Zek 9 - Ndebele Bible (iBhayibhili Elingcwele) 1978

Ukuchithwa kwezitha zakoIsrayeli

1Nanti ilizwi. Yilizwi leNkosi elimelana lelizwe laseHadiraki, lizakwehlela phezu kweDamaseko.

Ngoba imizi yaseAramu ingeyeNkosi,

njengazo zonke izizwe zakoIsrayeli;

2leHamathi lalo elikhawula kilo,

leTire leSidoni lanxa kuhlakaniphile.

3ITire lizakhele inqaba,

labuthelela isiliva njengothuli, legolide njengezibi zezindlela.

4Kodwa iNkosi izakuliphundla impahla yalo,

iphosele olwandle inotho yalo,

lona liqedwe ngumlilo.

5IAshikeloni lizakukubona lokho, lesabe,

leGaza lalo lithuthumele kakhulu,

leEkroni lalo ngoba ithemba lalo liphelile.

Inkosi yaseGaza izabhubha, leAshikeloni kalisayikuhlalwa muntu.

6Abantu abazalwa ngokufeba bazahlala eAshidodi;

ngizaqeda ukuzigqaja kwamaFilistiya.

7Ngizakhupha igazi lemihlatshelo emilonyeni yawo,

leminikelo yawo enengekayo phakathi kwamazinyo awo;

abaseleyo bawo bazakuba ngabakaNkulunkulu wethu,

abe njengesizwe koJuda, leEkroni libe njengamaJebusi.

8Besengimisa ngasethempelini lami ngibe ngumlindi,

ukuze kungabi khona ongenayo lophumayo,

kungabi lamcinde zeli obanqobayo;

sengikubonile lokhu ngawami amehlo.

Inkosi yaseZiyone

9Thokoza kakhulu, wena Ziyone!

Memeza kakhulu, Jerusalema!

Khangela, inkosi yakho iyeza kuwe,

inqobile yehlula, imnene, ikhwele ubabhemi,

ithole, inkonyane kababhemi.

10Izaqeda inqola zokulwa koEfrayimi,

lamabhiza okulwa eJerusalema;

lemitshoko yokulwa izakuqedwa.

Izamemezela ukuthula ezizweni;

lokubusa kwayo kuzasukela olwandle kuze kufike kolunye ulwandle,

kusukele emfuleni iYufrathi kuze kube sekucineni komhlaba.

11Laweke, ngenxa yesivumelwano sakho lami esiqiniswe ngegazi,

ngizakhupha izibotshwa zakho emgodini ongelamanzi.

12Buyelani enqabeni yenu, lina zibotshwa esezilethemba;

lamhla ngiyalitshela ukuthi ngizalibusisa ngokuphindwe kabili.

13Ngoba sengimgobisile uJuda njengedandili lami,

ngenza uEfrayimi waba ngumtshoko walo.

Ngizavusela amadodana akho, Ziyone, kumadodana akho, Javani,

ngikwenze ube njengomkhonto weqhawe.

14INkosi izabonakala ngaphezu kwabo,

lomtshoko wayo uphazime njengombane;

iNkosi uNkulunkulu izakhalisa uphondo,

iphume ngezivunguzane zaseningizimu.

15INkosi yamabandla izakubavikela,

banqobe, banyathele phansi amatshe ezavutha;

bazanatha igazi labo njengewayini, bagcwale lona njengomganu,

lanjengezingonsi zealtare.

16INkosi uNkulunkulu wabo izakubakhulula ngalolosuku,

ngoba bangumhlambi wayo labantu bayo,

ngoba njengeziceco ezinhle zomqhele, bazakhanya elizweni lakhe.

17Yeka ubuhle balo lokubukeka kwalo!

Amabele azakhulisa izinsizwa,

lewayini elitsha likhulise izintombi.