Zaga 28 - Ndebele Bible (iBhayibhili Elingcwele) 1978

1Ababi babaleka lanxa kungekho oxotshana labo,

kodwa abalungileyo balesibindi njengesilwane.

2Ngokona kwaso isizwe siba lababusi abanengi abalandelanayo;

kodwa nxa silombusi olokuqedisisa lokwazi siyema.

3Umbusi omubi ocindezela abayanga

unjengezulu elinengi elona amabele.

4Abaphula umlayo badumisa ababi,

kodwa labo abagcina umlayo balwa labo.

5Ababi kabakuqedisisi ukulunga,

kodwa labo abayilandelayo iNkosi bakuqedisisa ngokupheleleyo.

6Kungcono ukuba ngumyanga ohamba ngobuqotho

kulokuba yisinothi esihamba ngendlela ezimbi.

7Indodana egcina umlayo ihlakaniphile,

kodwa indodana ezihlanganisa lezigangi iyangisa uyise.

8Umuntu owandisa inotho yakhe ngenzalo langenzuzo

uyibuthela omunye olomusa kubayanga.

9Uba umuntu engawulaleli umlayo,

lemikhuleko yakhe izakuba yisinengiso.

10Oduhisela abaqotho endleleni embi uzakuwela emgodini wakhe.

Abangelacala bazakudla ilifa elihle.

11Onothileyo uthi uhlakaniphile,

kodwa umyanga olokuqedisisa uzabona ukuthi unjani.

12Lapho abalungileyo bephakanyiswa, kukhona ukuthokoza okukhulu;

kodwa nxa ababi bephakanyiswa, abantu bayacatsha.

13Ofihla iziphambeko zakhe kayikuphumelela,

kodwa lowo ozivumayo azitshiye, uzahawukelwa.

14Ubusisiwe lowomuntu owesaba ukwenza okubi,

kodwa owenza inhliziyo yakhe ibe lukhuni uzahlupheka.

15Umbusi omubi obusa abantu abangelamandla

unjengesilwane esibhongayo lebhere elizingelayo.

16Umbusi ongelakuqedisisa ungumcindezeli olesihluku,

kodwa lowo ozonda inzuzo embi uzaphila isikhathi eside.

17Umuntu obulele omunye kacatshe aze afe,

angasizwa muntu.

18Ohamba ngobuqotho uzavikeleka,

kodwa ozama ukuhamba ngendlela ezimbili uzakuwela kwenye yazo.

19Olima insimu yakhe uzakuba lokudla okunengi,

kodwa owenza imisebenzi eyize uzakuba ngumyanga kakhulu.

20Othembekileyo uzakuphumelela,

kodwa ophangisa ukunotha kayikuyekelwa.

21Ukubandlulula abantu ekwahluleleni kakulunganga;

kodwa umuntu angona ukuba azuze ucezu lwesinkwa nje.

22Umuntu oncitshanayo uphangisa ukunotha,

engazi ukuthi ubuyanga buzamehlela.

23Lowo okhuza omunye uzabongwa kakhulu ngasemuva

kulaye olalisa ngolimi lwakhe.

24Owebayo kubazali bakhe, abesesithi konanga,

kangcono kulaye ochithayo.

25Oyisihwaba ubanga ukuxabana,

kodwa othemba eNkosini uzakuphumelela.

26Othemba ingqondo yakhe uyisithutha,

kodwa ohamba ngokuhlakanipha uzakuvikeleka.

27Onika abayanga kayikuswela,

kodwa obavalela amehlo akhe uzaqalekiswa kakhulu.

28Nxa ababi bephakanyiswa, abantu bayacatsha,

kodwa nxa ababi bebhubha, abalungileyo bayanda.