1 uTimothi 4 - Ndebele Bible (iBhayibhili Elingcwele) 1978

UPawuli uxwayisa uTimothi ngabafundisi bamanga

1UMoya utsho ngokusobala ukuba ngezikhathi zokucina abanye bazakumonyuka ekukholweni, balalele omoya abaduhisayo lezifundiso zabomoya ababi,

2ngokuzenzisa kwabaqamba amanga abatshiswe uphawu kuzazela zabo,

3besalela abantu ukuba bathathane, besithi kuzilwe ukudla uNkulunkulu akudalileyo ukuba kwamukelwe ngokubonga yibo abakholwayo labazi iqiniso.

4Ngoba konke okwadalwa nguNkulunkulu kuhle, kakulahlwa lutho uba lwamukelwa ngokubonga;

5ngoba kwenziwa kube ngcwele ngelizwi likaNkulunkulu langomkhuleko.

6Uba ubeluleka ngalezizinto abazalwane, uzakuba yisikhonzi esihle sikaKristu Jesu, wondliwe ngamazwi okukholwa lesifundiso esihle osilandelayo.

7Kodwa uzale inganekwane ezimbi ezezalukazi. Uzejwayeze umsebenzi wokukhonza uNkulunkulu.

8Ukwejwayeza umzimba kulokusiza okuthile, kodwa ukukhonza uNkulunkulu kusiza ezintweni zonke, ngoba kulesithembiso sokuphila kwalamuhla lokuphila okuzayo.

9Liqinisile lelilizwi, lifanele ukwamukelwa impela.

10Sisebenzela lokho, siyatshikatshika, ngoba sithembele kuNkulunkulu ophilayo onguMsilisi wabo bonke abantu, ikakhulu bona abakholwayo.

UTimothi welulekwa ngokuhamba langokufundisa

11Luleka ngalezizinto, uzifundise.

12Kungabi lamuntu odelela ubutsha bakho, kodwa woba yisibonelo kwabakholwayo ngokukhuluma, langokuhamba, langothando, langokukholwa, langokuhlambuluka.

13Nanzelela ukufunda lokutshumayela lokufundisa ngize ngifike.

14Ungadeleli isiphiwo esikuwe, owaphiwa sona ngelizwi labaprofethi langokubekwa izandla ngabadala.

15Nanzelela lezizinto, uzikhuthalele, ukuze bonke babone ukuqhubeka kwakho.

16Zinanzelele wena kanye lokufundisa kwakho; ukhuthale kulezizinto; ngoba ngokwenza njalo uzakuzisilisa wena kanye lalabo abakuzwayo.