Zaga 16 - Ndebele Bible (iBhayibhili Elingcwele) 1978

1Umuntu wenza amacebo ngenhliziyo yakhe,

kodwa yiNkosi emisa konke.

2Umuntu angathi zonke indlela zakhe zilungile,

kodwa iNkosi ihlola inhliziyo.

3Nikela eNkosini konke okwenzayo,

amacebo akho azakuphumelela.

4INkosi yenzile konke kube lomsebenzi wakho;

lababi yabenzela usuku lokuchitheka.

5INkosi izonda umuntu oyisiqholo,

impela kayikuyekelwa.

6Ngobuqotho langokuthembeka izono ziyathethelelwa,

langokuyesaba iNkosi umuntu uyaxwaya okubi.

7Nxa iNkosi ithokoziswa zindlela zomuntu,

iyenza lezitha zakhe zihlalisane kuhle laye.

8Kungcono ukuba lokuncinyane ulungile

kulokuba lenotho enengi ungalunganga.

9Inhliziyo yomuntu ilungisa indlela yakhe,

kodwa yiNkosi eqondisa ukuhamba kwakhe.

10Umlomo wombusi ukhuluma amazwi avela kuNkulunkulu,

kaphosisi ekugwebeni kwakhe.

11Izilinganiso lesikali esilungileyo kungokweNkosi,

zonke izilinganiso ezisemgodleni zingumsebenzi wayo.

12Ukwenza okubi kuzondwa ngamakhosi,

ngoba isihlalo sobukhosi simiswa ngokulunga.

13Ukukhuluma iqiniso kuthokozisa inkosi,

iyathanda umuntu olikhulumayo iqiniso.

14Ngolaka lombusi kuvela ukufa;

ohlakaniphileyo uzaludambisa.

15Lapho umbusi ebobotheka, kukhona ukuphila,

lomusa wakhe unjengamayezi aletha insewula.

16Ukuzuza ukuhlakanipha kungcono kulegolide,

lokuzuza ukuqedisisa kungcono kulesiliva.

17Umgwaqo wabaqotho uceza ububi;

oqaphela ukuhamba kwakhe uyaphila.

18Ukuzigqaja kwandulela ukubhujiswa,

lomoya ozikhukhumezayo wandulela ukuwa.

19Kungcono ukuba umuntu athobeke ahlangane labayanga,

kulokuba abe phakathi kwabaziqakisayo ukwabelana labo impango.

20Olalela ukufundiswa uzaphumelela;

othemba eNkosini uzakuthaba.

21Ohlakaniphileyo kuthiwa ungumuntu oqedisisayo;

amazwi amnandi enza abantu bakuvume lokho okutshiwoyo.

22Ukuhlakanipha kungumthombo wokuphila kuye olakho,

kodwa ubuthutha buyikutshaywa kwabayizithutha.

23Ingqondo yohlakaniphileyo iyamhola ekukhulumeni kwakhe,

ukuba amazwi akhe enze abantu bakuvume lokho akutshoyo.

24Amazwi amnandi anjengoluju lwenyosi,

amnandi emlonyeni, ayimpilo.

25Kukhona indlela ebonakala ilungile emuntwini,

kodwa ekupheleni izafika ekufeni.

26Iphango lesisebenzi lisenze ukuba sisebenze,

ukulamba kwaso kuyasikhuthaza.

27Umuntu omubi uceba okubi,

amazwi akhe anjengomlilo otshisayo.

28Umuntu ophambeneyo ubanga inkani,

onyeyayo wehlukanisa izinini.

29Umuntu omubi kakhulu uyenga abanye,

abahambise ngendlela engalunganga.

30Ofica ilihlo uceba okubi,

oluma indebe zakhe ufuna ukugebenga.

31Izimvu zekhanda zingumqhele wodumo,

zingumvuzo wokuphila okulungileyo.

32Ophuza ukuthukuthela ungcono kuleqhawe,

ozinqandayo ungcono kulaye onqoba umuzi.

33Inkatho yenziwa ngabantu,

kodwa yiNkosi eyenza isiqumo.