxubana lamanzi.

23Izikhulu zakho zingabahlamuki labangane bamasela;

zithanda ukwamukela umvuzo wokuthengwa, zigijimela izipho;

kazivikeli izintandane, lendaba yomfelwakazi kayifinyeleli kuzo.

24Ngakho iNkosi yamabandla, uMninimandla wakoIsrayeli uthi:

Ngizakwehlisela ulaka lwami phezu kwezitha zami,

ngiziphindisele kwabamelana lami.

25Ngizaphakamisela isandla sami kuwe,

ngitshise amanyele akho esithandweni somlilo,

ngisuse yonke insimbi engelamsebenzi ekuwe.

26Ngizakukunika abathonisisi abafana lalabo bakuqala,

labaluleki bakho abanjengabakuqala,

andubana ubizwe ngokuthi ngumuzi wokulunga lomuzi othembekileyo.

27IZiyone izahlengwa ngokufaneleyo,

labaphendukayo phakathi kwayo bahlengwe ngokuqonda.

28Kodwa abahlamuki lezoni bazabhujiswa kanyekanye,

labadela iNkosi baqedwe.

29Lizakuba lenhloni ngezihlahla ezinkulu elalithokoza ngazo,

linyukumale ngamasimu eliwakhethileyo.

30Ngoba lizakuba njengesihlahla esikhulu esilamahlamvu abunayo,

libe njengensimu engelamanzi.

31Abalamandla bazakuba njengezibi,

lemisebenzi yabo ibe njengenhlansi;

kuzakutsha konke kanyekanye kungabi khona okucimayo.