Eks 36 - Ndebele Bible (iBhayibhili Elingcwele) 1978

1UBezaleli loOholiyaba bazasebenza, labo bonke abahlakaniphileyo iNkosi ebanike ukuhlakanipha lokuqedisisa ukuba bazi ukwenza yonke imisebenzi yokwakha indlu engcwele njengokulaya konke kweNkosi.

Ukwakhiwa kweTabernakeli

2UMose wasebiza uBezaleli loOholiyaba labo bonke abahlakaniphileyo abanikwa ukuhlakanipha yiNkosi, abathunywa zinhliziyo zabo ukuze baye ukwenza umsebenzi;

3bamukela kuMose wonke umnikelo wesihle, abantu bakoIsrayeli ababewulethe ukwenza umsebenzi wokwakha indlu engcwele. Babeletha kuye iminikelo yesihle insuku ngensuku ekuseni.

4Bonke abahlakaniphileyo ababesenza imisebenzi yonke yendlu engcwele beza, bonke bevela emisebenzini abayenzayo,

5bathi kuMose: Abantu bayaletha okunengi kakhulu ukwedlula okwanele ukwenza umsebenzi iNkosi esilaya ukuba siwenze.

6UMose wasebalayezela ukuba kumenyezelwe kuzo zonke izihonqo ukuthi: Kakungabe kusenziwa lutho futhi ngomnikelo wendlu engcwele. Ngakho abantu basebevaleleka ukuba balethe umnikelo;

7ngoba lokho ababelakho kwasekwanele ukuwenza umsebenzi wonke kwaze kwasala.

8Bonke abahlakaniphileyo phakathi kwalabo ababesebenza balenza iTabernakeli ngamaveli alitshumi; bawenza ngelembu elihle lentambo ephothiweyo eluhlaza leyibubende lebomvu, aba lamakherubi awenziwe ngumuntu oyingcitshi.Eks 26:1–37

9Ubude balelo lalelo iveli babuzingalo ezingamatshumi amabili lesificaminwembili, ububanzi balo babuzingalo ezine; wonke amaveli ayelingene.

10Wahlanganisa amaveli amahlanu elinye lelinye, lamaveli amanye amahlanu elinye lelinye.

11Wenza izihitshela ngokuluhlaza emphethweni weveli elisekucineni kwamaveli amahlanu, baphinda benze njalo emphethweni weveli elisekucineni kwamanye amaveli amahlanu.

12Wenza izihitshela ezingamatshumi amahlanu kwelinye iveli, lezihitshela ezingamatshumi amahlanu emphethweni weveli elinye, izihitshela zazikhangelene.

13Wenza ingwegwe zegolide ezingamatshumi amahlanu, bahlanganisa amaveli elinye lelinye ngengwegwe; ngalokhu iTabernakeli laba linye.

14Wenza amaveli ngoboya bembuzi abe lithente phezu kweTabernakeli, aba ngamaveli alitshumi lanye.

15Ubude balelo lalelo iveli babuzingalo ezingamatshumi amathathu, ububanzi beveli babuzingalo ezine; wonke amaveli alitshumi lanye ayelingene.

16Wahlanganisa amaveli amahlanu wodwa, lamaveli ayisithupha wodwa.

17Wenza izihitshela ezingamatshumi amahlanu emphethweni weveli elisekucineni kwamaveli amahlanu, lezihitshela ezingamatshumi amahlanu emphethweni weveli elisekucineni kwamanye amaveli ayisithupha.

18Wenza ingwegwe zethusi ezingamatshumi amahlanu ukuba ithente lihlanganiswe libe linye.

19Wenza isifulelo sethente ngezikhumba ezibomvu zenqama langezinzwezwe.

20Wenza amapulanka emiyo eTabernakelini ngesihlahla somvagazi;

21ubude besigodo babuzingalo ezilitshumi lobubanzi besigodo babuyingalo lengxenye.

22Wonke amapulanka ayelemisuka emibili yokuhlanganisa; wenza njalo kuwo wonke amapulanka eTabernakelini.

23Wenza amapulanka eTabernakelini, amapulanka angamatshumi amabili ohlangothini lwaseningizimu;

24wenza inyawo ezingamatshumi amane zesiliva ngaphansi kwamapulanka angamatshumi amabili, inyawo ezimbili ngaphansi kwepulanka linye zibe ngezemisuka yalo yomibili, lenyawo ezimbili ngaphansi kwelinye ipulanka zibe ngezemisuka yalo yomibili;

25wenza amapulanka angamatshumi amabili ohlangothini lwesibili lweTabernakeli, uhlangothi lwasenyakatho,

26kanye lenyawo zawo ezingamatshumi amane zesiliva, inyawo ezimbili ngaphansi kwepulanka elinye lenyawo ezimbili ngaphansi kwelinye ipulanka.

27Wenza amapulanka ayisithupha ohlangothini olungasemuva ngasentshonalanga,

28lamapulanka amabili ukuba abe yizingosi zeTabernakeli ngasemuva;

29womabili ahlanganiswa ngaphansi langaphezulu esongweni lokuqala ukuba abe yizingonsi ezimbili.

30Kwakulamapulanka aficaminwembili lenyawo zawo zesiliva ezilitshumi lesithupha, inyawo ezimbili ngaphansi kwepulanka elinye lelinye.

31Wenza imithando ngesihlahla somvagazi, imithando emihlanu yaba ngeyamapulanka ohlangothi olunye lweTabernakeli

32lemithando emihlanu yaba ngeyamapulanka ohlangothi olunye lweTabernakeli, lemithando emihlanu yaba ngeyamapulanka ohlangothi olungasemuva ngasentshonalanga.

33Umthando waphakathi wawenza ukuba udabule phakathi kwamapulanka uze ufinyelele ekucineni inxa zombili.

34Wabhada amapulanka ngegolide, wawenzela amasongo egolide ukuba athwale imithando, wayibhada imithando ngegolide.

35Wenza iveli lelembu elihle lentambo ephothiweyo eluhlaza leyibubende lebomvu, laba lamakherubi, kwaba ngumsebenzi wengcitshi.

36Walenzela iveli insika ezine ngesihlahla somvagazi, wazibhada ngegolide; ingwegwe zazo zenziwa ngegolide; wazikhandela inyawo ezine zesiliva.

37Wenza iveli lomnyango wethente ngelembu eliluhlaza leliyibubende lelibomvu, ngelembu elihle lentambo ephothiweyo, umsebenzi womthungi;

38walenzela insika ezinhlanu lengwegwe zazo; wabhada izihloko zazo lezibopho zazo ngegolide; inyawo zazo ezinhlanu zazingezethusi.