Dute 29 - Ndebele Bible (iBhayibhili Elingcwele) 1978

Isivumelwano seNkosi loIsrayeli elizweni laseMowabi

1La ngamazwi esivumelwano iNkosi eyamlaya uMose ukusenza labantu bakoIsrayeli elizweni laseMowabi, ngaphandle kwesivumelwano eyayisenze labo eHorebe.

2UMose wababiza bonke abakoIsrayeli, wathi kubo: Libonile konke iNkosi eyakwenza phambi kwenu elizweni laseGibithe, kuFaro lakuzo zonke izinceku zakhe lakulo ilizwe lakhe,

3inhlupheko ezinkulu elazibonayo, lezozibonakaliso lalezozimangaliso ezinkulu.

4Kodwa kuze kube lamuhla iNkosi kayilinikanga ingqondo yokuqedisisa lamehlo okubona lendlebe zokuzwa.

5Ngiliholile enkangala iminyaka engamatshumi amane; izambatho zenu kaziguganga, lamanyathelo enu kawaphelanga enyaweni zenu;

6kalidlanga isinkwa, kalinathanga iwayini lotshwala, ukuba lazi ukuthi ngiyiNkosi uNkulunkulu wenu.

7Ekufikeni kwenu kulindawo, uSihoni inkosi yaseHeshiboni loOgi inkosi yaseBashani baphuma bayakulwa lathi, kodwa sabanqoba,Nani 21:21–35

8sathatha ilizwe labo, salinika abakoRubeni labakoGadi lengxenye yesizwe sakoManase ukuba libe ngelabo.Nani 32:33

9Ngakhoke gcinani kuhle amazwi alesisivumelwano, ukuba liphumelele kukho konke elikwenzayo.

10Lonke limi phambi kweNkosi uNkulunkulu wenu lamuhla, inhloko zezizwe zenu, labalisa benu, lezinduna zenu, lawo wonke amadoda akoIsrayeli,

11labantwana benu, labomkenu, labemzini abasezihonqweni zenu abalibandela inkuni labalikhela amanzi,

12ukuba livume isivumelwano lesifungo seNkosi uNkulunkulu wenu esenzayo lani lamuhla,

13ukuze ilimise lamhla libe ngabantu bayo, lokuze ibe nguNkulunkulu wenu njengokulithembisa kwayo lanjengokufunga kwayo kubokhokho benu, oAbrahama loIsaka loJakobe.

14Kangisenzi lesisivumelwano lalesisifungo lani kuphela,

15kodwa labo bonke abemi kanye lathi lamhla phambi kweNkosi uNkulunkulu wethu, kanye labangekho.

16Liyazi ngokuhlala kwethu elizweni laseGibithe langokudabula kwethu phakathi kwezizwe ekuhambeni kwethu;

17labona izinto zazo ezinengekayo, izithombe zazo ezenziwe ngesigodo langelitshe, ezesiliva lezegolide, ezazikhona kuzo.

18Qaphelani, funa kube khona phakathi kwenu umuntu, umuzi ingabe isizwe, okulenhliziyo efulathela iNkosi uNkulunkulu wethu lamhla ukuyakhonza onkulunkulu balezozizwe. Qaphelani, funa kube khona phakathi kwenu impande ethela izithelo ezibabayo lezilobuhlungu,Heb 12:15

19ngitsho umuntu othi esizwa amazwi alesisifungo, azithokozise enhliziyweni yakhe athi: Kungaba kuhle kimi lanxa ngilandela inhliziyo yami elenkani; ngalokhu bonke abantu bangachitheka.

20INkosi kayiyikumthethelela, kodwa intukuthelo yayo lomhawu wayo kuzavutha kuye, zize zimehlele zonke iziqalekiso ezilotshiweyo ogwalweni lolu, iNkosi icitshe ibizo lakhe emhlabeni.

21INkosi izakumahlukanisela ebubini kuzo zonke izizwe zakoIsrayeli, njengazo zonke iziqalekiso zesivumelwano ezilotshiweyo kulolugwalo lomlayo.

22Isizukulwana esizayo, abantwana benu abazakuvela emva kwenu, kanye labezizwe abavela elizweni elikhatshana lapho bebona inhlupheko zalelilizwe lezifo iNkosi eligulise ngazo

23lonke ilizwe elitshiswe yisolufa letshwayi, elingelakho okuhlanyelweyo lokumilayo, lotshani, elichithwe njengeSodoma leGomora leAdima leZoboyimi, imizi eyachithwa yiNkosi ngentukuthelo yayo lolaka lwayo,Gen 19:24, 25

24bazabuza bonke besithi: INkosi yenzeleni lokhu kulelilizwe na? Kutsho ukuthini ukuvutha kwalolulaka olukhulu na?

25Abantu bazaphendula bathi: Kungoba badela isivumelwano seNkosi, uNkulunkulu wabokhokho babo, eyasenza labo ekubakhupheni kwayo eGibithe,

26bayakhonza abanye onkulunkulu abangabaziyo, babadumisa, iNkosi eyayitshilo ukuba bangabakhonzi.

27Ngalokhu yalithukuthelela lelilizwe, yalehlisela zonke iziqalekiso ezilotshiweyo ogwalweni lolu.

28INkosi yabasiphula elizweni labo ngentukuthelo enkulu langolaka olukhulu, yabaphosa kwelinye ilizwe njengalamhla.

29Izimfihlakalo zingezeNkosi uNkulunkulu wethu, kodwa izinto ezambuliweyo zingezethu lezabantwana bethu kuze kube nininini, ukuba sigcine wonke amazwi alumlayo.