2 Sam 23 - Ndebele Bible (iBhayibhili Elingcwele) 1978

Amazwi okucina kaDavida

1La ngamazwi okucina kaDavida; amazwi kaDavida indodana kaJese, amazwi omuntu ophakanyiselwe phezulu, ogcotshiweyo kaNkulunkulu kaJakobe, umhlabeleli omuhle wakoIsrayeli;

2uthi:

Umoya weNkosi ukhuluma ngami,

ilizwi layo lisolimini lwami.

3UNkulunkulu kaIsrayeli usekhulumile,

iDwala likaIsrayeli likhulumile kimi lathi:

Obusa abantu ngokulunga,

abuse ngokumesaba uNkulunkulu,

4unjengokukhanya kwasekuseni ekuphumeni kwelanga,

ilanga elikhanyayo ekuseni kungekho amayezi,

lanjengezulu elihlumisa utshani emhlabathini.

5Impela indlu yami ithembekile kuNkulunkulu na?

Ngoba wenzile lami isivumelwano esingelakuphela,

esimiswe kuhle ezintweni zonke, lesithembekileyo,

Ngoba kayikuphumelelisa konke ukusizwa kwami lesifiso sami na?

6Kodwa bonke abangamesabiyo uNkulunkulu banjengameva alahliweyo,

angelakuthathwa ngesandla;

7kodwa owathintayo uwathinta ngensimbi langoluthi lomkhonto,

atshiswa ngomlilo aphele.

Amaqhawe kaDavida

8La ngamabizo amaqhawe kaDavida; uIshiboshethi waseHakimoni, owayeyinduna yabathathu; nguye owagiya ngomkhonto wakhe phakathi kwabangamakhulu aficaminwembili, wababulala ngasikhathi sinye.

9Wayelandelwa nguEleyazare indodana kaDodo waseAhohi, omunye wamaqhawe amathathu. WayeloDavida ePasidamimi lapho amaFilistiya ayebuthanele khona ukulwa. Kwathi lapho abakoIsrayeli sebehlehlile,

10wasuka wagwaza amaFilistiya saze sadinwa isandla sakhe, isandla sakhe sanamathela emkhontweni. INkosi yabanika ukunqoba okukhulu ngalolosuku; abantu babuya bamlandela ukuba baphange abafileyo.

11Yena wayelandelwa nguShama indodana kaAge waseHarari. AmaFilistiya ayebuthene eLehi, lapho kwakukhona insimu elemibhida; lapho abantu bewabalekela amaFilistiya,

12yena wema phakathi kwensimu, wayivikela, wawabulala amaFilistiya. INkosi yabanika ukunqoba okukhulu.

13Abathathu ezinduneni ezingamatshumi amathathu basuka, baya kuDavida obhalwini lwaseAdulamu ngesikhathi sokuvuna; ibutho lamaFilistiya lalimise esihotsheni saseRegayimi.

14UDavida wayesesenqabeni, lamabutho alindayo amaFilistiya ayeseBetlehema.

15UDavida wasesoma kakhulu, wathi: Hawu, kungathi nginganathiswa amanzi omthombo waseBetlehema ongasesangweni.

16Lawomaqhawe amathathu afohlela ezihonqweni zamaFilistiya, akha amanzi emthonjeni waseBetlehema owawungasesangweni, awathatha awaletha kuDavida. Kodwa uDavida wala ukuwanatha; wawathululela eNkosini.

17Wathi: Ngingeke ngikwenze lokho, Nkosi; kungaba njengokunatha igazi labantu abangenise ukuphila kwabo engozini. Ngalokhoke wala ukuwanatha. Lezizinto zenziwa yilawomaqhawe amathathu.

18UAbishayi, umfowabo kaJowabi indodana kaZeruya, wayeyinduna yabangamatshumi amathathu. Wagiya ngomkhonto wakhe phezu kwabangamakhulu amathathu ayebabulele, wazizuzela ibizo phakathi kwalabo abangamatshumi amathathu.

19Wayelodumo olukhulu phakathi kwabangamatshumi amathathu, waba yinduna yabo; kodwa wayengalingani lamaqhawe amathathu ngobuqhawe.

20UBenaya indodana kaJehoyada waseKabizeli wayeliqhawe elenza izenzo ezinkulu ezinengi. Nguye owabulala amaqhawe amabili aseMowabi; futhi wangena emgodini, wabulala isilwane mhla kulongqoqwane.

21Wabulala lomGibithe, umuntu oqatha kakhulu. UmGibithe lowo wayephethe umkhonto; kodwa uBenaya waya kuye ephethe induku nje, wawuhluthuna umkhonto esandleni sakhe, wambulala ngomkhonto wakhe.

22Lezizinto wazenza uBenaya indodana kaJehoyada, wazizuzela ibizo phakathi kwalabo abangamatshumi amathathu.

23Wayelodumo phakathi kwabangamatshumi amathathu, kodwa wayengalingani lamaqhawe amathathu ngobuqhawe. UDavida wambeka induna yabalindi bakhe.

24UAsaheli umfowabo kaJowabi wayengomunye wabangamatshumi amathathu, loElihanani indodana kaDodo waseBetlehema,

25loShama waseHarodi, loElika waseHarodi,

26loHelezi waseBeti‐Peleti, loIra indodana kaIkeshi waseTekowa,

27loAbiyezeri waseAnathithi, loMebunayi waseHusha,

28loZalimoni waseAhohi, loMaharayi waseNetofa,

29loHeledi indodana kaBahana waseNetofa, loIthayi indodana kaRibayi waseGibeya lakoBenjamini,

30loBenaya wasePirathoni, loHidayi wangasezifuleni zaseGashi,

31loAbi‐Aliboni waseBeti‐Araba, loAzimavethi waseBahurimi,

32loEliyaba waseShaliboni, loJasheni waseGizoni,

33loJonathani indodana kaShama waseHarari, loAhiyamu indodana kaSharari waseHarari,

34loElifeleti indodana kaAhasibayi indodana yomMahakathi, loEliyamu indodana kaAhithofeli waseGilo,

35loHezirayi waseKarmeli, loParayi waseArabi,

36loIgali indodana kaNathani waseZoba, loBani wakoGadi,

37loZeleki waseAmoni, loNaharayi waseBerothi, umphathi wezikhali zikaJowabi indodana kaZeruya,

38loIra waseIthira, loGarebi waseIthira,

39loUriya umHethi; babengamatshumi amathathu lesikhombisa bebonke.