1 Lan 10 - Ndebele Bible (iBhayibhili Elingcwele) 1978

Ukufa kukaSawuli lamadodana akhe

1AmaFilistiya alwa labakoIsrayeli; abakoIsrayeli behlulwa, abanengi bafela entabeni yaseGilibowa.1 Sam 31:1–13

2AmaFilistiya axotshana loSawuli lamadodana akhe; abulala uJonathani loAbinadaba loMalikishuwa, amadodana kaSawuli.

3Impi yaba nzima kuSawuli, abatshoki bemitshoko bamfica, bamlimaza kubi.

4USawuli wasesithi kumphathi wezikhali zakhe: Khokha umhedla wakho, ungibulale ngawo, funa laba abangasokanga bafike, badlale ngami. Kodwa umphathi wezikhali zakhe kavumanga, ngoba wesaba kakhulu. Ngakho uSawuli wasethatha owakhe umhedla, waziwisela phezu kwawo.

5Lapho umphathi wezikhali zakhe ebona ukuba uSawuli usefile, laye waziwisela phezu komhedla wakhe, wafa.

6Wafake uSawuli, lamadodana akhe amathathu, labo bonke abendlu yakhe.

7Kwathi lapho bonke abakoIsrayeli ababehlala esigodini bebona ukuthi abakoIsrayeli babalekile, lokuthi uSawuli lamadodana akhe sebefile, batshiya imizi yabo, babaleka; amaFilistiya afika, ahlala kiyo.

8Kwathi kusasa lapho amaFilistiya efika ukuphanga ababuleweyo, bafica uSawuli lamadodana akhe befile entabeni yaseGilibowa.

9Amhlubula, amquma ikhanda, alithatha kanye lezikhali zakhe, athumela ilizwi elizweni lonke lamaFilistiya ukumemezela lindaba ezithombeni zawo lebantwini.

10Abeka izikhali zakhe ethempelini labonkulunkulu bawo, abethela ikhanda lakhe ethempelini likaDagoni.

11Kwathi lapho sebekuzwile abaseJabeshi‐Gileyadi lokho amaFilistiya akwenze kuSawuli,

12kwasuka wonke amaqhawe, athatha isidumbu sikaSawuli lezidumbu zamadodana akhe, aziletha eJabeshi, angcwaba amathambo abo ngaphansi kwesihlahla esikhulu eJabeshi, azila ukudla insuku eziyisikhombisa.

13Wafa uSawuli ngoba wayengathembekanga eNkosini uNkulunkulu, engagcinanga umlayo wayo; futhi wabuya waya emadlozini edinga ukuqondiswa,1 Sam 13:8–14; 15:1–24; Levi 19:31; 20:6; 1 Sam 28:7, 8

14kakudinganga eNkosini. Ngalokhoke iNkosi yambulala, umbuso yawunika uDavida indodana kaJese.