1 uTimothi 6 - Ndebele Bible (iBhayibhili Elingcwele) 1978

Mayelana lezigqili

1Bonke abangaphansi kwejokwe lobugqili kabathi amakhosi abo afanele ukuhlonitshwa impela, ukuze ibizo likaNkulunkulu lesifundiso kungadunyazwa.

2Abalamakhosi akholwayo bangawadeleli ngoba engabazalwane; kodwa kakube ng’khona bewasebenzela kakhulu, ngoba engabakholwayo lathandekayo lawo asizakala ngomsebenzi wabo.

Fundisa ngalezizinto, utshumayele ngazo.

Isifundiso samanga sibanga okubi

3Uba kukhona ofundisa okwahlukileyo, engavumelani lamazwi aqotho eNkosi yethu uJesu Kristu lesifundiso esifanele ukukhonza uNkulunkulu,

4uyazikhukhumeza lowo, kazi lutho. Uphethwe yinkani lokuphikisana ngamazwi, okubanga umona, lombango, lokuthuka, lemicabango emibi,

5lokuxabana kwabantu abangqondo zabo zonakele, abalahlekelwe liqiniso, besithi ukukhonza uNkulunkulu kuyindlela yenzuzo.

6Yebo, ukukhonza uNkulunkulu kuyinzuzo enkulu uba kukhona ukwaneliswa;

7ngoba kasizanga lalutho emhlabeni, futhi kasiyikusuka lalutho;

8kodwa uba silokudla lezambatho kasaneliswe yikho.

9Abafuna ukunotha bangena ekulingweni, lasemijibileni, lasezinkanukweni ezinengi zobuphukuphuku ezilimazayo, eziwisela abantu ekufeni lasekubhujisweni.

10Ukuthanda imali kuyimpande yakho konke okubi; abanye ngokuyifisa baduhile ekukholweni, bazibangela insizi ezinengi.

Ezinye izeluleko zikaPawuli

11Kodwa wena muntu kaNkulunkulu balekela lokhu; nxwanela ukulunga, lokuhle, lokukholwa, lothando, lokubekezela, lobumnene.

12Lwana ukulwa okuhle kokukholwa; ubambelele ekuphileni okungapheliyo owabizelwa kukho, wavuma ukuvuma okuhle phambi kwabofakazi abanengi.

13Ngiyakulaya phambi kukaNkulunkulu ophilisa konke, loKristu Jesu owavuma ukuvuma okuhle phambi kukaPontiyusi Pilatu, Joha 18:37

14ukuba ugcine umthetho ungelasici, ungasoleki kuze kube sekubonakaleni kweNkosi yethu uJesu Kristu,

15azakukubonakalisa ngesikhathi esifaneleyo, uSomandla oyedwa lobongekayo, iNkosi yamakhosi, loMbusi wababusi,

16yena yedwa olokungafi, ohlala ekukhanyeni okungelakusondelelwa, ongazange abonwe muntu, ongebonwe. Kakube kuye udumo lamandla angapheliyo. Ameni.

17Laya abanothileyo lapha emhlabeni ukuba bangazikhukhumezi, bangathembeli enothweni engemiyo, kodwa bathembele kuNkulunkulu osinothisa ngakho konke, sithokoze ngakho.

18Kabenze okuhle banothe ngemisebenzi emihle, baphane babelane,

19bazibekele isisekelo esihle esikhathini esizayo, ukuze babambe ukuphila koqobo.

Isicino

20Wena Timothi, londoloza kuhle okubekwe kuwe. Xwaya ukukhuluma okuyize lokuphikisana kwalokho okuthiwa yikwazi kungesikho,

21okuthe abanye ngokukuvuma baduha ekukholweni.

Umusa kawube lani lonke.