Jer 5 - Ndebele Bible (iBhayibhili Elingcwele) 1978

Izono zeJerusalema

1Gijimani, lizulazule ezindleleni zeJerusalema, lizibonele;

licinge emagumeni ayo,

libone ukuba lingafumana umuntu owenza ukulunga,

odinga iqiniso, ukuze ngiyithethelele.

2Loba besithi: Ngifunga iNkosi;

kanti bafunga amanga nje.

3Nkosi, amehlo akho kawathandi ukubona iqiniso na?

Wena ubatshayile, kodwa kabezwanga ubuhlungu;

ubaqothule, kodwa bala ukulaywa.

Benza inhliziyo zabo zaba lukhuni kulelitshe,

bala ukuphenduka.

4Ngasengisithi: Laba bangabayanga nje, bayiziphukuphuku;

ngoba kabayazi indlela yeNkosi lomlayo kaNkulunkulu wabo.

5Sengizakuya kwabakhulu, ngikhulume labo,

ngoba bona bayayazi indlela yeNkosi lomlayo kaNkulunkulu wabo.

Kodwa labo babelephulile ijogwe, baqamula izibopho.

6Ngakhoke isilwane sasehlathini sizababulala,

babhujiswe yimpisi yasenkangala,

lengwe iyicathamele imizi yabo,

bonke abaphuma kiyo bazakubanjwa;

ngoba iziphambeko zabo zinengi,

lokuhlehlela kwabo emuva kwandile.

7Ngingakuthethelela kanjani?

Abantwana bakho bangihlamukele,

bafunga labo abangesibo onkulunkulu.

Ngabanika ukudla okunengi, kodwa bafeba,

baya ezindlini zezifebe.

8Babenjengamabhiza anonileyo akhwelayo,

omunye lomunye ekhalela umfazi kamakhelwana wakhe.

9Kangiyikubatshaya ngenxa yezinto lezi na? kutsho iNkosi;

kangiyikuphindisela esizweni esinje na?

10Ngenani emavinini alo liwachithe,

kodwa lingawaqedi ngokupheleleyo;

susani ingatsha zalo, ngoba kazisizo zeNkosi.

11Indlu kaIsrayeli lendlu kaJuda zingikhohlisile ngokupheleleyo,

kutsho iNkosi.

12Bayiphikile iNkosi, bathi: Kayilamsebenzi.

Kakuyikusehlela okubi,

kasiyikubona impi lendlala.

13Abaprofethi bazakuba ngamaya nje,

kabalalo ilizwi leNkosi.

Kuzakwenziwa njalo kibo!

14Ngakhoke iNkosi, uNkulunkulu wamabandla, ithi:

Njengoba batsho njalo,

ngizakwenza amazwi ami emlonyeni wakho abe ngumlilo,

lalabobantu babe zinkuni, umlilo ubaqede.

15Ngizakukulethela isizwe esivela khatshana, wena ndlu kaIsrayeli,

kutsho iNkosi.

Yisizwe esilamandla, yisizwe esidala,

yisizwe ongalwaziyo ulimi lwaso,

longayikukuzwa lokho esikukhulumayo.

16Abatshoki baso bayesabeka,

bonke bangamaqhawe.

17Bazakudla amabele akho lokudla kwakho,

badle amadodana akho lamadodakazi akho,

badle izimvu zakho lenkomo zakho,

badle amavini akho lemikhiwa yakho;

lemizi yakho ebiyelweyo othembela kiyo, bazayichitha.

18Kodwa langalezonsuku kangiyikuliqeda ngokupheleleyo, kutsho iNkosi.

19Kuzakuthi lapho abakini besithi: INkosi, uNkulunkulu wethu, yenzeleni zonke lezizinto kithi na? uzakuthi kibo: Njengoba lingihlamukele, lakhonza abanye onkulunkulu elizweni lakini, lizakusebenzela abantu bezizwe elizweni elingesilo elenu.

20Memezani lokhu endlini kaJakobe,

likutshumayele lakoJuda ukuthi:

21Zwanini lokhu, lina bantu abayizithutha labayiziphuphuku,

elilamehlo kodwa lingaboni,

elilendlebe kodwa lingezwa.

22Kalingesabi na? kutsho iNkosi.

Kalithuthumeli phambi kwami na?

Ngabeka itshebetshebe laba ngumkhawulo wolwandle,

umkhawulo oqinileyo olungelakuwudlula;

lanxa amavinqo etshayana angeweqe,

lanxa ehlokoma, kawalakudlula phezu kwalo.

23Kodwa lababantu balenhliziyo elukhuni ehlamukayo,

baphambukile, bangitshiya.

24Kabatsho enhliziyweni zabo ukuthi:

Asiyesabe iNkosi uNkulunkulu wethu,

esinika izulu ngesikhathi salo, ehlobo lasentwasa,

isimisele amaviki akhethelwe isivuno.

25Ububi benu buvimbele konke lokhu,

lezono zenu zilivalela okuhle.

26Ngoba phakathi kwabantu bami kukhona abantu ababi,

abacathamayo njengabathiyi becathamele inyoni,

bathiya abantu ngemijibila yabo.

27Njengesitsha sigcwele inyoni,

izindlu zabo zigcwele inkohliso;

ngalokhuke sebebakhulu banothile,

28bakhuluphele;

kabalamkhawulo ekwenzeni kwabo okubi,

kabameli ukulunga lezintandane ukuba ziphumelele,

kabavikeli amalungelo abaswelayo.

29Kangiyikubatshaya ngalezizinto na? kutsho iNkosi.

Kangiyikuphindisela esizweni esinje na?

30Okumangalisayo lokwesabekayo kwenzakele elizweni;

31abaprofethi batshumayela amanga,

labapristi babusa ngokululeka kwabaprofethi;

abantu bami bayakuthanda lokhu.

Kodwa lizakwenza njani ekupheleni na?